रशिया आणि युक्रेनमध्ये तीन वर्षांपासून सुरू असलेलं युद्ध थांबवण्यासाठी शांतता चर्चेची तयारी सुरू आहे. यासाठी युक्रेनचे राष्ट्राध्यक्ष वोलोडिमिर जेलेंस्की, अमेरिकेचे मंत्री मार्को रुबियो आणि रशियाचे प्रतिनिधी सौदी अरेबियात पोहोचले आहेत.

मात्र, या चर्चेच्या आधीच मंगळवारी युक्रेनने मॉस्कोवर मोठ्या प्रमाणावर ड्रोन हल्ला केला. या हल्ल्यात रशियाची राजधानी मॉस्को तसेच जवळच्या काही शहरांना लक्ष्य करण्यात आले. एकाच वेळी अनेक ड्रोन हल्ले झाल्यामुळे मॉस्कोतील सुरक्षेचा प्रश्न निर्माण झाला आहे. रशियन वायुसेनेने अनेक ड्रोन नष्ट केल्याचा दावा केला असला तरी, काही ड्रोन लक्ष्यावर आदळल्याची माहिती समोर आली आहे.

या हल्ल्यातील नुकसान किती.?

रशियन संरक्षण खात्याच्या माहितीनुसार, जवळपास ७० ड्रोन हल्ले करण्यात आले. त्यातील ५८ ड्रोन रशियन हवाई संरक्षण प्रणालीने नष्ट केले, मात्र काही ड्रोन रहिवासी इमारतींवर आदळल्यामुळे काही ठिकाणी नुकसान झाले आहे. या हल्ल्यांमुळे मॉस्को विमानतळ काही काळासाठी बंद ठेवण्यात आला असून, अनेक उड्डाणे प्रभावित झाली आहेत. या हल्ल्यांमुळे शांतता चर्चेवर परिणाम होण्याची शक्यता व्यक्त केली जात आहे.

रशिया-युक्रेन युद्धातील निर्णायक टप्पा

तीन वर्षांपासून सुरू असलेल्या या युद्धाच्या पार्श्वभूमीवर सौदी अरेबियात शांतता चर्चेचे आयोजन करण्यात आले आहे. या चर्चेत शस्त्रसंधी करारावर सहमती होण्याची शक्यता आहे. अमेरिकन आणि रशियन अधिकाऱ्यांमध्ये या आधीच चर्चेच्या काही फेऱ्या पार पडल्या आहेत, मात्र ही बैठक निर्णायक ठरणार असल्याचे बोलले जात आहे. कारण, यावेळी राष्ट्राध्यक्ष जेलेंस्की स्वतः चर्चेसाठी उपस्थित आहेत.

सौदी अरेबियाच्या भूमिकेचे कौतुक

युक्रेनचे राष्ट्राध्यक्ष जेलेंस्की मंगळवारी सौदी अरेबियात पोहोचले. त्यांचे सौदी अरबचे क्राऊन प्रिन्स मोहम्मद बिन सलमान यांनी स्वागत केले. जेद्दा येथे रवाना होण्यापूर्वी, जेलेंस्की यांनी शांतता चर्चेसाठी घेतलेल्या पुढाकाराबद्दल सौदी अरेबियाचे आभार मानले. मध्यस्थतेसाठी मोहम्मद बिन सलमान यांच्या भूमिकेचे त्यांनी विशेष कौतुक केले.

रशिया-युक्रेन युद्धात आतापर्यंत युक्रेनला मोठा भूभाग गमवावा लागला आहे. दोन्ही देशांच्या हजारो सैनिकांनी या युद्धात प्राण गमावले आहेत. त्यामुळे ही शांतता चर्चा युद्ध थांबवण्यासाठी निर्णायक ठरेल का, याकडे संपूर्ण जगाचे लक्ष लागले आहे.