राज्यभरात सुरू असलेल्या मराठीच्या आंदोलनावर आता महाराष्ट्र नवनिर्माण सेनेचे अध्यक्ष राज ठाकरे यांनी मोठं वक्तव्य केलं आहे. मराठी भाषेच्या वापरासाठी मनसेने बँकांमध्ये सुरू केलेल्या आंदोलनावर तूर्तास विराम देण्याचे आवाहन खुद्द राज ठाकरे यांनी आपल्या कार्यकर्त्यांना केलं आहे. सोशल मीडियावर एक पत्र प्रसिद्ध करत त्यांनी ही विनंती केली असून त्याच्या मागचं कारणही सविस्तर सांगितलं आहे.

मराठीसाठी उभं राहिलेलं आंदोलन

गुढीपाडव्याच्या मेळाव्यात राज ठाकरे यांनी स्पष्ट शब्दांत आदेश दिला होता की, महाराष्ट्रातील बँकांमध्ये व्यवहारासाठी मराठी भाषेचा वापर होतो की नाही, याची खातरजमा मनसैनिकांनी करावी. तसेच जिथे मराठीचा वापर केला जात नाही, तिथे संबंधित बँकेच्या अधिकाऱ्यांना याची जाणीव करून द्यावी.

त्याच्या दुसऱ्याच दिवशीपासून संपूर्ण महाराष्ट्रात मनसेचे कार्यकर्ते बँकांमध्ये गेले, त्यांनी मराठीचा आग्रह धरला आणि सामान्य जनतेमध्येही मराठीच्या वापराबाबत जागृती केली. अनेक ठिकाणी बँक व्यवस्थापनाला याविषयी निवेदनंही देण्यात आली.

“आता हे आंदोलन थांबवायला हरकत नाही” – राज ठाकरे

या पार्श्वभूमीवर राज ठाकरे यांनी कार्यकर्त्यांना उद्देशून लिहिलेल्या पत्रात म्हटलं आहे:

“सर्वप्रथम, मराठीसाठी तुम्ही घेतलेली भूमिका अत्यंत सराहनीय आहे. मनसेची ताकद आणि मराठी माणसाच्या हक्कासाठी लढण्याची आमची तयारी पुन्हा एकदा सर्वांनी पाहिली. मात्र, आता आपल्याला हे लक्षात घ्यावं लागेल की, आपण या विषयावर पुरेशी जनजागृती केली आहे. त्यामुळे हे आंदोलन तूर्तास थांबवायला हरकत नाही.”

माझ्या तमाम महाराष्ट्र सैनिकांना..! pic.twitter.com/S3rYGgoYh0

— Raj Thackeray (@RajThackeray) April 5, 2025

सरकारवर प्रश्न उपस्थित करत स्पष्ट इशारा

राज ठाकरे यांनी आपल्या पत्रात राज्य सरकारवरही स्पष्ट शब्दांत टीका केली. ते म्हणाले:

“रिझर्व्ह बँकेचे नियम सर्व बँकांना माहित आहेत. त्या नियमांची अंमलबजावणी करणं ही सरकारची जबाबदारी आहे. मुख्यमंत्र्यांनी माध्यमांशी बोलताना म्हटलं की, कायदा हातात घेऊ देणार नाही. आमचीही तीच इच्छा आहे. पण मग सरकारने बँकांना मराठीचा सन्मान करण्यास भाग पाडलं पाहिजे.”

“आम्ही थांबतो, पण लक्ष हटणार नाही!”

पत्राच्या अखेरीस त्यांनी पुन्हा एकदा सत्ताधाऱ्यांना सावध करत म्हटलं:

“मनसैनिकांनो, तूर्तास आंदोलन थांबवा, पण मराठीच्या मुद्द्यावर लक्ष हटवू नका. जर पुन्हा कुठे मराठी माणसाचा अपमान झाला, किंवा नियमांचं उल्लंघन झालं, तर मनसेचे सैनिक तिथे पोहोचतीलच. आणि तेव्हा चर्चा नक्कीच होईल!”

राज ठाकरे यांचं हे पत्र फक्त आंदोलन थांबवण्याचं आवाहन नसून, सरकारला दिलेला एक स्पष्ट इशाराही आहे – “आम्ही मागे हटलो असं समजू नका.” मराठीचा प्रश्न मिटलेला नाही, तो फक्त एका टप्प्यावर विश्रांती घेतोय.