मुंबई, कांदिवली: कांदिवली पूर्व येथील समता नगर भागात एका चार वर्षांच्या चिमुरडीवर अत्याचार केल्याप्रकरणी एका ५० वर्षीय सुरक्षा रक्षकाला पोलिसांनी अटक केली आहे. ही घटना बुधवारी संध्याकाळी घडली असून, आरोपी हा स्थानिक सभागृहात सुरक्षा रक्षक म्हणून काम करत होता.

पीडित मुलगी बुधवारी आपल्या मित्र-मैत्रिणींना सोबत घेऊन सभागृहात खेळत होती. त्याच वेळी तिथे उपस्थित असलेल्या आरोपीने तिला जवळ बोलावले आणि मांडीवर बसवून तिच्याशी अशोभनीय वर्तन केले. मुलगी लहान असल्याचा फायदा घेत आरोपीने तिच्याशी गैरवर्तन केल्याचे उघड झाले आहे.

घरी परतल्यावर त्या चिमुरडीनं आपल्या आईला हातवारे करत हा प्रकार समजावून सांगितला. आईने तात्काळ समता नगर पोलीस ठाण्यात तक्रार दाखल केली. पोलिसांनी तत्काळ कारवाई करत आरोपीविरुद्ध पोक्सो कायदा आणि भारतीय दंड संहिताच्या विविध कलमांखाली गुन्हा दाखल केला. गुरुवारी पहाटे पोलिसांच्या एका पथकाने आरोपीला त्याच्या राहत्या जागेतून अटक केली.

सध्या पोलिसांकडून या प्रकरणाचा अधिक तपास सुरू आहे. आरोपीच्या पार्श्वभूमीचीही चौकशी केली जात आहे, आणि पोलिसांनी स्पष्ट केलं आहे की त्याच्यावर याआधी कोणताही गुन्हा नोंदलेला नव्हता.

अल्पवयीन मुलांविरोधात गुन्ह्यांमध्ये वाढ

मुंबईसारख्या मोठ्या शहरात अल्पवयीन (१८ वर्षांखालील) मुले आणि मुलींवर होणाऱ्या अत्याचारांच्या घटनांमध्ये चिंताजनक वाढ झाली आहे. २०२३ साली पोक्सो कायद्यान्वये १,१०८ गुन्हे नोंदवले गेले होते, तर २०२४ मध्ये ही संख्या वाढून १,३४१ झाली आहे.

या गुन्ह्यांमध्ये बलात्काराचे ६०९, विनयभंगाचे ६६७ आणि अश्लील शेरेबाजी व छेडछाडीचे ३५ प्रकार समाविष्ट आहेत. विशेष म्हणजे, अनेक प्रकरणांमध्ये आरोपी हे पीडितांना ओळखीचेच असतात.

२०२३ मध्ये पोलिसांनी ९९% प्रकरणे उघडकीस आणली होती, परंतु २०२४ मध्ये हे प्रमाण थोडे घटून ९६% झाले आहे. विनयभंग व छेडछाडप्रकरणी गुन्हे उघडकीस येण्याचे प्रमाणही थोडेसे कमी झाले आहे.