स्टँड-अप कॉमेडियन कुणाल कामरा सध्या एका गंभीर कायदेशीर वादात अडकला आहे. काही दिवसांपूर्वी आपल्या शोदरम्यान कामराने महाराष्ट्रातील राजकीय उलथापालथीवर भाष्य करत उपमुख्यमंत्री एकनाथ शिंदे यांच्यावर विडंबनात्मक गाणं सादर केलं होतं. यामुळे शिवसेना (शिंदे गट) आक्रमक झाली आणि कामराविरोधात तक्रारीसह एफआयआर दाखल करण्यात आला.

या प्रकरणावर कामराने प्रथम मद्रास उच्च न्यायालयात धाव घेतली होती. न्यायालयाने त्याला ७ एप्रिलपर्यंत अटक न करण्याचे निर्देश देत अटकपूर्व जामीन मंजूर केला. परंतु आता कामराने थेट मुंबई उच्च न्यायालयात जाऊन ही एफआयआरच रद्द करण्याची मागणी करणारी याचिका दाखल केली आहे.

याचिकेतील मुद्दे काय आहेत?

कामराच्या वतीने दाखल करण्यात आलेल्या याचिकेमध्ये असा ठाम दावा करण्यात आला आहे की, पोलिसांनी दाखल केलेला गुन्हा हा भारतीय संविधानात दिलेल्या मूलभूत हक्कांचे उल्लंघन आहे.

त्याने अनुच्छेद १९ (१) (अ) — अभिव्यक्ती स्वातंत्र्य, अनुच्छेद १९ (१) (जी) — कोणताही व्यवसाय किंवा व्यापार करण्याचा अधिकार, आणि अनुच्छेद २१ — जीवन आणि वैयक्तिक स्वातंत्र्याचा अधिकार, यांचा आधार घेतला आहे.

पोलिसांची चौकशी आणि कामराची प्रतिक्रिया

मुंबई पोलिसांनी कुणाल कामराला चौकशीसाठी तिनदा समन्स बजावले, मात्र तो हजर झाला नाही. पोलिसांनी त्याच्या मुंबईतील पत्त्यावर जाऊन भेट दिली, परंतु कामरा तिथे सापडला नाही. त्यानंतर कामराने सोशल मीडियावर एक सूचक पोस्ट शेअर करत म्हटले होते –

“गेल्या १० वर्षांपासून मी ज्या पत्त्यावर राहत नाही, तिथे पोलिस पाठवणं म्हणजे तुमचा आणि लोकांचा वेळ वाया घालवणं आहे.”

#Breaking Bombay High Court to consider tomorrow Kunal Kamra’s plea seeking quashing of FIR filed against him over his ‘Gaddar’ jibe allegedly directed at Maharashtra Deputy Chief Minister Eknath Shinde. pic.twitter.com/3Qd7cIEnAl

— Bar and Bench (@barandbench) April 7, 2025

नेमकं प्रकरण काय घडलं?

आपल्या एका स्टँड-अप शोमध्ये कुणाल कामराने महाराष्ट्रातील राजकीय घडामोडींवर भाष्य करत म्हटले होते –

“महाराष्ट्राच्या निवडणुकीत त्यांनी काय केलं, हे सांगावं लागेल… आधी शिवसेना भाजपमधून बाहेर पडली, मग शिवसेना शिवसेनेतून बाहेर पडली… राष्ट्रवादी काँग्रेसही राष्ट्रवादी काँग्रेसमधून बाहेर पडली.”

हे बोलतानाच त्याने एकनाथ शिंदे यांच्यावर लक्ष्य करत एक व्यंगात्मक गाणंही सादर केलं. या गाण्यानंतर शिवसेना (शिंदे गट) कार्यकर्त्यांनी संताप व्यक्त करत मुंबईतील खार येथील कार्यक्रमस्थळी तोडफोड केली. त्यानंतर कुणाल कामराच्या विरोधात पोलिसांत तक्रार दाखल करण्यात आली आणि त्याच्याविरुद्ध एफआयआरही नोंदवण्यात आला.

पुढे काय होणार?

सध्या या प्रकरणावर मुंबई उच्च न्यायालयात सुनावणी होण्याची शक्यता असून, एफआयआर रद्द करण्याच्या कामराच्या मागणीवर काय निर्णय दिला जातो, याकडे सर्वांचे लक्ष लागले आहे.

या संपूर्ण प्रकरणामुळे अभिव्यक्ती स्वातंत्र्य विरुद्ध राजकीय भावना हा नेहमीच वादाचा विषय ठरलेला मुद्दा पुन्हा एकदा चर्चेत आला आहे.