बंगळुरु | आयटी क्षेत्रातील दिग्गज आणि Infosys चे सहसंस्थापक नारायण मूर्ती यांचा नातू केवळ १७ महिन्यांचा असूनही तो आज कोट्यधीश बनला आहे. हे ऐकून कोणीही थक्क होईल, पण गुंतवणुकीचे शास्त्र आणि हुशारी यांचा संगम असला की अशक्य काहीच राहत नाही.

नारायण मूर्ती यांनी आपल्या नातवाला Infosys चे तब्बल १५ लाख शेअर्स भेट म्हणून दिले आहेत. यामुळे एकाग्र याला आतापर्यंत १०.६५ कोटी रुपयांचा लाभांश मिळाला आहे.

यावेळी ३.३ कोटींचा बोनस!

Infosys ने आर्थिक वर्ष २०२४-२५ साठी २२ रुपये प्रति शेअर असा अंतरिम लाभांश जाहीर केला आहे. त्यामुळे एकाग्र याला यावेळी ३.३ कोटी रुपये लाभांश स्वरूपात मिळणार आहेत. ३० मे ही रेकॉर्ड डेट निश्चित करण्यात आली आहे, आणि ३० जून रोजी ही रक्कम संबंधित डीमॅट खात्यात जमा होईल.

एकूण कमाई १० कोटींच्या घरात

यापूर्वी देखील एकाग्र याने तीनदा लाभांशाच्या माध्यमातून ७.३५ कोटी रुपयांची कमाई केली होती. नवीन लाभांशासह त्याची एकूण कमाई आता १०.६५ कोटी इतकी झाली आहे. इतक्या कमी वयात एवढी मोठी संपत्ती मिळवणारा तो कदाचित सर्वात लहान कोट्यधीश असेल.

ही ‘गिफ्ट’ कोणी दिली?

ही शेअर भेट स्वतः नारायण मूर्ती यांनी दिली आहे. याची एकूण किंमत सुमारे २४० कोटी रुपये इतकी आहे. एकाग्र हा रोहन मूर्ती आणि अपर्णा कृष्णा यांचा मुलगा आहे. त्याचा जन्म १० नोव्हेंबर २०२३ रोजी बंगळुरु येथे झाला. नारायण मूर्ती आणि सुधा मूर्ती यांना एक मुलगा (रोहन) आणि एक मुलगी (अक्षता) आहे. अक्षता मूर्ती ही ब्रिटनचे माजी पंतप्रधान ऋषी सुनक यांची पत्नी आहे.

हिस्सेदारीत बदल

या शेअर गिफ्टनंतर नारायण मूर्ती यांची Infosys मधील हिस्सेदारी ०.४०% वरून ०.३६% इतकी झाली आहे. कंपनीने नुकत्याच मार्च तिमाहीत ४०,९२५ कोटी रुपयांचा महसूल नोंदवला असून, तो मागील तिमाहीपेक्षा २% नी कमी आहे.

एकाग्रचं हे यश केवळ वारशावर आधारित असलं, तरी गुंतवणुकीची ताकद आणि नियोजन कसं आर्थिक भविष्य घडवू शकतं, याचं हे जिवंत उदाहरण आहे.