उपमुख्यमंत्री एकनाथ शिंदे यांनी पुन्हा एकदा शिवसेना (ठाकरे गट) आणि पक्षप्रमुख उद्धव ठाकरे यांच्यावर नाव न घेता तिखट शब्दांत हल्लाबोल केला आहे. नाशिक जिल्ह्यातील त्यांच्या मूळगावी – दरेगाव – येथे एका सार्वजनिक कार्यक्रमात बोलताना शिंदेंनी शिवसेनेतील गद्दारी, बाळासाहेब ठाकरे यांचे विचार आणि शेतीच्या बदलत्या गरजांवर आपली भूमिका मांडली.

कार्यक्रमात बोलताना एकनाथ शिंदे म्हणाले, “इतिहास गद्दारांना कधीच माफ करत नाही, आणि तो कधीच माफ करणारही नाही. ज्यांनी बाळासाहेब ठाकरे यांचे विचार सोडले, त्यांच्याशी गद्दारी केली, काँग्रेससोबत हातमिळवणी केली, त्यांनी बाळासाहेबांच्या शिकवणीशी प्रतारणा केली आहे. साहेबांनी स्पष्ट सांगितलं होतं, ‘काँग्रेससोबत जायचं नाही’, पण काहींनी स्वतःच्या स्वार्थासाठी हे तत्व बाजूला ठेवले. ही फक्त गद्दारी नाही, ही बाळासाहेबांच्या आत्म्याशीच बेईमानी आहे.”

शिंदेंनी स्पष्ट केलं की, जनतेने आता या ‘नकली शिवसेनेला’ नाकारलं असून, खरी शिवसेना ही बाळासाहेबांच्या विचारांवर चालणारी आहे. “विधानसभा निवडणुकीत जनतेने ठरवलं – बाळासाहेबांच्या विचारांची खरी शिवसेना कोणती आहे. लोकांनी शिक्कामोर्तब केलंय की नकली लोक नकोत. आज लोक खोटे आवाज काढणाऱ्यांच्या मागे जाणार नाहीत. जर तुम्ही खरे असाल, तर बाळासाहेबांचा आवाज का नक्कल करता? हा पोरकटपणा आहे, थिल्लरपणा आहे. बाळासाहेबांना हे पाहून वेदना झाल्या असत्या. ते जिवंत असते, तर अशा वागणुकीला त्यांनी चाबकाने फटकारलं असतं,” असा घणाघात त्यांनी केला.

या राजकीय टीकेसह शिंदेंनी ग्रामीण भागातील विकासावरही भर दिला. “प्रत्येक वेळी मी गावाकडे आलो की वृक्ष लागवडीचा कार्यक्रम घेतो. गावकऱ्यांनी केवळ पारंपरिक शेतीवर अवलंबून राहू नये. फळझाडे लावावी, आधुनिक शेतीचा स्वीकार करावा, आणि समूह शेतीच्या माध्यमातून एकत्रित काम केलं तर रोजगारनिर्मितीचा मोठा मार्ग खुला होईल,” असं त्यांनी सांगितलं.

पुढे बोलताना शिंदे म्हणाले, “आपण निसर्गाचं रक्षण केलं, तर निसर्ग आपल्याला साथ देईल. आम्ही ‘नवीन महाबळेश्वर’ ही संकल्पना राबवत आहोत. यामध्ये पर्यटन वाढवण्यावर भर देण्यात येणार असून, त्यामुळे स्थानिकांना व्यवसाय आणि रोजगाराच्या नव्या संधी उपलब्ध होतील.”

कार्यक्रमात गावकरी आणि स्थानिक कार्यकर्त्यांनी मोठ्या संख्येने उपस्थित राहून उपमुख्यमंत्र्यांचं उत्स्फूर्त स्वागत केलं. राजकीय टीका, विकासाचं भान आणि बाळासाहेबांविषयीचा आदर यांचा संगम असलेल्या या भाषणाने पुन्हा एकदा ठाकरे गटाविरुद्ध शिंदे गटाची भूमिका अधिक ठामपणे समोर आली आहे.