यूपीएससी 2022 परीक्षेत ओबीसी आणि अपंगत्व कोट्याचा गैरवापर केल्याच्या आरोपांमुळे चर्चेत आलेल्या पूजा खेडकर यांच्याविरोधात फसवणुकीचा गुन्हा दाखल आहे. या प्रकरणाची सुनावणी सध्या सर्वोच्च न्यायालयात सुरू असून, २१ एप्रिल रोजी झालेल्या सुनावणीत न्यायालयाने खेडकर यांना क्राइम ब्रँचसमोर २ मे रोजी सकाळी १०.३० वाजता हजर राहण्याचे आदेश दिले आहेत.

सर्वोच्च न्यायालयाचे निरीक्षण

न्यायालयाने स्पष्ट केले की, जोपर्यंत खेडकर तपासात सहकार्य करतील, तोपर्यंत त्यांना अटकेपासून संरक्षण राहील. आतापर्यंत खेडकर यांची ठोस चौकशी झालेली नाही, असेही न्यायालयाने नमूद केले.

कोर्टातील युक्तिवाद

दिल्ली पोलिसांनी खेडकर यांच्या कोठडीची मागणी केली होती. मात्र, खेडकर यांच्या वकिलांनी कोठडीत चौकशीची गरज नाही, असा युक्तिवाद केला.खेडकर यांच्याकडून चौकशीसाठी सहकार्य करण्याची तयारी दर्शवण्यात आली आहे.

यापूर्वी काय घडलं?

१५ जानेवारी २०२५ : सर्वोच्च न्यायालयाने १४ फेब्रुवारीपर्यंत अटकेपासून संरक्षण दिलं.

१४ फेब्रुवारी २०२५ : संरक्षणाची मुदत १७ मार्चपर्यंत वाढवण्यात आली.

दिल्ली उच्च न्यायालयाने २३ डिसेंबर २०२४ रोजी खेडकर यांचा अटकपूर्व जामीन फेटाळला होता.

नेमकं प्रकरण काय आहे?

खेडकर यांच्यावर OBC आणि अपंगत्व कोट्याचा गैरवापर करून अतिरिक्त प्रयत्नांची संधी मिळवली आणि कागदपत्रांमध्ये फेरफार केल्याचा आरोप आहे. UPSCने त्यांची उमेदवारी रद्द केली असून भविष्यातील सर्व परीक्षांमधून बंदी घातली आहे. मात्र, पूजा खेडकर यांनी सर्व आरोप फेटाळले आहेत.

पुढील टप्पा

पूजा खेडकर यांना २ मे रोजी चौकशीसाठी हजर राहावे लागणार आहे. या प्रकरणातील पुढील सुनावणी २१ मे २०२५ रोजी सर्वोच्च न्यायालयात होणार आहे.