महाराष्ट्रात महायुती सरकार स्थापन होऊन 100 दिवस पूर्ण झाले आहेत. या कालावधीनंतर मुख्यमंत्री देवेंद्र फडणवीस यांनी आज राज्य सरकारच्या कामकाजाचा व्यापक आढावा घेणारे “100 दिवसांचे प्रगती पुस्तक” जनतेसमोर सादर केले. या अहवालात राज्य सरकारच्या 48 विभागांनी निश्चित केलेल्या उद्दिष्टांवर आधारित कामगिरीचे मूल्यांकन करण्यात आले आहे.

100 दिवसांत काय झालं?

फडणवीसांनी ट्विटद्वारे दिलेल्या माहितीनुसार, महायुती सरकारने कार्यभार हाती घेतल्यानंतर प्रत्येक विभागाने 100 दिवसांसाठी विशेष धोरणात्मक कार्यक्रम आखले. एकूण 902 उद्दिष्टे निश्चित करण्यात आली होती. त्यापैकी 706 उद्दिष्टांची पूर्तता झाली असून, उर्वरित 196 उद्दिष्टांवर काम सुरूच आहे. याचा अर्थ, शंभर दिवसांत राज्य सरकारने 78% उद्दिष्टपूर्ती केली आहे.

फडणवीस म्हणाले, “सर्व 48 विभागांनी मिळून अतिशय दूरदृष्टीने, लोकाभिमुख आणि प्रभावी निर्णय घेतले आहेत. ही प्रगती महाराष्ट्राच्या परिवर्तनशील वाटचालीचे प्रतीक आहे.”

कशा प्रकारे झाली रँकिंग?

प्रत्येक विभागाने स्वतःसाठी ठरवलेल्या उद्दिष्टांवर आधारित त्यांची टक्केवारी आणि त्या आधारे क्रमवारी ठरवण्यात आली आहे. एकूण 48 विभागांपैकी 12 विभागांनी 100% उद्दिष्टपूर्ती केली आहे, तर 18 विभागांनी 80% पेक्षा अधिक कामगिरी केली आहे.

मुख्य नेत्यांच्या खात्यांची कामगिरी

देवेंद्र फडणवीस – गृहखाते

सध्या मुख्यमंत्री देवेंद्र फडणवीस यांच्याकडे गृहखाते आहे. त्यांच्या खात्याने ३१ उद्दिष्टांची पूर्तता करत दुसरा क्रमांक पटकावला आहे. कायदा-सुव्यवस्था, सायबर गुन्हेगारी नियंत्रण, महिला सुरक्षा, आणि पोलिस यंत्रणेच्या आधुनिकीकरणावर भर देण्यात आला आहे.

एकनाथ शिंदे – नगरविकास व गृहनिर्माण

उपमुख्यमंत्री एकनाथ शिंदे यांच्याकडे नगरविकास व गृहनिर्माण ही दोन महत्त्वाची खाती आहेत.

नगरविकास खाते: ३४ पैकी २९ उद्दिष्टे पूर्ण, म्हणजेच सुमारे ८५% कामगिरी

गृहनिर्माण खाते: ६६ पैकी ४५ उद्दिष्टे पूर्ण, म्हणजेच सुमारे ६८% यश

उफमुख्यमंत्री शिंदे यांच्या नेतृत्वाखाली शहरांची पायाभूत सुविधा, झोपडपट्टी पुनर्वसन, आणि स्वस्त घर प्रकल्पांच्या कामांवर भर देण्यात आला आहे.

अजित पवार – अर्थ व राज्य उत्पादन शुल्क

उपमुख्यमंत्री अजित पवार यांच्याकडे अर्थ आणि राज्य उत्पादन शुल्क ही खाती आहेत.

राज्य उत्पादन शुल्क खाते: ६ पैकी ५ उद्दिष्टे पूर्ण – सुमारे ८३% कामगिरी

अर्थ खात्याच्या कामगिरीचा तपशीलही लवकरच उपलब्ध होणार आहे. पण बजेट सादरीकरण, महसूल नियंत्रण, आणि विकास योजनांसाठी निधी वाटप यावर त्यांचा विशेष भर होता.

राज्यात नवीन महायुती सरकार स्थापन झाल्यानंतर शासनाच्या सर्व 48 विभागांनी 100 दिवसांचा धोरणात्मक बाबींचा कार्यक्रम हाती घेऊन महत्त्वाची नवीन धोरणे, दूरगामी निर्णय व लोकाभिमुख उपक्रमांची आखणी सुरू केली.@Dev_Fadnavis https://t.co/MB4JhxYHeu

— DD Sahyadri News | सह्याद्री बातम्या (@ddsahyadrinews) May 1, 2025

पहा सर्व विभागांची यादी

अ.क्र.	विभागाचे नाव	एकूण मुद्दे	कार्यवाही पूर्ण	%	कार्यवाही प्रगतीपथावर
1	जलसंपदा	37	37	100%	0
2	गृह	31	31	100%	0
3	ग्राम विकास	19	19	100%	0
4	पशुसंवर्धन	18	18	100%	0
5	बंदरे	12	12	100%	0
6	उच्च व तंत्र शिक्षण	11	11	100%	0
7	कामगार	9	9	100%	0
8	वस्त्रोद्योग	8	8	100%	0
9	सांस्कृतिक कार्य	6	6	100%	0
10	खनिकर्म	4	4	100%	0
11	दुग्धव्यवसाय	4	4	100%	0
12	रोजगार हमी योजना	2	2	100%	0
13	ऊर्जा	41	40	98%	1
14	उद्योग	33	32	97%	1
15	महसूल	23	22	96%	1
16	परिवहन	35	33	94%	2
17	शालेय शिक्षण	17	16	94%	1
18	अन्न, औषध प्रशासन	12	11	92%	1
19	मदत व पुनर्वसन	10	9	90%	1
20	विमानचालन	19	17	89%	2
21	कौशल्य विकास, रोजगार, उद्योजकता व नाविन्यता	18	16	89%	2
22	महिला व बाल विकास	16	14	88%	2
23	कृषी	29	25	86%	4
24	मत्स्य	7	6	86%	1
25	नगर विकास – 1	34	29	85%	5
26	वैद्यकीय शिक्षण आणि औषध	13	11	85%	2
27	माहिती तंत्रज्ञान	23	19	83%	4
28	सहकार	12	10	83%	2
29	राज्य उत्पादन शुल्क	6	5	83%	1
30	सार्वजनिक आरोग्य	20	16	80%	4
31	मराठी भाषा	4	3	75%	1
32	सार्वजनिक बांधकाम	30	22	73%	8
33	पाणी पुरवठा व स्वच्छता	16	11	69%	5
34	पर्यटन	13	9	69%	4
35	गृहनिर्माण	66	45	68%	21
36	सामाजिक न्याय व विशेष सहाय्य	40	27	68%	13
37	मृद व जलसंधारण	21	14	67%	7
38	क्रीडा व युवक कल्याण	12	8	67%	4
39	आदिवासी विकास	35	22	63%	13
40	पर्यावरण	20	12	60%	8
41	माहिती व जनसंपर्क	11	6	55%	5
42	वन	9	4	44%	5
43	इतर मागास बहुजन कल्याण	9	4	44%	5
44	पणन	7	3	43%	4
45	दिव्यांग कल्याण	11	4	36%	7
46	नगर विकास – 2	29	10	34%	19
47	अन्न, नागरी पुरवठा व ग्राहक संरक्षण	6	2	33%	4
48	सामान्य प्रशासन (सेवा)	34	8	24%	26
	एकूण	902	706	78%	196

संपूर्ण प्रगती अहवाल कुठे पाहता येईल?

या प्रगती पुस्तकाचा सविस्तर तपशील आणि प्रत्येक खात्याची टप्प्याटप्प्याने कामगिरी राज्य सरकारच्या अधिकृत संकेतस्थळावर maharashtra.gov.in उपलब्ध आहे.

फडणवीसांचं अभिनंदन व संदेश

फडणवीस म्हणाले, “या संपूर्ण मोहिमेत सर्व विभागांनी केलेली कामगिरी उल्लेखनीय आहे. त्यांचे मन:पूर्वक अभिनंदन करतो. हीच कार्यशैली कायम ठेवून भविष्यातही जनतेच्या अपेक्षा पूर्ण कराव्यात, ही शुभेच्छा देतो.”