अमरावतीतील एका नामांकित रुग्णलयात महिलांच्या वॉर्डमध्ये भीषण आग लागून त्या अग्नितांडवात ३ नवजात बाळांचा होरपळून मृत्यू झाल्यीची घटना ताजी असतानाच छत्रपती संभाजीनगरमध्येही अशीच एक घटना घडल्याचं समोर आलं आहे. शहरातील आकाशवाणी चौक परिसरातील एशियन हॉस्पिटलमध्ये मध्यरात्रीच्या सुमारास भीषण आग लागल्याने एकच खळबळ उडाली. पहाटे पावणे तीनच्या सुमारास हॉस्पिटलच्या लहान मुलांच्या अतिदक्षता विभागात (NICU) आग लागली. विशेष म्हणजे, त्यावेळी NICUमध्ये तब्बल ९ बाळांवर उपचार सुरू होते. सुदैवाने अग्निशमन दल, पोलीस आणि हॉस्पिटल कर्मचाऱ्यांनी तातडीने केलेल्या बचावकार्यामुळे सर्व बाळांसह रुग्णांना सुरक्षित बाहेर काढण्यात यश आलं.

९ बाळांसह ५५ रुग्णांना सुरक्षित स्थळी हलवण्यात आलं

मध्यरात्री अडीच वाजता अचानक आग लागल्याचं लक्षात येताच रुग्णालय प्रशासन, डॉक्टर आणि कर्मचाऱ्यांनी प्रसंगावधान दाखवत सर्व शिशूंना सुरक्षित बाहेर काढले. तर 55 रुग्णांनाही तातडीने हलवण्यात आले. पुढील उपचारांसाठी या नवजात बालकांना घाटी रुग्णालयासह इतर खासगी रुग्णालयात तातडीने हलवण्यात आले. या बाक्या प्रसंगात सर्वांच्या समय सूचकतेने मोठा अनर्थ टळला.

या घटनेची माहिती मिळताच मोठ्या संख्येने रुग्णवाहिका या रुग्णालयासमोर दाखल झाल्या. पोलिसांनीही तातडीने घटनास्थळी धाव घेतली. शिशूंच्या प्रकृतीचे भान राखत त्यांना काळजीपूर्वक इतर रुग्णालयात स्थलांतरीत करण्यात आले. या रुग्णालयातील डॉक्टर, कर्मचारी, रुग्णवाहिका चालक, पोलीस आणि इतर यंत्रणांनी तातडीने बचाव कार्य राबवल्याने अनेकांचे प्राण वाचले.

३० रुग्णवाहिका घटनास्थळी दाखल

बचावकार्याला वेग देण्यासाठी तब्बल ३० रुग्णवाहिका घटनास्थळी दाखल झाल्या होत्या. जवाहरनगर पोलीस तसेच आरसीपीच्या जवानांनीही तातडीने घटनास्थळी धाव घेत मदतकार्याला हातभार लावला. वेळीच मिळालेली आगीची माहिती, अग्निशमन दलाची तत्परता आणि पोलीस, डॉक्टर व हॉस्पिटल कर्मचाऱ्यांच्या समन्वयामुळे मोठी दुर्घटना टळली.नातेवाईकांनी सुटकेचा निश्वास सोडला. सर्व 9 शिशू सुरक्षित असल्याची माहिती रुग्णालय प्रशासनाने दिली. या बालकांवर वैद्यकीय पथकांकडून बारकाईने लक्ष ठेवण्यात येत आहे.

आगीचे नेमकं कारण काय?

ही आग नेमकी कशामुळे लागली याची माहिती अद्याप समोर आलेली नाही. आगीत या विभागाचे नुकसान झाले, त्याविषयीची माहिती अद्याप समोर आलेली नाही. अग्निसुरक्षा व्यवस्थेची पाहणी करण्याचे आणि आगीच्या कारणांचा तपास सुरू करण्यात आला आहे. अमरावतीमधील सरकारी रुग्णालयातील आगीची घटना ताजी असतानाच हा प्रकार समोर आल्यानंतर सर्व हॉस्पिटलचे फायर ऑडिट करण्याची मागणी करण्यात येत आहे.