आठवड्याच्या पहिल्याच दिवशी सोमवारी सकाळी 10 वाजता मध्य रेल्वेमार्गावरील सिग्नल यंत्रणेत प्रचंड मोठा बिघाड झाला आणि मुंबईची लाईफ लाईन बंद पडली ती अद्यापही सुरु झालेली नाही. आता संध्याकाळी ४ वाजून गेले तरी अजूनही रेल्वे सुरुळीत झालेली नाही. मध्य रेल्वे प्रशासनाला हा बिघाड दुरुस्त करता आलेला नाही. त्यामुळे गेल्या पाच तासांपासून मध्य रेल्वेची अप आणि डाऊन दिशेची धीम्या आणि जलद मार्गावरील वाहतूक पूर्णपणे विस्कळीत झाली आहे. यामुळे मध्य रेल्वेच्या प्रवाशांचे प्रचंड हाल होताना दिसत आहेत.
मध्य रेल्वेची वाहतूक सुरळीत होण्यास रात्र होण्याची शक्यता
मध्य रेल्वेमार्गावर सध्या रेल्वे ट्रॅकवर ट्रेन एकापाठोपाठ एक उभ्या आहेत. यामध्ये लांब पल्ल्याच्या एक्स्प्रेस ट्रेनचाही समावेश आहे. सकाळपासून हा खोळंबा झाला आहे. कांजूरमार्ग येथील सिग्नल यंत्रणेच्या केबिनमध्ये आग लागल्याने ठाणे ते विक्रोळी दरम्यान संपूर्ण सिग्नल यंत्रणा ठप्प झाली आहे. सकाळी 10 वाजता मुलुंड ठाणे दरम्यान ओव्हरहेड वायरमध्ये बिघाड झाल्याने वाहतूक ठप्प झाली होती. त्यानंतर कांजूरमार्ग येथील सिग्नल केबिनमध्ये आग लागली आणि ठाणे ते विक्रोळी पर्यंत सिग्नल यंत्रणा बंद झाली. अजून सुमारे तीन ते चार तास इथल्या केबल बदलण्यास लागणार आहे. तर मध्य रेल्वेची वाहतूक सुरळीत होण्यास रात्र होण्याची शक्यता आहे.
अनेक प्रवाशांनी रेल्वे ट्रॅकवर उतरुन पुढचे स्थानक गाठले
सकाळी दहा वाजता सिग्नल केबिनमध्ये आग लागल्यानंतर कांजूरमार्ग रेल्वे स्थानकाच्या पुढील सर्व सिग्नल एका फटक्यात बंद पडले. त्यामुळे मोटरमन्सला लोकल ट्रेन जागेवर थांबवाव्या लागल्या. एक-दोन तास उलटूनही ट्रेन एकाच जागी उभ्या असल्याने अनेक प्रवाशांनी रेल्वे ट्रॅकवर उतरुन पुढचे स्थानक गाठले. येत्या काही तासांमध्ये सिग्नल यंत्रणा सुरळीत होऊन सुरु झाली तरी आतापर्यंतच्या लोकल ट्रेनचे वेळापत्रक पूर्णपणे कोलमडलं आहे. त्यामुळे संध्याकाळी गर्दीच्यावेळी मध्य रेल्वेच्या स्थानकांवर प्रचंड गर्दी होण्याची शक्यता आहे. कालच मध्य रेल्वेमार्गावर मेगाब्लॉक ठेवण्यात आला होता. मात्र, त्याच्या दुसऱ्याच दिवशी इतका मोठा तांत्रिक बिघाड झाल्याने मध्य रेल्वेने मेगाब्लॉकच्या काळात नक्की काय केले, असा सवाल विचारला जात आहे. प्रवाशांकडून मध्य रेल्वेच्या कारभाराविषयी प्रचंड संतापही व्यक्त केला जात आहे.









