भारतीय नौसेनेकडून अरबी समुद्रातील दोन महत्त्वाच्या ऑफशोअर डिफेन्स एरियामध्ये (ODA) मासेमारीवर बंदी घालण्यात आली आहे. या आदेशानुसार MH/BASSEIN आणि NEELAM या समुद्रातील क्षेत्रांना “नो फिशिंग झोन” म्हणून घोषित करण्यात आले आहे. यासंदर्भात महाराष्ट्र राज्य मत्स्यव्यवसाय विभागाकडून अधिकृत शासन निर्णय दिनांक 03/04/2024 रोजी जाहीर करण्यात आला आहे.

या निर्णयामुळे संबंधित क्षेत्रांमध्ये कोणतीही मासेमारी, बोटींची हालचाल किंवा इतर अनधिकृत कृती पूर्णतः बंद करण्यात आली आहे. भारतीय नौसेनेच्या सूचनेनुसार या क्षेत्रात नौदलाचे प्रशिक्षण, सुरक्षा आणि सामरिक ऑपरेशन्स होत असल्याने, राष्ट्रीय सुरक्षेच्या दृष्टीने हा निर्णय अत्यावश्यक होता.

प्रतिबंधित क्षेत्रांचे निर्देशांक:

1. MH/BASSEIN ODA

18°31′45″N, 072°09′40″E

18°32′04″N, 071°09′08″E

19°46′49″N, 072°11′27″E

19°46′42″N, 072°11′36″E

2. NEELAM ODA

18°49′11″N, 072°10′00″E

18°49′03″N, 072°25′13″E

18°09′59″N, 072°25′13″E

18°10′00″N, 072°10′00″E

—

शासन निर्णयातील महत्त्वाचे मुद्दे:

1. ODA क्षेत्रामध्ये कोणतीही मासेमारी करण्यास सक्त मनाई आहे. मासेमारी केल्यास नुकसान झाल्यास त्याची जबाबदारी संबंधित मच्छीमार, ट्रॉलर चालकांवर असेल.

2. मासेमारीदरम्यान बोटींमधून एखाद्या पाकिस्तानी मरीन सिक्युरिटी यंत्रणेकडून वापरली जाणारी यंत्रणा मिळाल्यास त्याची तातडीने माहिती द्यावी.

3. मच्छीमार बंधूंनी सागरी सुरक्षेबाबत अधिक दक्षता बाळगावी. मासेमारीसाठी बोटी पाठवताना योग्य ती माहिती मत्स्यव्यवसाय विभागात नोंदवावी.

—

सूचना:

या निर्णयाची माहिती सर्व मच्छीमार संघटना, सहकारी संस्था, ट्रॉलर मालक, नौका मालक, आणि स्थानिक पोलिस यंत्रणांना देण्यात आली असून, आदेशाचे काटेकोर पालन करण्याचे आवाहन करण्यात आले आहे.

शासन निर्णयावर आयुक्त मत्स्यव्यवसाय, महाराष्ट्र राज्य किशोर तावडे यांच्या स्वाक्षरीने शिक्कामोर्तब करण्यात आले आहे.