अन्न व औषध प्रशासन विभागाचे आयुक्त तुकाराम मुंढे यांच्या एफडीए विभागाकडून कारवाया धडाका सुरूच आहेत. आता मुंबईतील दहिसर आणि मालाडमध्ये दोन मोठ्या कारवाया करण्यात आल्या आहेत. मुंबई पोलिसांच्या गुन्हे शाखेकडून दहीसर येथे बनावट दूध कारखान्यावर छापा टाकण्यात आला. तसेच अमूल, गोकुळसारख्या नामांकित कंपन्यांच्या नावाने बनावट दूध विक्रीचा पर्दाफाश करण्यात आला आहे. तर, मालाडमध्ये ब्लिकिंट कमर्शिअलच्या गोदामावर अन्न व औषध प्रशासनाने धडक कारवाई करण्यात आली आहे. तसेच त्यांचा परवाना तात्काळ निलिंबत करण्यात आला आहे.

दूध तयार करणाऱ्या टोळीवर धाड 

एफडीएकडून मुंबईच्या दहिसर पूर्व परिसरातील बनावट दूध तयार करणाऱ्या टोळीवर गुन्हे शाखा कक्ष-१२ ने कारवाई केली आहे. नामांकित कंपन्यांच्या दूध पिशव्या कापून त्यातील दूध काढून अस्वच्छ पाणी मिसळले जात होते, त्यानंतर पिशव्या पुन्हा सील करून अस्सल दूध असल्याचे भासवून विक्रीची तयारी केली जात होती. याप्रकरणी, कारवाईत 4 पुरुष आरोपींना अटक करण्यात आले आहे.

ब्लिंकिटच्या गोदामावर धाड, मोठी कारवाई

मुंबईतील मालाड परिसरातील Blink Commerce Pvt. Ltd. च्या गोदामावर अन्न व औषध प्रशासनाने धडक कारवाई केली आहे. 7 ऑगस्ट 2026 रोजी FDA अधिकाऱ्यांकडून गोदामाची तपासणी करण्यात आली. तपासणीदरम्यान गोदामात अत्यंत अस्वच्छ परिस्थिती आढळून आली.अन्न सुरक्षेसाठी अनिवार्य असलेल्या FIFO आणि FEFO या मानक पद्धतींचा वापर साठवणुकीदरम्यान केला जात नव्हता. गोदामात अन्नपदार्थांची हाताळणी करणाऱ्या कर्मचाऱ्यांची आवश्यक वैद्यकीय तपासणी करण्यात आली नव्हती, तसेच त्याबाबतची कोणतीही नोंद उपलब्ध नव्हती. कचऱ्याची योग्य विल्हेवाट, दैनंदिन स्वच्छता आणि देखभालीमध्ये अनेक त्रुटी निदर्शनास आल्या.

झुरळांचा वावर अन् कीटक व उंदीर, बरीच अस्वच्छता

भाजीपाला आणि फळांच्या साठवणुकीच्या ठिकाणी मोठ्या प्रमाणावर झुरळांचा वावर आढळला. यामुळे अन्नपदार्थ दूषित होऊन ग्राहकांच्या आरोग्याला गंभीर धोका निर्माण होण्याची शक्यता निर्माण झाली होती. कीटक व उंदीर नियंत्रणासाठी कोणतीही प्रभावी यंत्रणा तिथे कार्यरत नव्हती. गोदामात अत्यंत अस्वच्छ परिस्थिती होती. थेट जमिनीवर अन्नपदार्थ ठेवण्यात आले होते, तसेच कोल्ड स्टोरेजची नियमित स्वच्छता केली जात नव्हती. कोल्ड रूमसह गोदामाच्या विविध भागांत मुदतबाह्य झालेले आणि खराब झालेले पॅकबंद अन्नपदार्थ साठवून ठेवण्यात आले होते.

FDA ची कडक कारवाई आणि इशारा

दरम्यान,या सर्व गंभीर बाबींची दखल घेत अन्न व औषध प्रशासनाने अन्न सुरक्षा आणि मानके कायदा, 2006 नुसार तसेच संबंधित नियमांनुसार तात्काळ कारवाई केली आहे. परवाना निलंबित करण्यात आल्यामुळे या गोदामातून कोणत्याही प्रकारच्या अन्नपदार्थांची विक्री, पुरवठा किंवा वितरण करण्यास पूर्णपणे मनाई करण्यात आली आहे. तसेच पुढील तपासणीत अनधिकृतपणे व्यवसाय सुरू असल्याचे आढळल्यास संबंधितांवर कायद्यानुसार कठोर कारवाई करण्याचा इशारा FDA कडून देण्यात आला आहे.