मुंबईतील विलेपार्ले पश्चिम येथील एका निवासी इमारतीच्या ११व्या मजल्यावर मंगळवारी दि.११ ऑगस्ट २०२६ रोजी रात्री भीषण आग लागल्याची घटना समोर आली आहे. या दुर्घटनेत अवघ्या अडीच वर्षांच्या चिमुकल्यासह दोन जणांचा मृत्यू झाला असून, सहा जण जखमी झाल्याची माहिती मिळतेय. सुमारे तीन तासांच्या अथक प्रयत्नांनंतर अग्निशमन दलाने रात्री १ वाजण्याच्या सुमारास आग पूर्णपणे विझवण्यात यश आलं आहे.

इमारतीच्या ११व्या मजल्यावर आग

विलेपार्ले पश्चिम येथील बाप्टिस्टा मार्गावर सेंट झेवियर्स स्कूलजवळ असलेल्या शांता भवन या तळमजला अधिक १२ मजली इमारतीत ही घटना घडली. मंगळवारी रात्री सुमारे १० वाजता इमारतीच्या ११व्या मजल्यावर आग लागल्याची माहिती मुंबई अग्निशमन दलाला मिळाली.

आगीची तीव्रता प्रचंड होती. अग्निशमन दलासह पोलीस, वीज वितरण कंपनी, १०८ रुग्णवाहिका सेवा आणि मुंबई महापालिकेच्या संबंधित विभागातील कर्मचाऱ्यांना घटनास्थळी पाचारण करण्यात आले.

घरातील साहित्य आणि स्वयंपाकघरातील वस्तू सर्व जळून खाक

अग्निशमन दलाच्या माहितीनुसार, ११व्या मजल्यावरील ११०१ आणि ११०२ क्रमांकाच्या फ्लॅटमध्ये सुमारे ४ हजार चौरस फुटांच्या परिसरात आग पसरली होती. इलेक्ट्रिक वायरिंग आणि इतर विद्युत उपकरणांसह एसी, सोफा, बेड, फॉल्स सीलिंग, घरातील साहित्य आणि स्वयंपाकघरातील वस्तू आगीच्या भक्ष्यस्थानी पडल्या. अग्निशमन दलाने बचावकार्य करत बाधित नागरिकांना बाहेर काढले आणि जखमींना जवळच्या रुग्णालयात दाखल करण्यात आलं आहे.

I’m hoping everyone in the building in Vile Parle is safe. I really appreciate the Mumbai Police, fire brigade, ambulance services, and everyone who rushed to help. They didn’t waste a second. Praying everyone is safe. 🙏🏻 #vileparle #mumbai #firedepartment pic.twitter.com/69qY4FWzXj

— Divyani Upadhyay (@diiivvvaaaaa310) August 11, 2026

दुर्घटनेत अडीच वर्षांच्या चिमुकल्यासह एकाचा मृत्यू

या दुर्घटनेत अडीच वर्षांचा अबीर आणि २३ वर्षीय अंकिता यांना रुग्णालयात दाखल करण्यापूर्वीच मृत घोषित करण्यात आले. जखमींपैकी पार्थ (३२) आणि हिरेन (६४) यांची प्रकृती स्थिर असल्याची माहिती अधिकाऱ्यांनी दिली. यशस्वी (३३) आणि अभिषेक यांच्यावर उपचार करून त्यांना रुग्णालयातून घरी सोडण्यात आलं.

बचावकार्यादरम्यान अग्निशमन दलाचे जवान मनोज सोनावणे (३०) आणि शिवम द्विवेदी (२९) हेही जखमी झाले होते. त्यांच्यावर कूपर रुग्णालयात उपचार करण्यात आले आणि त्यानंतर दोघांनाही घरी सोडण्यात आलं.

तीन तासांच्या प्रयत्नानंतर आग पूर्णपणे विझवण्यात यश

अग्निशमन दलाकडून जवळपास तीन तास आग विझवण्याचे प्रयत्न सुरू होते. अखेर बुधवारी मध्यरात्री १ वाजण्याच्या सुमारास आग पूर्णपणे विझवण्यात यश मिळालं. दरम्यान,आग नेमकी कशामुळे लागली, हे अद्याप स्पष्ट झालेलं नाही. सविस्तर तपासानंतर आगीचं नेमकं कारण समोर येईल, अशी माहिती अधिकाऱ्यांनी दिली आहे.