छत्रपती संभाजीनगर येथे बीपीसी मुख्यालयातील टपाल कर्मचाऱ्यांवर काहींनी कार्यालयात घुसून त्यांच्यावर हल्ला केल्याची धक्कादायक घटना समोर आली आहे. याप्रकरणी सिटी चौक पोलीस ठाण्यात तक्रार दाखल करण्यात आली असून, आरोपींवर तात्काळ व कठोर कारवाई करण्याची ठाम मागणी टपाल कर्मचारी संघटनेने केली आहे.

कार्यालयात धुडगूस आणि शिवीगाळ

मिळालेल्या माहितीनुसार, बीपीसी मॅनेजर भरत गुंजेवटे आणि अनिल वारोडे हे कार्यालयात कार्यरत असताना, रोजंदारीवर कामावर असलेल्या दोन महिलांनी काही गुंड प्रवृत्तीच्या व्यक्तींना सोबत आणून कार्यालयात प्रवेश केला. त्यांनी कर्मचाऱ्यांना अश्लील शिवीगाळ करत धक्काबुक्की केली आणि शासकीय कामकाजात मोठा अडथळा निर्माण केला.

रस्त्यात अडवून अमानुष मारहाण

घटना एवढ्यावरच थांबली नाही. कामकाज संपवून घरी परतत असताना भरत गुंजेवटे यांना रस्त्यात अडवण्यात आले. गुंजेवटे हे दोन्ही पायांनी दिव्यांग असतानाही, त्यांना वाहनातून बाहेर ओढून मारहाण करण्याचा प्रयत्न झाला. त्यांना वाचवण्यासाठी मदतीला धावलेले सहकारी रंजीत पाटील यांनाही गुंडांनी लाथाबुक्क्यांनी गंभीर मारहाण केली. या हल्ल्यात रंजीत पाटील जखमी झाले आहेत.

पोलीस ठाण्यात रात्रभर ठिय्या; संघटनेचा इशारा

या घटनेची माहिती मिळताच टपाल कर्मचारी संघटनेचे पदाधिकारी आणि कर्मचारी आक्रमक झाले. दोषींवर गुन्हे दाखल व्हावेत यासाठी संघटनेच्या पदाधिकाऱ्यांनी मध्यरात्री पावणेदोन वाजेपर्यंत सिटी चौक पोलीस ठाण्यात उपस्थित राहून प्रशासनाकडे दाद मागितली.

शासकीय कार्यालयात घुसून कर्मचाऱ्यांवर दादागिरी करणे आणि दिव्यांग कर्मचाऱ्याला रस्त्यात अडवून मारहाण करणे अत्यंत निंदनीय आहे. टपाल कर्मचाऱ्यांच्या सुरक्षेशी कोणतीही तडजोड केली जाणार नाही. पोलिसांनी या प्रकरणाची सखोल चौकशी करून सर्व दोषींवर तात्काळ कठोर कायदेशीर कारवाई करावी, अशी मागणी कर्मचारी संघटनेने केली आहे.