अमोल भालेराव
महाराष्ट्राच्या अन्न व औषध प्रशासनाचे आयुक्त तुकाराम मुंढेंचं नाव काढलं की सर्वांचेच धाबे चांगलेच दणाणतात. गेल्या काही दिवसांत त्यांनी राज्यभरात दुकान, हॉटेल आणि औषध बनवणाऱ्या कंपन्यांवर धडाधड धाडी टाकल्या आहेत. तुकाराम मुंढेच्या या कामगिरीमुळे सामान्य जनता त्यांच्यावर कौतुकाचा वर्षाव करत आहे. तर अनेक जण स्वत:हून त्यांना त्यांच्या शहरात येऊन सुरु असलेल्या गैरप्रकाराबाबत चौकशी करण्याची विनंती करत आहेत. FDA मार्फत तक्रारीसाठी टोल फ्रि नंबर्सही देण्यात आले आहेत.अशीच एक गंमतीशीर तक्रार तुकाराम मुंढेंपर्यंत आली आहे. एका लहानग्या चिमुकल्याने तुकाराम मुंढे यांना आपल्या गावात येण्याची विनंती केली आहे ज्याचा व्हिडिओ सोशल मीडियावर मोठ्या प्रमाणात व्हायरल होत आहे.
लहानग्या चिमुकल्याने तुकाराम मुंढेंकडे मजेशीर तक्रार
एका लहान मुलाचा एक मजेशीर व्हिडीओ समोर आला आहे. त्याने मुंढेंना दात घासण्यासाठी जी मशेरी लावली जाते ती बंद करण्याची विनंती केली आहे. त्याने म्हणटलं आहे , “या गावातल्या बायका तोंडामध्ये मशेरी भरतात आणि गावभर लोकांची मापं काढत फिरत असतात.”अशी तक्रार त्याने केली आहे. हा व्हिडीओ काही वेळातच सोशल मीडियावर प्रचंड व्हायरल झाला आहे.
बायका तोंडामध्ये बुकणा भरतात मिसरीचा अन्…
हा व्हिडीओ namdev.patil.5015 या इन्स्टाग्रामवरुन शेअर करण्यात आला आहे. यात हा चिमुकला मजेशीर अंदाजात म्हणताना दिसत आहे की, “तुकाराम मुंढे साहेब… त्या मिसरीकडे सुद्धा लक्ष द्या. अहो, या बायका तोंडामध्ये बुकणा भरतात मिसरीचा आणि मग सगळ्या गावाची मापं काढत बसतात,” या मजेशीर अंदाजात त्याने व्हिडिओ शूट केला आहे आणि सोशल मीडियावर शेअर केला आहे.
View this post on Instagram
मशेरी किंवा मिसरी म्हणजे काय?
तंबाखू भाजून त्याची पावडर तयार केली जाते. नंतर या पावडरचा वापर दात घासण्यासाठी केला जातो. या पावडरला ग्रामीण भाषेत मशेरी किंवा मिसरी असे गावकरी म्हणतात. वर्षानुवर्षे गावकरी काही लोक किंवा वृद्ध मंडळी टूथपेस्टऐवजी मशेरीने दात घासतात. पण वैद्यकीय तज्ज्ञांच्या मते, तंबाखूजन्य पदार्थांनी दात घासणं हे आरोग्यासाठी योग्य नाही. याचा विपरीत परिणाम शरीरावर होतो.
व्हिडीओ सोशल मीडियावर प्रचंड व्हायरल
या अवघ्या 30 सेकंदांच्या व्हिडीओवर आतापर्यंत हजारोंच्या घरात प्रतिक्रिया आल्या आहेत. कोणी म्हणतंय, “मुंढे साहेब, या मुलाच्या तक्रारीकडे तातडीनं लक्ष द्याची गरज आहे.” तर कोणी म्हणतंय, “बाळा, उगाच नको ती तक्रार करू नकोस नाहीतर गावातील बायका लाटणं घेऊन तुझ्याच मागे लागतील.” एकंदरीत हा व्हिडीओ अगदीज सर्वाच्या पसंतीस पडला आहे.
