प्रवास करताना हॉटेलमध्ये कुठे राहण्याची व्यवस्था करत असून तेव्हा नक्कीच आपण सगळेचजण आधी पाहतो ती सुरक्षा. कुठे छुपे कॅमेरे वैगरे नाही ना याची दक्षता घेऊनच आपण तिथे राहतो. पण हा असा काही प्रकार आपल्या घरी घडला तर… होय, अकोला शहरातून एक धक्कादायक प्रकार समोर आला आहे. एका कारपेंटरने घरांमध्ये फर्निचरचे काम करताना चक्क बेडरूम आणि बाथरूममध्ये छुपे कॅमेरे बसवले.एवढंच नाही तर महिलांचे खासगी व्हिडीओ तयार करून लैंगिक छळ करण्यात आल्याचा प्रकार समोर आला आहे.या घटनेने नागरिकांमध्ये संताप उसळला असून आरोपीला कठोर शिक्षा करण्याची मागणी होत आहे. याप्रकरणी या कारपेंटरला पोलिसांनी ताब्यात घेतले आहे.

प्रत्येक घरात त्याने छुपा कॅमेरा बसवला होता

मिळालेल्या माहितीनुसार, मोतीऊर रहेमान शेख असे आरोपीचे नाव असून तो पश्चिम बंगालचा रहिवासी आहे. अकोल्यातील एका प्रतिष्ठित सोसायटीमध्ये मोतीऊरने घरातील कामे करण्याच कॉन्ट्रॅक्ट घेतलं. मात्र त्याच्या डोक्यात सुरु असलेल्या हैवानी कृत्याबाबत रहिवाशांना कधीच संशय आला नाही. अनेक सोसायट्यांमध्ये त्याची कामे सुरु होती. तो ज्या घराची कामे करत होता, त्या प्रत्येक घरात त्याने छुपा कॅमेरा बसवला होता. या कॅमेऱ्यामधून त्याने अनेक महिलांचे खासगी व्हिडीओ तयार केले.

व्हिडिओचा गैरफायदा घेत महिलांना धमकवलं

आरोपी इतक्यावरच थांबला नाही तर त्याने या व्हिडिओचा गैरफायदा घेत महिलांना धमकवलं. त्यांच्यावर दबाव टाकून लैंगिक छळ करण्यात आले. अकोल्यातील एका प्रतिष्ठित सोसायटीमध्ये हा प्रकार उघडकीस आल्यानंतर नागरिकांनी संबंधित कारपेंटरला पकडून पोलिसांच्या ताब्यात दिले. पोलिसांनी आरोपीकडील दोन मोबाइल जप्त केले असून, त्यामध्ये महिलांचे आक्षेपार्ह व्हिडीओ आढळली आहे. काही व्हिडीओमध्ये पती-पत्नीच्या खासगी क्षणांचे चित्रीकरण असल्याची माहितीही मिळत आहे. हा प्रकार समोर आल्यानंतर संतप्त नागरिकांनी आरोपीला मारहाण केली.

पोलिसांनी जप्त केलेल्या मोबाइलमधील व्हिडीओ, फोटो आणि इतर डिजिटल पुराव्यांची तपासणी सुरू केली

प्राथमिक तपासात चार महिला आणि एका २२ वर्षीय युवतीचे लैंगिक शोषण केल्याचा संशय पोलिसांकडून व्यक्त करण्यात आला आहे. या प्रकरणातील एका ३० वर्षीय महिलेने जुने शहर पोलीस ठाण्यात तक्रार दाखल केल्यानंतर आरोपीविरोधात गुन्हा नोंदवण्यात आला. पोलिसांनी जप्त केलेल्या मोबाइलमधील व्हिडीओ, फोटो आणि इतर डिजिटल पुराव्यांची तपासणी सुरू केली आहे. आरोपीने अशाच पद्धतीने आणखी किती महिलांचे व्हिडीओ तयार केले आहेत, तसेच त्यांचा धमकावून किंवा दबाव टाकून छळ केला आहे का, याचा तपास पोलीस करत आहेत. छुप्या कॅमेऱ्यांचा प्रकार समोर आल्यानंतर सोसायटी परिसरात मोठी खळबळ उडाली आहे.