मुंबई पश्चिम उपनगरातील आरे मेट्रो स्टेशनखाली एका खाजगी बसला अचानक आग लागल्याचा व्हिडिओ समोर आला आहे. गोरेगाव पूर्वेला असलेल्या आरे मेट्रो स्थानकाखाली महादेव ट्रॅव्हल्स  कंपनीच्या स्लीपर कोच बसला ही आग लागली. ६.१५ वाजता हा प्रकार घडल्याचं सांगितलं जात आहे.

आरे मेट्रो स्टेशनच्या खाली एका बेस्ट बसला अचानक भीषण

मुंबईतील पश्चिम द्रुतगती महामार्गावर गोरेगाव येथे एक अत्यंत थरारक अशी घटना घडली आहे. आरे मेट्रो स्टेशनच्या अगदी खाली उभ्या असलेल्या एका बेस्ट बसला अचानक भीषण आग लागल्याची घटना घडली आहे. महादेव ट्रॅव्हल्स कंपनीच्या स्लीपर कोच बसला ही आग लागल्याची माहिती समोर आली आहे. या आगीने अवघ्या काही मिनिटांत रौद्ररूप धारण केलं अन् संपूर्ण बेस्ट बस जळून खाक झाली आहे.

आगीचे लोळ आणि धुराचे प्रचंड लोट थेट वर मेट्रो स्टेशनपर्यंत

आगीचे लोळ आणि धुराचे प्रचंड लोट थेट वर असणाऱ्या मेट्रो स्टेशनपर्यंत येत असल्यानं परिसरात एकच गोंधळ आणि भीतीचे वातावरण निर्माण झालं.
सुदैवाने या दुर्घटनेत कोणतीही जिवितहानी झाल्याचे वृत्त नाही. मात्र या अपघातात बस पूर्णपणे जळून खाक झाल्याचं बोललं जात आहे.

A private bus caught fire… Goregaon East, Mumbai.

Video – Whatsapp https://t.co/5TMrp9TLqH pic.twitter.com/FUtJIy13gy

— Jabar (@UKwaleBaba) September 4, 2026

मेट्रो प्रशासनाने तात्काळ पावले उचलली

मेट्रो लाईन 7 वर धुराचे साम्राज्य पसरल्यामुळे प्रवाशांच्या सुरक्षेचा उपाय म्हणून मेट्रो प्रशासनाने तात्काळ पावले उचलली. मेट्रो सेवा सुरू असली, तरी जोपर्यंत धूर पूर्णपणे कमी होत नाही, तोपर्यंत खबरदारी म्हणून दोन प्रमुख मेट्रो स्थानकांवर मेट्रोचा थांबा दिला जाणार नसल्याचे प्रशासनाकडून स्पष्ट करण्यात आले आहे.

अपघातात बस पूर्णपणे जळून खाक झाली

घटनेची माहिती मिळताच अग्निशमन दलाच्या गाड्या तात्काळ घटनास्थळाकडे रवाना झाल्या आहेत. आगीवर नियंत्रण मिळवण्याचे काम वेगाने सुरू झालं. अखेर बसला लागलेली आग सध्या विझवण्यात आली आहे. या घटनेत कोणीही जखमी झालेलं नाही, मात्र या अपघातात बस पूर्णपणे जळून खाक झाली आहे. शॉर्ट सर्किटमुळे ही आग लागली असल्याचे प्राथमिक तपासात समोर आले आहे. बसमध्ये शॉर्टसर्कीट झाल्याचे लक्षात येतात चालकाने ही बस वेस्टर्न एक्सप्रेस हायवेवर एका बाजूला लावली, त्यामुळे मोठी दुर्घटना टळल्याचे म्हटले जात आहे. ही महादेव ट्रॅव्हल नावाची ही बस स्लिपर बस आहे. सध्या घटनास्थळी पोलीस दाखल झाले असून आग नेमकी कशी लागली, का लागली या सर्व बाबींचा पोलीस तपास करत आहेत.

दरम्यान, पश्चिम द्रुतगती महामार्गावर ऐन वर्दळीच्या ठिकाणी बस जळाल्यामुळे आणि सुरक्षेच्या कारणास्तव वाहने थांबवण्यात आल्यामुळे महामार्गावर दोन्ही बाजूने प्रचंड वाहतूक कोंडी निर्माण झाली आहे. पोलीस आणि वाहतूक पोलीस वाहतूक सुरळीत करण्याचे प्रयत्न करत आहेत.