सिंधुदुर्ग जिल्ह्यात श्रावण महिन्यात मुसळधार पाऊस नसला, तरी शेतीकामांसाठी अत्यंत पूरक आणि समाधानकारक असा पाऊस पडत आहे. संपूर्ण जिल्ह्यात शेतीच्या कामांना वेग आला असून वातावरण उत्साहवर्धक आहे. मात्र, याच दरम्यान भुईबावडा घाट क्षेत्रातून एक चिंताजनक बातमी समोर आली आहे. खारेपाटण-तिथवली-भुईबावडा-गगनबावडा या राज्य महामार्ग १७१ वर किलोमीटर ३१.१५० दरम्यान अचानक मोठी दरड कोसळली असून, महामार्गावरील वाहतूक पूर्णपणे ठप्प झाली आहे.

घाटातील वाहतूक पूर्णपणे ठप्प; जेसीबी घटनास्थळी रवाना

दरड कोसळून मोठा माती व दगडांचा ढिगारा थेट मुख्य रस्त्यावर आल्याने या मार्गावरून होणारी वाहतूक तात्पुरत्या स्वरूपात पूर्णपणे बंद करण्यात आली आहे. घटनेचे गांभीर्य ओळखून जिल्हा आपत्कालीन व्यवस्थापन कक्षाने तातडीने हालचाली सुरू केल्या आहेत. रस्ता लवकरात लवकर मोकळा करून वाहतूक पूर्ववत करण्यासाठी जेसीबी आणि आपत्कालीन पथक घटनास्थळी दाखल होत आहे. ढिगारा हटवून मार्ग सुरक्षित करण्याचे काम प्राधान्याने केले जात आहे.

जिल्ह्यात सरासरी ३१.३७ मिमी पावसाची नोंद

एकीकडे वाहतुकीचा खोळंबा झाला असला, तरी दुसरीकडे हा पाऊस शेतकऱ्यांसाठी अत्यंत उपयुक्त ठरत आहे. जिल्ह्यात गेल्या २४ तासांत सरासरी ३१.३७ मिमी पावसाची नोंद झाली आहे.

तालुकानिहाय पावसाची आकडेवारी किती ते पाहुयात

देवगडमध्ये ५० मिमी पावसाची नोंद झाली आहे. कणकवलीमध्ये ४९ मिमी पावसाची नोंद झाली आहे. वैभववाडीमध्ये ३७ मिमी पावसाची नोंद तर ,कुडाळमध्ये ३६ मिमी पाऊस झाला. सावंतवाडी ३१ मिमी आऊस झाला तर, दोडामार्ग येथे २९ मिमी पाऊस झाला आहे. वेंगुर्ला ११ मिमी पावसाची नोंद झाली आहे तर, मालवणमध्ये ०८ मिमी पावसाची नोंद झाली आहे.

प्रशासनाचे वाहनधारकांना आवाहन

भुईबावडा घाट मार्गावरून प्रवास करणाऱ्या सर्व वाहनधारकांनी योग्य ती खबरदारी बाळगावी. रस्ता पूर्णपणे साफ होऊन सुरक्षित घोषित होईपर्यंत या मार्गाचा वापर टाळावा आणि प्रशासनाला सहकार्य करावे, असे आवाहन जिल्हा आपत्कालीन व्यवस्थापनाकडून करण्यात आले आहे.