खारघर सेक्टर १९ येथील एका झेरॉक्स दुकानात भाजपच्या एका कार्यकर्त्याकडे मोठ्या प्रमाणात ओरिजनल SIR फॉर्म आढळून आल्याची माहिती समोर आली आहे. ही घटना खरोखरच सर्वसामान्य जनतेच्या विश्वासाला काळिमा फासणारी आहे . भाजप कार्यकर्त्याकडे जवळपास ५०० ते १००० ओरिजनल फॉर्म आढळून आल्याचं म्हटलं जात आहे.

SIR चे अर्ज खारघरमधील एका झेरॉक्स दुकानात आढळल्याने खळबळ 

मतदार याद्यांच्या विशेष सखोल तपासणी म्हणजे एसआयआर प्रक्रिया सुरू असतानाच गुरूवारी पनवेल विधानसभा मतदारसंघातील एसआयआर अर्ज खारघरमधील एका झेरॉक्स दुकानात आढळल्याने राजकीय वाद निर्माण झाला आहे. हे अर्ज खासगी व्यक्तींकडे कसे पोहोचले, असा सवाल शिवसेना (उद्धव बाळासाहेब ठाकरे) पक्षाच्या पदाधिकाऱ्यांनी उपस्थित केले आहेत. समाजमाध्यमांवर याबाबत एक ध्वनीचित्रफीती पोस्ट करत त्याद्वारे या घटनेबाबत आता प्रश्न विचारण्यात आले आहेत.

अर्ज १७ ऑगस्ट रोजी अपलोड करण्यात आले होते

परंतू, हे अर्ज १७ ऑगस्ट रोजी अपलोड करण्यात आले असून, बीएलओंनी ते झेरॉक्स काढण्यासाठी दुकानात ठेवले होते का, याची चौकशी करून खुलासा घेतला जाईल, असे पनवेलचे प्रांताधिकारी पवन चांडक यांनी स्पष्ट केले.

SIR मोहिमेच्या पारदर्शकतेवरच आता गंभीर प्रश्नचिन्ह

मात्र या प्रकारानंतर खारघरमध्ये SIR मोहिमेच्या पारदर्शकतेवरच आता गंभीर प्रश्नचिन्ह निर्माण झालं आहे. भाजप कार्यकर्त्यांच्या हाती SIR मोहिमेचे फॉर्म असल्याचं नागरिकांनीच रंगेहात पकडल्याचा दावा करणाऱ्या या व्हिडीओमुळे आता निवडणूक आयोगाची कथित पारदर्शक SIR मोहीम नेमकी कोणाच्या हातात चालतेय, असा सवाल जनतेतून तसेच विरोधी पक्षाकडून उपस्थित करण्यात येत आहे.

आमदार रोहित पवार यांनी देखील दिली प्रतिक्रिया

तसेच या कथित प्रकारानंतर राष्ट्रवादी काँग्रेसचे आमदार रोहित पवार यांनी देखील प्रतिक्रिया दिली आहे. SIR मोहीम फसवी आणि नावापुरतीच राबवली जातेय का? असा सवालही राष्ट्रवादी काँग्रेसचे आमदार रोहित पवार उपस्थित केला आहे. ही बाब अत्यंत गंभीर असून, लोकशाही प्रक्रिया व नागरिकांच्या हक्कांच्या दृष्टीने सर्वांनी जागरूक राहणं किती गरजेचं आहे हे या प्रकारावरून नक्कीच लक्षात येतं असंही ते म्हणाले.

निवडणूक आयोग आणि भाजप असा राजकीय संघर्ष पेटण्याची शक्यता 

दरम्यान खारघरमधील या घटनेमुळे आता SIR मोहीम विरुद्ध निवडणूक आयोग आणि भाजप असा नवा राजकीय संघर्ष पेटण्याची शक्यता आहे. तसेच सदर सर्व फॉर्म घेऊन संबंधित व्यक्ती व नागरिक खारघर पोलीस स्टेशन येथे उपस्थिती लावण्यास सांगण्यात आलं आहे. या प्रकरणाची सत्यता व संपूर्ण माहिती पोलीस तपासातून समोर येईलच.

या कथित प्रकाराची निवडणूक आयोग दखल घेणार का?

पण आता खारघरमधील या कथित प्रकाराची निवडणूक आयोग दखल घेणार का? यातील सत्य बाजू काय हे जनतेसमोर आणलं जाणार का? तसेच या प्रकारात जर तथ्य आढळलं तर भाजप कार्यकर्त्यांवर कारवाई होणार का? आणि SIR मोहिमेतील फॉर्म राजकीय कार्यकर्त्यांच्या हातात कसे पोहोचले, याचा खुलासा होणार का? हे पाहणं महत्त्वाचं ठरणार आहे.