नाशिकमील भोंदूबाबा अशोक खरात प्रकरणाने राज्यभरात खळबळ उडाली आहे.त्याने भक्तीच्या नावाखाली अनेक महिलांचे शोषण करुन त्यांच्या अत्याचार केले. त्याबाबतचे अशोक खरातचे अनेक व्हिडीओ समोरही आले.त्यानंतर अशोक खरातला अटक करण्यात आली. गेल्या पाच महिन्यांपासून तुरुंगात असलेल्या अशोक खरात प्रकरणी आज मोठी सुनावणी होणार आहे. खरातच्या जामीन अर्जावर सुनावणी होणार आहे. त्यामुळे आता याकडे सर्वांचे लक्ष लागले आहे.

भोंदू अशोक खरात प्रकरणी आज मोठा निर्णय होणार 

या प्रकरणाबाबत नवनवीन माहिती समोर येतच आहे. अशोक खरात प्रकरणात तपासाला वेग आल्याचे पाहायला मिळत आहे. अनेक नवनवीन खुलासे चौकशीतून समोर येत आहेत. याच पार्श्वभूमीवर आज भोंदू अशोक खरातच्या जामीन अर्जावर सुनावणी पार पडणार आहे. नाशिक जिल्हा व सत्र न्यायालयात ही महत्त्वाची सुनावणी होणार असून लैंगिक अत्याचार आणि आर्थिक फसवणुकीच्या गंभीर आरोपांप्रकरणी अशोक खरात सध्या कारागृहात आहे. त्याच्याविरोधात नाशिक शहर, नाशिक ग्रामीण आणि अहिल्यानगर जिल्ह्यात मिळून एकूण १७ गुन्हे दाखल आहेत. यापैकी १२ गुन्ह्यांचा तपास विशेष तपास पथकाकडे (SIT) सोपवण्यात आला आहे.

आज होणार कोर्टात सुनावणी

नाशिक जिल्हा व सत्र न्यायालयात अशोक खरात प्रकरणात सुनावणी होणार आहे. आजच्या सुनावणीत सरकार पक्षाकडून विशेष सरकारी वकील ॲड. उज्ज्वल निकम बाजू मांडणार आहेत. अशोक खरात प्रकरणात ॲड. निकम पहिल्यांदाच सरकार पक्षाची बाजू मांडणार आहेत. सरकारने त्यांची विशेष सरकारी वकील म्हणून जून महिन्यात नियुक्ती केली होती. तपास यंत्रणेकडून पुरावे आणि साक्षीदारांची माहिती न्यायालयासमोर सादर करण्यात येणार आहे.

जामीन अर्जाला जोरदार विरोध होण्याची शक्यता

सरकार पक्षाकडून खरातच्या जामीन अर्जाला जोरदार विरोध होण्याची शक्यता आहे. दोन्ही बाजूंचा युक्तिवाद ऐकल्यानंतर न्यायालय जामीन अर्जावर निर्णय घेणार आहे. पीडितांसह नाशिककर आजच्या सुनावणीच्या निष्कर्षाबाबत सर्वांनाच उत्सुकता आहे.

खरातचे तुरुंगात विचित्र चाळे

अशोक खरातच्या या विचित्र वागण्यामुळे पोलीस यंत्रणाही थक्क झाली आहे. कोठडीत बसून मंत्रजप करणे, विचित्र पुटपुटणे आणि स्वतःच्या कृत्यांचे दैवी विधी म्हणून समर्थन करणे, यावरून तो पोलिसांची दिशाभूल करण्याचा प्रयत्न करत असल्याचे स्पष्ट होत आहे. मात्र, नाशिक पोलिसांनी तसेच एसआयटीने त्याचा कसून तपास सुरुच ठेवला आहे.

दरम्यान आज सोमवारच्या सुनावणीत दोन्ही बाजूंचा युक्तिवाद ऐकल्यानंतर न्यायालय जामीन अर्जाबाबत काय निर्णय घेते, याकडे पीडितांसह नाशिककरांचे लक्ष लागले आहे.