उदगीर शहरातील कार्यालयाबाहेर एका व्यक्तीने लघवी केल्याचा व्हिडीओ सोशल मीडियावर व्हायरल

लातूर / उदगीर

महानगरपालिका निवडणुकांनंतर आता जिल्हा परिषद निवडणुकीची रणधुमाळी सुरू असतानाच लातूर जिल्ह्यातील उदगीर तालुक्यात एक वादग्रस्त घटना समोर आली असून, यामुळे राजकीय वातावरण तापले आहे. राष्ट्रवादी काँग्रेस (अजित पवार गट)चे  संजय आमदारबनसोडे यांच्या उदगीर शहरातील कार्यालयाबाहेर एका व्यक्तीने लघवी केल्याचा व्हिडीओ सोशल मीडियावर व्हायरल झाल्याने मोठी खळबळ उडाली आहे.

मिळालेल्या माहितीनुसार, ही घटना बुधवारी (21 जानेवारी 2026) रोजी घडली असून, संबंधित व्हिडीओ काही वेळातच विविध सोशल मीडिया प्लॅटफॉर्मवर मोठ्या प्रमाणावर पसरला. सदर घटनेमुळे राजकीय वर्तुळात संतप्त प्रतिक्रिया उमटत आहेत.

‘अन्याय केल्याचा’ आरोप

या प्रकरणात नितीन एकरकेकरयांनी पक्ष नेतृत्वावर अन्याय केल्याचा गंभीर आरोप केला आहे. जिल्हा परिषद निवडणुकीसाठी उमेदवारी नाकारण्यात आल्याने आपल्यावर अन्याय झाल्याचा दावा त्यांनी केला आहे. दरम्यान, आमदार बनसोडे यांच्या कार्यालयाबाहेर घडलेल्या प्रकाराचा व्हिडीओ नितीन एकरकेकर यांनी स्वतःच्या सोशल मीडिया हँडलवर शेअर केल्याचे समोर आले होते. मात्र, वाद वाढल्यानंतर संबंधित व्हिडीओ हटवण्यात आल्याचेही सांगितले जात आहे.

समर्थकांचा दावा

या घटनेनंतर मधुकर एकरकेकर यांच्या समर्थकांनी वेगळी भूमिका मांडली आहे. समर्थकांचा दावा आहे की, मधुकर एकरकेकर यांनी अनेक वर्षे स्थानिक पातळीवर प्रामाणिकपणे काम केले असून, तरीही पक्षाने त्यांच्याकडे दुर्लक्ष केले. उमेदवारी नाकारल्याने कार्यकर्त्यांमध्ये प्रचंड नाराजी पसरली असून, त्याच नाराजीचे हे टोकाचे प्रतिबिंब असल्याचे समर्थकांचे म्हणणे आहे.

राजकीय पडसाद

या घटनेमुळे जिल्हा परिषद निवडणुकीपूर्वीच राष्ट्रवादी काँग्रेस (अजित पवार गट) अंतर्गत असलेली अंतर्गत नाराजी उघडपणे समोर आली आहे. विरोधकांकडून या घटनेवर जोरदार टीका होत असून, सत्ताधारी गटासाठी ही बाब राजकीयदृष्ट्या अडचणीची ठरण्याची शक्यता व्यक्त केली जात आहे.

दरम्यान, या प्रकरणावर अद्याप संबंधित आमदार किंवा पक्ष नेतृत्वाकडून अधिकृत प्रतिक्रिया आलेली नाही. मात्र, व्हायरल व्हिडीओ आणि आरोप-प्रत्यारोपांमुळे उदगीर तालुक्यातील राजकीय वातावरण चांगलेच तापले असून, येत्या काळात या प्रकरणाचे पडसाद निवडणूक प्रचारात उमटण्याची दाट शक्यता आहे.