अमोल भालेराव
कोट्यवधी भाविकांचे श्रद्धास्थान असलेल्या लालबागच्या राजाच्या दर्शनाला मोठी गर्दी उसळली आहे. दरवर्षी देशभरातून भाविक लालबागच्या राजाच्या दर्शनाला येत असतात. त्यात आज रविवारी सुट्टीचा दिवस असल्याने लालबाग राजाच्या दर्शनाला भाविकांची मोठी गर्दी उसळलेली पाहायला मिळतेय. लालबाग-परळचा परिसर भक्तांनी फुलून गेलेलं पाहायला मिळालं आहे. एवढंच नाही तर भाविकांच्या लांबच लांब रांगा लागलेल्या पाहायला मिळत आहे.
लालबागच्या राजाच्या मुख दर्शनाची रांग तब्बल 10 किलोमीटर पेक्षा जास्त लांब
लालबागच्या राजाच्या मुख दर्शनाची रांग तब्बल 10 किलोमीटर पेक्षा जास्त लांब गेल्याचं पाहायला मिळत आहे. रविवारी सुट्टीचा दिवस असल्यामुळे गणेशभक्तांनी लालबागचा राजाच्या दर्शनाला मोठी गर्दी केली आहे. लालबाग मार्केट ते भायखळा रेल्वे स्टेशनपर्यंत ही दर्शन रांग पोहचली आहे. रविवारी लालबागच्या राजाच्या दर्शनासाठी गणेशभक्तांची सर्वाधिक गर्दी होत असलेली पाहायला मिळत आहे. शनिवारपासूनच लालबाग, परळ, काळाचौकी परिसरात मोठी गर्दी आहे. काळाचौकी येथे महागणपतीच्या दर्शनासाठी गेलेल्या भाविकांसोबत मोठी एक दुर्घटना घडली.
लालबागमध्ये गर्दीचं नियोजन करताना पोलीस यंत्रणा कसं असेल?
शनिवारपासूनच लालबाग, परळ आणि काळाचौकी परिसर भाविकांनी गजबजलेला आहे. आज रविवारी मोठी गर्दी उसळल्याचं पाहायला मिळालं. कायदा व सुव्यवस्था राखण्यासाठी पोलीस प्रशासनाचा मोठा कस लागत आहे. शनिवारी रात्री काळाचौकी येथील महागणपती मंडळाजवळ घडलेल्या दुर्दैवी दुर्घटनेच्या पार्श्वभूमीवर, आज लालबाग परिसरात सुरक्षा व्यवस्था आणि गर्दीचे नियोजन अधिक कडक करण्यात आले आहे.
लालबाग मार्केटमध्ये कोळी बांधवांचा पारंपरिक जल्लोष
एकीकडे दर्शनासाठी तासनतास रांगेत उभे असलेल्या भक्तांचा उत्साह कायम असतानाच, दुसरीकडे लालबाग मार्केटमध्ये कोळी बांधवांचा मोठा जल्लोष पाहायला मिळाला. गणेशोत्सव काळात कोळी महिलांना लालबागच्या पूजेचा विशेष मान दिला जातो. याच परंपरेचे पालन करत कोळी महिलांनी पारंपरिक वेशभूषा परिधान करून हळदी-कुंकू कार्यक्रमाचे आयोजन केले. बँड-वाज्याच्या तालावर नृत्य करत कोळी महिलांनी बाप्पाची पूजा करून जल्लोष साजरा केला.
गणेश गल्लीच्या ‘मुंबईच्या राजा’ला १०१ अमेरिकन डॉलरचा हार
यंदाच्या गणेशोत्सवात भारतीय चलनासोबतच परदेशी चलनाचे दान देण्याची मोठी क्रेझ पाहायला मिळत आहे. प्रसिद्ध ‘गणेश गल्ली’ येथील ‘मुंबईच्या राजा’च्या पूजेच्या मूर्तीला एका भाविकाने १०१ अमेरिकन डॉलरचा अत्यंत आकर्षक हार अर्पण केला आहे. यापूर्वी लालबागच्या राजालाही एका भक्ताने डॉलरचा हार अर्पण केला होता. यंदा भाविकांकडून भरभरून अर्पण केले जाणारे विदेशी चलन आणि मौल्यवान भेटवस्तू सर्वत्र चर्चेचा विषय ठरत आहेत.
