रत्नागिरीतून एक मोठी बातमी समोर आली आहे. व्यवसायासाठी तब्बल लाखो रुपयांचा निधी उपलब्ध करून देण्याचे आमिष दाखवून एका व्यापाऱ्याची २४ लाख रुपयांची फसवणूक केल्याचा गंभीर प्रकार समोर आला आहे. वारंवार पैशांची मागणी करूनही पैसे परत न देता उलटी धमकी दिल्याने अखेर सावर्डे पोलीस ठाण्यात चार जणांविरोधात विविध कलमांन्वये गुन्हा दाखल करण्यात आला आहे.

नक्की काय आहे हे प्रकरण?

रत्नागिरी जिल्ह्यातील सावर्डे पोलीस ठाण्याच्या हद्दीत ही २४ लाखांची कथित आर्थिक फसवणूक घडली आहे. तक्रारदार चव्हाण यांनी दिलेल्या माहितीनुसार, सन २०२४ पासून व्यवसायामध्ये मोठा निधी उपलब्ध करून देण्याचे आश्वासन देऊन आरोपींनी त्यांचा विश्वास संपादन केला. त्यानंतर जानेवारी २०२६ पासून मार्च २०२६ या कालावधीत वेगवेगळ्या टप्प्यांत बँक खात्यांद्वारे आणि RTGS द्वारे तब्बल २४ लाख रुपये हस्तांतरित करण्यात आले. मात्र, ठरल्याप्रमाणे कोणताही निधी उपलब्ध करून देण्यात आला नाही.

पोलिसांनी चौघांना घेतलं ताब्यात

जेव्हा तक्रारदाराने आपले पैसे परत मागितले, तेव्हा आरोपींनी टाळाटाळ करण्यास सुरुवात केली आणि तक्रारदाराला धमकावले. या व्यवहारापोटी देण्यात आलेला २४ लाखांचा चेक देखील बँकेत वटला नाही. अखेर फसवणूक झाल्याचे लक्षात येताच तक्रारदाराने सावर्डे पोलीस ठाण्यात धाव घेतली. १० ऑगस्ट २०२६ रोजी पोलिसांनी एफआयआर क्रमांक ००९० नोंदवला आहे.

पोलिसांकडून सखोल तपास सुरु

भारतीय न्याय संहिता २०२३ मधील कलम ३१८(४), ३५१(२), ३५२ आणि ६१ अंतर्गत खालील चौघांवर गुन्हा दाखल करण्यात आला आहे. सचिन सुभाष पिपळकर,चंद्रशेखर सुरेश पवार,संतोष केशव शिर्के,योगेश बामगुडे पाटील,या चौघांवर गुन्हा दाखल करण्यात आला आहे. सावर्डे पोलीस सध्या या सर्व आर्थिक व्यवहारांची, बँक खात्यांची सखोल चौकशी करत असून हे पैसे नेमके कुठे हस्तांतरित झाले, याचा शोध घेत आहेत.

नागरिकांनी अत्यंत सावध राहणं गरजेचं

दरम्यान व्यवसायाच्या नावाखाली किंवा मोठा निधी मिळवून देण्याच्या बहाण्याने होणाऱ्या अशा फसवणुकीपासून नागरिकांनी अत्यंत सावध राहणे गरजेचे आहे. कोणताही मोठा आर्थिक व्यवहार करताना कायदेशीर कायदपत्रे आणि बँक नोंदी सुरक्षित ठेवणे आवश्यक आहे. आता या प्रकरणात सावर्डे पोलीस आरोपींवर नेमकी काय कडक कारवाई करतात आणि तक्रारदाराचे पैसे परत मिळतात का, याकडे सर्वांचे लक्ष लागले आहे.