अमोल भालेराव
मुंबईतील कुर्ला परिसरातून एक मोठी बातमी समोर येत आहे. क्रेन कोसळून मोठी दुर्घटना घडली आहे. कुर्ला येथील कुरेशी नगर परिसरात गुरुवारी मध्यरात्री डिमोलिशनच्या कामादरम्यान मोठा अपघात झाल्याची घटना घडली आहे. इमारत पाडण्याच्या कामासाठी वापरण्यात येणारी एक जड क्रेन अचानक उलटली. या क्रेनच्या मदतीने पोकलेन मशीन इमारतीच्या वरच्या भागात नेण्याचे काम सुरू होतं. त्याचवेळी अचानक क्रेनचा तोल गेला आणि ती जोरात जमिनीवर कोसळली. क्रेनचा काही भाग जवळील दोन घरांवर तसेच मुंबई लोकलच्या ओव्हरहेड इलेक्ट्रिक वायरवर पडल्याने परिसरात मोठी खळबळ उडाली आहे. या दुर्घटनेत ८ ते १० जण जखमी झाल्याची प्राथमिक माहिती आहे. जखमींना तातडीने जवळच्या रुग्णालयात उपचारासाठी दाखल करण्यात आले.
८ ते १० जण जखमी झाल्याची माहिती
क्रेनने जेसीबी शिफ्ट करत असताना हा परिसर रिकामा करण्यात आला होता, त्यामुळे मोठा अपघात टळला आहे. परंतु या घटनेत ८ ते १० जण जखमी झाल्याचे सांगण्यात येत आहे, मात्र सुदैवाने अद्यापतरी या दुर्घटनेत कोणत्याही जीवितहानीची माहिती मिळालेली नाही. मिळालेल्या माहितीनुसार, हा अपघात शुक्रवारी पहाटे २ वाजून ४० मिनिटांच्या सुमारास घडल्याचं सांगितलं जात आहे.
क्रेन कुर्ला आणि ट्रॉम्बे दरम्यान ओव्हरहेड इलेक्ट्रिक लाईनवर कोसळली
मध्य रेल्वेने दिलेल्या माहितीनुसार, “मुंबई महानगर प्रदेश विकास प्राधिकरणच्या वतीने जवळच सुरू असलेल्या एका कामाच्या ठिकाणी क्रेन कुर्ला आणि ट्रॉम्बे दरम्यान ओव्हरहेड इलेक्ट्रिक लाईनवर कोसळली. या रेल्वे लाईनचा वापर प्रामुख्याने मालगाड्यांच्या वाहतुकीसाठी केला जातो, त्यामुळे सामान्य लोकल किंवा प्रवासी ट्रेन सेवांवर याचा कोणताही परिणाम झालेला नाही. घटनेची माहिती मिळताच पोलीस घटनास्थळी दाखल झाले असून त्यांनी या प्रकरणाचा तपास सुरू केला आहे.
#WATCH | Mumbai | A large crane collapsed on a house in Qureshi Nagar, Kurla, late last night, leaving more than 10 people injured pic.twitter.com/dEp7W8GlYX
— ANI (@ANI) August 21, 2026
क्रेनचा काही भाग दोन घरांवर कोसळला
कुरेशी नगर परिसरातील एका जुन्या इमारतीच्या पाडकामाचे काम सुरू होते. पोकलेन मशीन इमारतीच्या वरच्या भागात नेण्यासाठी मोठ्या क्रेनचा वापर करण्यात आला होता. मशीन वर उचलत असताना अचानक क्रेनचा तोल बिघडला. काही क्षणांतच संपूर्ण क्रेन उलटली आणि तिचा मोठा भाग आजूबाजूच्या परिसरात कोसळला. क्रेनचा काही भाग दोन घरांवर पडल्याने घरांमध्ये असलेल्या नागरिकांमध्ये घबराट निर्माण झाली.
अपघाताच्या इतर बाजूंचाही शोध घेतला जात आहे. सध्या घटनास्थळावरून ढिगारा आणि मलबा हटवण्याचे काम सुरू आहे. सुदैवाने कोणालाही गंभीर दुखापत झालेली नाही. तर काही जण मलब्यात अडकल्याची माहिती असून स्थानिक नागरिक आणि बचाव पथकांनी तातडीने मदतकार्य सुरू करण्यात आलं आहे.
अपघातात घरांसह वाहनांचेही नुकसान
या अपघातात दोन घरांचे नुकसान झाले असून परिसरातील एक कार आणि ऑटो-रिक्षाचेही मोठे नुकसान झाले आहे. क्रेनचा भाग मुंबई लोकलच्या ओव्हरहेड इलेक्ट्रिक वायरवर पडल्याने रेल्वे सुरक्षेचाही प्रश्न निर्माण झाला. खबरदारीचा उपाय म्हणून घटनास्थळाचा परिसर सुरक्षित करण्यात आला. घटनेची माहिती मिळताच मुंबई पोलीस, अग्निशमन दल आणि इतर बचाव पथके घटनास्थळी दाखल झाली. सध्या क्रेन हटवण्याचे आणि परिसर सुरक्षित करण्याचे काम सुरू आहे. या अपघाताला पूर्णपणे एमएमआरडीए जबाबदार असल्याचंही रेल्वेने म्हटले आहे.
