मुंबईकरांसाठी एक महत्त्वाची बातमी समोर आली आहे. मुंबईसह एमएमआर रिजनमध्ये पुढील महिन्यापासून ऑटो रिक्षा आणि टॅक्सीमध्ये भाडेवाढ होणार आहे. ऑटो रिक्षा आणि टॅक्सीच्या भाडेवाडीच्या प्रस्तावाला MMRTA ची मंजुरी मिळाली आहे. त्यानुसार 1 सप्टेंबर 2026 पासून ऑटो रिक्षा आणि टॅक्सीची भाडेवाढ मुंबईसह एमएमआर रिजनमध्ये होणार आहे.

किती असणार नवीन भाडेवाढीचे दर?

ऑटो रिक्षा आणि काळ्या-पिवळ्या भाडेवाढीच्या प्रस्तावाला खरं तर मुंबई महानगर क्षेत्र परिवहन प्राधिकरणाने देखील मंजुरी दिलेली आहे. त्या नवीन दरानुसार रिक्षाच्या किमान भाड्यात वाढ करण्यात आलेली आहे, अशी सध्या माहिती समोर आलेली आहे. मुंबईसह एमएमआर रिजनमध्ये रिक्षाचे भाडं कमीत कमी पहिल्या दीड किलोमीटरसाठी 26 रुपयांवरून 27 रुपये झालं आहे, तर टॅक्सीचे भाडे 31 रुपयांवरून 33 रुपये झाले आहे. त्याचवेळी काळ्या-पिवळ्या टॅक्सीच्या किमान भाड्यात 2 रुपयांची वाढ झालेली आहे. आता टॅक्सीचे भाडे हे 31 रुपयांवरुन 33 रुपये करण्यात आलेले आहे.

कोणकोणत्या परिसरात असणार ही भाडेवाड

महत्त्वाचे म्हणजे ही नवीन दरवाढ फक्त मुंबईपुरती मर्यादित राहणार नाही, तर एमएमआरमधील अनेक भागांमध्ये लागून होणार आहे. मुंबई, ठाणे, नवी मुंबई, कल्याण, वसई, विरार तसेच पालघर या परिसरातील रिक्षा आणि टॅक्सी प्रवाशांना या वाढीव दरानुसारच पैसे मोजावे लागणार आहेत.

भाडेवाड वाढण्याची कारणे काय?

रिक्षा आणि टॅक्सी चालकांकडून गेल्या काही महिन्यांपासून वाढत्या खर्चाचा मुद्दा हा उपस्थित केला जात होता. ज्यात इंधनाच्या किमती, वाहनांची देखभाल, दुरुस्ती तसेच विम्याचा खर्च परवाना शिवाय या संबंधित असलेले अनेक खर्च वाढल्याने ही भाडेवाढ करावी, असे चालक संघटनांने म्हणणे होतं. इंधन, वाहन देखभाल आणि इतर खर्च मोठ्या प्रमाणात वाढले आहेत. प्रवाशांची मागणी पुन्हा वाढली असली तरी चालकांच्या उत्पन्नावर वाढत्या खर्चाचा ताणही आहे.

दरम्यान परिवहन आयुक्तांनी 20 ऑगस्ट रोजी भाडेवाढीसंदर्भात प्रस्ताव पाठवला होता. याच प्रस्तावाला एमएमआरटीएने मंजुरी दिली असून आता त्यानंतर 1 सप्टेंबर पासून नवे दर लागू करण्याचा निर्णय झालेला आहे. याआधी फेब्रुवारी 2025 मध्ये रिक्षा आणि टॅक्सीच्या भाड्यात वाढ करण्यात आली होती.

 मराठी येत नसलेल्या रिक्षा, टॅक्सीचालकांना आरटीओकडून नोटीस

तसेच मुंबईत मराठी भाषा न येणाऱ्या रिक्षा आणि टॅक्सी चालकांवर सुरू झालेल्या कारवाईचा आज दुसरा दिवस आहे. या मोहिमेमुळे प्रादेशिक परिवहन विभागाने नियम उल्लंघन करणाऱ्यांवर देखरेख आणि दंडात्मक कारवाई तीव्र केली जात आहे. राज्याचे परिवहन मंत्री प्रताप सरनाईक यांनी दिलेल्या माहितीनुसार प्रादेशिक परिवहन विभागाच्या वायुवेग पथकाद्वारे ही तपासणी सुरु आहे. मुंबईत काल मराठी भाषेवरून 1 हजार 268 रिक्षा-टॅक्सी चालकांना परिवहन विभागाच्या नोटीस आरटीओकडून बजावण्यात आली आहे. तर मराठी शिकण्यासाठी एक महिन्यांची मुदतवाढ, न शिकल्यास 3 महिन्यांसाठी बॅज निलंबित करण्यात येणार आहे.