रायगड जिल्ह्यातील म्हसळा तालुक्यातील काळसुरी गावाशी नाळ जोडलेल्या आणि मुंबईत स्थायिक झालेल्या ग्रामस्थांचे ‘काळसूर ग्रामसेवा मंडळ, मुंबई’ यांचे ८० वे दसरा स्नेहसंमेलन गणेशनगर, वडाळा, मुंबई येथे अत्यंत उत्साहात आणि चैतन्यमय वातावरणात पार पडले. मुंबई येथे सायंकाळी ५ वाजता उत्साहपूर्ण वातावरणात हा सोहळा संपन्न झाला आहे. गावाशी असलेले भावनिक नाते, सामाजिक बांधिलकी, शैक्षणिक प्रगती आणि ग्रामविकासाचा ध्यास या संमेलनातून अधोरेखित झाला.

ग्रामविकासाचा ध्यास या संमेलनातून प्रकर्षाने अधोरेखित 

गावाशी असलेले भावनिक नाते, सामाजिक बांधिलकी, शैक्षणिक प्रगती आणि ग्रामविकासाचा ध्यास या संमेलनातून प्रकर्षाने अधोरेखित झाला. कार्यक्रमाची सुरुवात अध्यक्ष किशोर सावकार, सल्लागार विठ्ठल चाळके, रमेश नाकती, गणेश नाकती, खजिनदार किशोर नाकती आणि अंतर्गत हिशेब तपासणीस रविंद्र लखमा पाटील यांच्या हस्ते दीपप्रज्वलन करून करण्यात आली. सभेचे अध्यक्षस्थान गणेश मालजी नाकती यांनी भूषविले, तर मंडळाचे सचिव सुरेश पांडुरंग घोसाळकर यांनी प्रास्ताविक करून कार्यक्रमाचे सूत्रसंचालन केले.

शैक्षणिक उपक्रम आणि गुणगौरव सोहळा

गावातील विद्यार्थ्यांच्या शैक्षणिक प्रगतीला प्रोत्साहन देण्यासाठी या संमेलनात विशेष विद्यार्थी गुणगौरव सोहळा पार पडला. यादरम्यान सुमारे ३०० विद्यार्थ्यांना शालेय भेटवस्तूंचे वाटप करण्यात आले, तर ५१ विद्यार्थ्यांच्या शालेय शुल्कासाठी आर्थिक मदत सुपूर्द करण्यात आली. तसेच इयत्ता दहावी, बारावी तसेच उच्च शिक्षण घेतलेल्या पदवीधर विद्यार्थ्यांचा त्यांच्या यशाबद्दल गौरव करण्यात आला. आर्थिक अडचणींमुळे कोणत्याही होतकरू विद्यार्थ्याच्या शिक्षणात अडथळे येऊ नयेत, हा या उपक्रमामागील मुख्य उद्देश असल्याचे मंडळाकडून सांगण्यात आले.

पाणीटंचाईमुक्तीसाठी ‘जलसंधारणाचा’ संकल्प

गावातील पाणीटंचाईच्या समस्येवर शाश्वत मात करण्यासाठी ‘पाणी अडवा, पाणी जिरवा’ अभियानांतर्गत देवकुरे येथे सलग समतल चर खोदण्याचे महत्त्वपूर्ण काम पूर्ण करण्यात आले आहे. आगामी एप्रिल-मे महिन्यांत गावातील पाणीस्रोतांच्या वरील बाजूस जलसंधारणाची कामे श्रमदानातून हाती घेण्याचा दृढ निर्धार यावेळी व्यक्त करण्यात आला. याशिवाय ‘जमिनी वाचवा, शेतकरी राजा वाचवा’ या उपक्रमाच्या माध्यमातून जमीन, शेती आणि पर्यावरण संवर्धनाचा संदेश ग्रामस्थांना देण्यात आला.

रक्तदान शिबिर व सामाजिक बांधिलकी

मंडळाच्या वतीने राबविण्यात आलेल्या विविध सामाजिक उपक्रमांचा आढावाही यावेळी घेण्यात आला. नवी मुंबईतील नेरूळ येथे आयोजित रक्तदान शिबिर यशस्वीरीत्या संपन्न झाले असून, या उपक्रमातून मुंबईतील काळसूर ग्रामस्थांनी आपली सामाजिक बांधिलकी उत्तमरीत्या जोपासली आहे.

मान्यवरांचा सत्कार व दसरा मिलन

संमेलनात गावातील विविध विकासकामांचा सविस्तर आढावा घेण्यात आला. यासोबतच शासकीय सेवेतून सेवानिवृत्त झालेल्या सभासदांचा तसेच समाजात उल्लेखनीय योगदान देणाऱ्या कर्तृत्ववान व्यक्तींचा सन्मान करण्यात आला. दसऱ्याच्या पारंपरिक संस्कृतीनुसार शमीची पाने ‘सोन्याचे प्रतीक’ म्हणून एकमेकांना वाटत उपस्थितांनी परस्परांना शुभेच्छा दिल्या. या स्नेहसंमेलनामुळे मुंबईत स्थायिक झालेल्या ग्रामस्थांमधील आत्मीयता, सलोखा आणि गावाप्रती असणारे प्रेम अधिक दृढ झाले.

कार्याक्रमाच्या शेवटी सचिव सुरेश घोसाळकर यांनी उपस्थित सर्व ग्रामस्थांचे आभार मानले. गावाचा सर्वसमावेशक विकास, विद्यार्थ्यांची उज्ज्वल प्रगती आणि लोकसहभागातून पाण्याचा प्रश्न सोडवण्याच्या ध्येयाने पार पडलेले हे ८० वे स्नेहसंमेलन संस्मरणीय ठरले.