नांदेड जिल्ह्यातील मुदखेड तालुक्यातून एक अत्यंत धक्कादायक बातमी समोर आली आहे. या घटनेमुळे नांदेड जिल्हा हादरला आहे. एका जिल्हा परिषद शिक्षकानं वरिष्ठ अधिकाऱ्यांच्या जाचाला कंटाळून आपल्या दोन निष्पाप मुलांसह कार थेट नदीत घेऊन गेले अन् जीवनयात्रा संपवली. अंदुरा परिसरातील नदीपात्रात ही कार आणि त्यात वडिलांसह त्या दोन लेकरांचेही मृतदेह आढळून आले. ही घटना शुक्रवारी दि.17 जुलै 2026 रोजी घडली असून या घटनेमुळे या घटनेमुळं संपूर्ण नांदेड जिल्हा आणि शिक्षण वर्तुळात तीव्र संताप व खळबळ उडाली आहे.

वरिष्ठांच्या जाचाला आणि छळाला कंटाळून दोन्ही मुलांसह आत्महत्या 

सुनील मोरे (वय ४२, रा. बेंबर, ता. भोकर) असे मृत शिक्षकाचे नाव असून, सारा आणि सुमित अशी मृत मुला-मुलीची नावे आहेत. सुनील मोरे हे हिमायतनगर येथील पोटा बुद्रुक जिल्हा परिषद शाळेत कार्यरत होते. आत्महत्येसारखे टोकाचं पाऊल उचलण्यापूर्वी त्यांनी आपल्या सोशल मीडिया अकाउंटवर एक हृदयद्रावक स्टेटस ठेवला होता. त्या स्टेटसमध्ये,”मी माझ्या वरिष्ठांच्या जाचाला आणि छळाला कंटाळून माझ्या दोन्ही मुलांसह आत्महत्या करत आहे,” असा स्पष्ट उल्लेख त्यांनी केला होता. हा स्टेटस पाहिल्यानंतर नातेवाईक आणि मित्रांनी त्यांचा शोध घेण्याचा प्रयत्न केला, परंतु तोपर्यंत उशीर झाला होता.

विदारक दृश्य पाहून उपस्थितांचे डोळे पाणावले

शुक्रवारी सकाळी साडेसातच्या सुमारास अंदुरा येथील नदीपात्रात एक कार बुडाल्याचं स्थानिकांच्या निदर्शनास आलं. यानंतर त्यांनी तातडीने पोलिसांना याबाबात माहिती दिली.घटनेचं गांभीर्य ओळखून जिल्हा पोलीस प्रशासनानं एनडीआरएफ आणि स्थानिक रेस्क्यू टीमला पाचारण करण्यात आलं.अनेक तासांच्या अथक शोधमोहिमेनंतर एनडीआरएफच्या मदतीनं कार आणि मृतदेह बाहेर काढण्यात आलं आहे. कारचा दरवाजा उघडला असता, त्यात शिक्षक आणि त्यांच्या दोन मुलांचे मृतदेह आढळून आले. हे विदारक दृश्य पाहून उपस्थितांचे डोळे पाणावले.

आत्महत्येस प्रवृत्त करणाऱ्या वरिष्ठअधिकाऱ्यांवर गुन्हा दाखल करण्याची प्रक्रिया 

या घटनेची माहिती मिळताच नांदेडचे पोलीस अधीक्षक निलाभ रोहन आणि अपर पोलीस अधीक्षक सुरज गुरव यांनी तातडीनं घटनास्थळी धाव घेत पाहणी केली. कायदा व सुव्यवस्थेचा प्रश्न निर्माण होऊ नये म्हणून नदीपात्राजवळ मोठा पोलीस बंदोबस्त तैनात करण्यात आला आहे. पोलिसांनी तिन्ही मृतदेह उत्तरीय तपासणीसाठी रुग्णालयात पाठवले असून, आत्महत्येस प्रवृत्त करणाऱ्या त्या वरिष्ठअधिकाऱ्यांवर गुन्हा दाखल करण्याची प्रक्रिया सुरू असल्याची माहिती पोलिसांनी दिली आहे.