अमोल भालेराव
सध्या सगळीकडे चर्चा आहे ते फक्त तुकाराम मुंडे यांच्या दणक्याची. सध्या अन्न व औषध प्रशासन विभागाकडून भेसळखोर,अन्ना सुरक्षा मानकांचं उल्लंघन करणारे आणि नियम मोडणारी मोठमोठी हॉटेल्स, उपहारगृह आणि रेस्टॉरंट विरुद्ध जोरदार कारवाई सुरु आहे.तुकाराम मुंढेंचा मोर्चा पुढे कुठे वळेल याचा काही नेम नाही.
मुंबईतील चेंबूर परिसरात असलेल्या ‘पार्ले अ‍ॅग्रो’ कंपनीच्या गोदामावर अचानक धाड
मुंबईतील डॉमिनोज पिझ्झाच्या चार आउटलेट्सवर कारवाई करण्यात आली. तिथे व्हेज-नॉन व्हेजसाठी एकच प्लॅटफॉर्म वापरला जात होता.त्यानंतर गुरुवारी अन्न व औषध प्रशासन विभागाकडून मुंबईतील चेंबूर परिसरात असलेल्या ‘पार्ले अ‍ॅग्रो’ कंपनीच्या गोदामावर अचानक धाड टाकण्यात आली. या कारवाईत मुदत संपलेल्या एक्सपायरी डेट ओलांडून गेलेली फ्रुटी, अ‍ॅपे फिज, कोल्ड ड्रिंक्स आणि कॅन्डी ज्यूसचा 1 लाख रुपयांहून अधिक किमतीचा साठा जप्त करण्यात आला.
तब्बल 11 तास झाडझडती सुरु होती.
एफडीएच्या आठ अधिकाऱ्यांच्या पथकाने 13 ऑगस्ट रोजी सायंकाळी 6 वाजता सुरू केलेलं हे धाडसत्र 14 ऑगस्टच्या पहाटे 5 वाजता थांबलं. तब्बल 11 तास झाडझडती सुरु होती. बुधवारी एफडीएकडून विलेपार्ले पश्चिम, बोरिवली पश्चिम आणि घाटकोपर पश्चिम येथील डॉमिनोज पिझ्झा आउटलेट्सचे परवाने निलंबित करण्यात आले. त्याशिवाय मलकापूर आणि सातारा जिल्ह्यातील डॉमिनोज आउटलेटसचे परवानेही निलंबित करण्यात आले. ज्यूबिलंट फूडवर्क्स अंतर्गत हे आउटलेट्स सुरु होते.
FDAची मुदतबाह्य खाद्यपदार्थांविरोधात मोहीम
मुंबईत मुदत संपलेले अन्नपदार्थ साठवणे किंवा त्यांची विक्री होण्याची शक्यता निर्माण होणे, या प्रकारांविरोधात FDAने तपासणी मोहीम तीव्र केली आहे. या कारवाईकडे त्याच मोहिमेचा एक भाग म्हणून पाहिले जात आहे. विशेष म्हणजे अन्नपदार्थांची मुदत, साठवणूक, स्वच्छता आणि सुरक्षितता या बाबी ग्राहकांच्या आरोग्याशी थेट संबंधित आहेत. त्यामुळे गोदामांपासून विक्री केंद्रांपर्यंत अन्नसाखळीतील नियमांचे पालन होते का, याची तपासणी महत्त्वाची ठरते.
महाराष्ट्रात खाद्य व्यवसायांवर कारवाई
FDAची ही कारवाई एका दिवसापुरती मर्यादित नसून राज्यातील खाद्य सुरक्षा नियमांची अंमलबजावणी करण्यासाठी सुरू असलेल्या व्यापक मोहिमेच्या पार्श्वभूमीवर झाली आहे. 12 ऑगस्ट रोजी जुबिलेंट फूडवर्क्स लिमिटेडच्या चार डोमिनोज आउटलेट्सचे खाद्य व्यवसाय परवाने निलंबित करण्यात आल्याचे प्रहारच्या वृत्तात नमूद आहे. या तपासणीत FSSAI परवाना प्रदर्शित न करणे, पिण्याच्या पाण्याची उपलब्धता नसणे, अन्न साठवणुकीतील त्रुटी, कीटक नियंत्रणाचा अभाव आणि स्वच्छतेशी संबंधित नियमांचे उल्लंघन आढळल्याचे सांगण्यात आले.
