स्थानिक स्वराज्य संस्थांच्या निवडणुका पुन्हा लांबणीवर! महाराष्ट्र जिल्हा परिषद व पंचायत समिती निवडणुकांबाबत मोठी अपडेट; SIR नंतरच होणार मतदान?

Local body elections postponed again, Major update on Maharashtra Zilla Parishad and Panchayat Samiti elections; will voting happen only after the SIR process

महाराष्ट्रातील स्थानिक स्वराज्य संस्थांच्या निवडणुकांची प्रतीक्षा करणाऱ्या नागरिक आणि राजकीय पक्षांसाठी महत्त्वाची अपडेट समोर आली आहे.जिल्हा परिषद, पंचायत समित्या आणि नगरपंचायतींच्या निवडणुकांचे वेळापत्रक पुन्हा लांबण्याची शक्यता निर्माण झाली असून. राज्यातील 20 जिल्हा परिषदा आणि 211 पंचायत समित्यांच्या सार्वत्रिक निवडणुका चालू वर्षाऐवजी आता 2026 च्या अखेरीस किंवा 2027 च्या सुरुवातीला होणार असल्याचं म्हटलं जात आहे. केंद्रीय निवडणूक आयोगाच्या निर्देशांमुळे राज्यातील स्थानिक स्वराज्य संस्थांच्या निवडणुकांचे संपूर्ण गणित बदलण्याची शक्यता आहे.

जिल्हा परिषद-पंचायत समित्यांच्या निवडणुकांबाबत मोठी अपडेट

राज्यात मुदत संपलेल्या 20 जिल्हा परिषदा आणि त्यांच्या अंतर्गत पंचायत समित्यांच्या निवडणुका अद्याप प्रलंबित आहेत. या निवडणुका यंदाच्या डिसेंबरमध्ये किंवा जानेवारी 2027 पूर्वी होण्याची शक्यता सध्या कमी दिसत आहे. त्यातच राज्यातील 105 नगरपंचायतींची मुदत फेब्रुवारी 2027 मध्ये संपणार आहे. त्यामुळे सर्व स्थानिक स्वराज्य संस्थांच्या निवडणुका एकाच कालावधीत घेण्याचा पर्याय राज्य निवडणूक आयोगासमोर येऊ शकतो.

SIR पूर्ण झाल्याशिवाय निवडणुका नाही…सर्वोच्च न्यायालयाचे स्पष्ट निर्देश

सर्वोच्च न्यायालयाने ‘एसआयआर’ प्रक्रिया पूर्ण केल्याशिवाय स्थानिक स्वराज्य संस्थांच्या निवडणुका न घेण्याचे स्पष्ट निर्देश दिलेले आहेत. न्यायालयाच्या या आदेशामुळे राज्य निवडणूक आयोगासमोर मोठा तांत्रिक पेच निर्माण झाला आहे. त्यामुळे ही प्रक्रिया पूर्ण झाल्याशिवाय प्रत्यक्ष निवडणुकीचा मार्ग मोकळा होणार नसल्याचं सांगण्यात आलं आहे.

प्रक्रियेअंतर्गत अंतिम मतदार यादी 27 ऑक्टोबर रोजी प्रसिद्ध होण्याची माहिती

सध्या राज्यात मतदार याद्यांच्या विशेष सखोल पुनरीक्षणाची म्हणजेच SIR प्रक्रिया सुरू आहे. या प्रक्रियेअंतर्गत अंतिम मतदार यादी 27 ऑक्टोबर रोजी प्रसिद्ध होण्याची माहिती आहे. केंद्रीय निवडणूक आयोगाने SIR प्रक्रिया पूर्ण झाल्यानंतरच स्थानिक स्वराज्य संस्थांच्या निवडणुका घेण्याच्या सूचना राज्यांना दिल्याचे सांगितले जात आहे.या संपूर्ण प्रक्रियेला लागणारा वेळ पाहता प्रत्यक्ष मतदान डिसेंबर 2026 किंवा जानेवारी 2027 मध्ये पार पडण्याचा अंदाज वर्तवला जात आहे.

मुदत संपलेल्या या जिल्हा परिषदा आणि पंचायत समित्यांवर सध्या प्रशासक काम पाहत आहेत. आता या सर्व स्थानिक स्वराज्य संस्थांच्या निवडणुकांची अंतिम तारीख नक्की काय असेल, हे सर्वोच्च न्यायालयात होणाऱ्या आगामी सुनावणी आणि न्यायालयाच्या अंतिम निर्णयावरच पूर्णपणे अवलंबून असणार आहे