सर्वोच्च न्यायालयात आज शिवसेना पक्ष आणि पक्षचिन्ह कुणाचं? शिंदेंची की ठाकरेंचं याबाबत सुनावणी पार पडली. आज १८ ऑगस्ट २०२६ रोजी शिवसेना उद्धव बाळासाहेब ठाकरे पक्षाकडून ज्येष्ठ वकील कपिल सिब्बल यांनी युक्तिवाद केला.आमदार अपात्रतेच्या मुद्यावर सिब्बल यांनी काही महत्वाचे मुद्दे मांडले आहेत. यात त्यांनी परिच्छेद 10/1 ब नुसार आमदार पक्षाचे असतात पण ते पक्ष नसतात या मुद्द्याकडे लक्ष वेधलं.

“आमदार म्हणजे पक्ष नाही….”

सिब्बल यांनी म्हटले की, आमदार पक्षाचे असतात पण ते पक्ष नसतात. या दोन्ही गोष्टी वेगळ्या आहेत. परिच्छेद 10/1 ब मध्ये राजकीय पक्षाचा सदस्य आणि विधीमंडळ पक्षाचा सदस्य यांच्यात फरक करण्यात आलेला आहे. पण सध्या विधीमंडळ पक्षाचे सदस्यच राजकीय पक्ष बनले आहेत. ते दहाव्या अनुसूचीला अमान्य आहे. विधानसभा अध्यक्षांनी निष्कर्षातून ही परिस्थिती मान्य केली आहे असं म्हणत सिब्बल यांनी विधानसभा अध्यक्ष राहुल नार्वेकर यांच्या निर्णयावर प्रश्नचिन्ह उपस्थित केले.

सिब्बल म्हणाले, “एकनाथ शिंदे हे २०१८ च्या घटनेनुसार,नेते,आमदार आणि मंत्री झाले. आमदार म्हणजे पक्ष नाही. घटनेला विरोध केल्याने शिंदे यांच्यासोबत गेलेले ३९ आमदार अपात्र ठरतात” असं म्हणत सिब्बल यांनी न्यायालयासमोर 10 व्या अनुसूचीचा दाखला दिला.

सिब्बल विधानसभा अध्यक्षांबाबत काय म्हणाले?

दरम्यान आमदार अपात्रतेसोबतच सिब्बल यांनी युक्तिवादादरम्यान पुन्हा एकदा विधानसभा अध्यक्षांनी कसा चुकीचा निर्णय घेतला हे देखील न्यायालयासमोर मांडलं. “विधानसभा अध्यक्षांनी अधिकारांची मर्यादा ओलांडली. विधानसभा अध्यक्षांनी घेतलेले निर्णय अधिकाराबाहेरचे आहेत. अध्यक्षांना पक्षाच्या घटनेत लक्ष घालण्याचा अधिकार कसा?” असा प्रश्न सिब्बल यांनी उपस्थित केला.

“अध्यक्षांनी निर्णय देताना फुटीआधीचं पक्षाचं संविधान का वापरलं नाही?…”

ते म्हणाले की, “1999 ची घटना निवडणूक आयोगाच्या कार्यालयात उपलब्ध आहे. अध्यक्षांनी निर्णय देताना फुटीआधीचं पक्षाचं संविधान का वापरलं नाही? जेव्हा पक्षात फूट पडते आणि दोन्ही गट 2018 च्या संविधानाचा दाखला देत होते त्यावेळी पक्षाचं आधीचं संविधान वापरायला पाहिजे होतं. प्रतोद आमच्या बाजूनं होता. व्हीप आम्ही जारी केला होता. त्यामुळे बंडखोर आमदार अध्यक्षांची निवड करु शकत नाहीत कारण त्यांनी व्हीपविरोधात मतदान केलं” असंही सिब्बल यांनी म्हटलं.

बुधवारी १९ ऑगस्टला सिब्बलांचा युक्तीवाद संपणार?

आज शिवसेना कुणाची? या प्रकरणातील आजची सर्वोच्च न्यायालयातील सुनावणी संपली असून आता या प्रकरणातील पुढील सुनावणी उद्या म्हणजे बुधवारी १९ ऑगस्टला होणार आहे. बुधवारी पुन्हा एकदा सिब्बल बाजू मांडणार आहेत. सिब्बल हे बुधवारी त्यांचा युक्तिवाद संपवणार आहेत. त्यानंतर शिंदेंच्या वकिलांना या प्रकरणात आपली बाजू मांडण्याची संधी मिळण्याची शक्यता आहे. त्यामुळे बुधवारी होणाऱ्या सुनावणीत सिब्बल कोणते मुद्दे उपस्थित करणार? हे पाहणं महत्त्वाचं ठरणार आहे.