या गॅसच्या संपर्कात आल्याने 40 हून अधिक नागरिकांना मळमळ आणि उलट्यांचा त्रास झाला असून, 15 पेक्षा अधिक जणांना श्वास घेण्यास त्रास होत असल्याने रुग्णालयात दाखल करण्यात आले आहे. नागपूरमधील गोधनी येथील उधाननगर परिसरातील जलशुद्धीकरण केंद्रात क्लोरीन गॅसची गळती झाल्याने मध्यरात्री परिसरात एकच खळबळ उडाली. गॅसचा तीव्र वास परिसरात पसरल्यानंतर नागरिकांमध्ये भीतीचे वातावरण निर्माण झालं. खबरदारीचा उपाय म्हणून प्लांटच्या 200 मीटर परिसरातील नागरिकांना सुरक्षित स्थळी हलवण्यात आले असून, एनडीआरएफ आणि अग्निशमन दलाकडून बचावकार्य सुरू आहे.

उधाननगर परिसरातील जलशुद्धीकरण केंद्रात क्लोरीन गॅसची गळती 

नागपूरमधील गोधनी येथील उधाननगर परिसरातील जलशुद्धीकरण केंद्रात क्लोरीन गॅसची गळती झाल्याने मध्यरात्री परिसरात एकच खळबळ उडाली. गॅसचा तीव्र वास परिसरात पसरल्यानंतर नागरिकांमध्ये भीतीचे वातावरण निर्माण झालं. पोलिसांनी तातडीने घटनास्थळी धाव घेत अग्निशमन दलाला पाचारण करण्यात आलं आहे. खबरदारीचा उपाय म्हणून जलशुद्धीकरण केंद्राच्या २०० मीटर परिसरातील वस्त्या रिकाम्या करण्यात आल्या. या घटनेत सुमारे ५६ नागरिकांना विविध रुग्णालयांत उपचारासाठी दाखल करण्यात आले असून, त्यातील आठ जणांना अतिदक्षता विभागात दाखल करण्यात आल्याची माहिती आहे.

नागरिकांना श्वास घेण्यास त्रास

उधाननगर येथील जलशुद्धीकरण प्रकल्पात क्लोरीन साठवण्यासाठी वापरण्यात येणाऱ्या सुमारे ९०० लिटर क्षमतेच्या सिलिंडरमधून ही गळती झाल्याची प्राथमिक माहिती आहे. रात्रीच्या सुमारास क्लोरीन गॅसचा वास परिसरात पसरू लागल्यानंतर नागरिकांना श्वास घेण्यास त्रास, डोळ्यांची जळजळ, घशात खवखव तसेच अस्वस्थता जाणवू लागली. त्यामुळे नागरिकांनी सुरक्षित ठिकाणी धाव घेतली.

एनडीआरएफसह अन्य आपत्कालीन पथकांनाही घटनास्थळी हजर 

घटनेची माहिती मिळताच पोलिसांनी परिसरातील नागरिकांना सुरक्षित स्थळी हलविण्यास सुरुवात केली. अग्निशमन दलाच्या जवानांनी घटनास्थळी दाखल होत गळती रोखण्यासाठी प्रयत्न सुरू केले. परिस्थितीचे गांभीर्य लक्षात घेऊन एनडीआरएफसह अन्य आपत्कालीन पथकांनाही घटनास्थळी पाचारण करण्यात आले. बचाव पथकांनी आवश्यक सुरक्षा उपाय करत गॅस गळतीच्या ठिकाणी नियंत्रण मिळवण्याचे काम सुरू ठेवलं आहे.

नागरिकांना तातडीने विविध रुग्णालयांत दाखल करण्यात आलं

दरम्यान, गॅसच्या संपर्कात आलेल्या नागरिकांना तातडीने विविध रुग्णालयांत दाखल करण्यात आलं आहे. रुग्णांमध्ये वृद्ध, तरुण तसेच लहान मुलांचाही समावेश आहे. काही नागरिकांची प्रकृती गंभीर असल्याने त्यांना अतिदक्षता विभागात उपचारासाठी दाखल करण्यात आले. पहाटे ५ वाजताच्या सुमारास क्लोरीन गॅसच्या गळतीवर नियंत्रण मिळविण्यात अग्निशमन दल आणि बचाव पथकांना यश आले. त्यानंतर परिस्थिती हळूहळू नियंत्रणात आली. मात्र, खबरदारीचा उपाय म्हणून प्रशासन आणि आपत्कालीन पथकांकडून परिसरावर लक्ष ठेवण्यात येत आहे. गॅसची गळती नेमकी कोणत्या कारणामुळे झाली, याचा तपास सुरू आहे.