अमोल भालेराव
मुंबईकरांचा अत्यंत आवडीचा आणि रस्त्यावरील गाड्यांवर सर्वाधिक विकला जाणारा ‘ट्रिपल शेजवान फ्राईड राईस’ आणि इतर चायनीज पदार्थ आता अन्न व औषध प्रशासनाच्या रडारवर आले आहेत. मुंबईतील चायनीज फूडच्या वाढत्या लोकप्रियतेसोबतच त्यातील अस्वच्छतेच्या तक्रारींची दखल घेत FDA ने दोन चायनीज हॉटेलवर मोठी कारवाई केलीये. अन्नसुरक्षा आणि स्वच्छतेच्या नियमांचे गंभीर उल्लंघन आढळल्याने ही कारवाई करण्यात आली आहे.
चायनीज पदार्थांमध्ये कृत्रिम रंग आणि मोनोसोडियम ग्लुटामेट किंवा अजिनोमोटोचा अतिवापर
FDA ने केलेल्या तपासणीत मुलुंड येथील चायना टाउन फास्ट फूड सेंटरमध्ये अत्यंत धक्कादायक आणि गंभीर त्रुटी उघडकीस आल्या आहे. चायनीज पदार्थांमध्ये कृत्रिम रंग आणि मोनोसोडियम ग्लुटामेट किंवा अजिनोमोटोचा अतिवापर होत असल्याचे तसेच वारंवार वापरलेले खराब तेल वापरले जात असल्याचे निदर्शनास आलं. एवढंच नाही तर हॉटेलमध्ये झुरळांचा मोठा प्रादुर्भाव आणि अत्यंत अस्वच्छ ठिकाणी अन्न साठवणूक केली जात होती. सांडपाण्याचा योग्य निचरा नसल्याने परिसरात शेवाळ, घाण आणि प्रचंड दुर्गंधी पसरली होती.
शाकाहारी आणि मांसाहारी पदार्थांसाठी एकच जागा आणि एकाच प्रकारची उपकरणे वापरली जात असल्याने शाकाहारी ग्राहकांचे अन्न दूषित होण्याचा मोठा धोका होता. या अत्यंत गंभीर त्रुटींमुळे FDA ने या फास्ट फूड सेन्टरची अन्न व्यवसाय नोंदणी तत्काळ निलंबित केली आहे.
माहीम येथील आऊटलेटवर कारवाई
मुलुंडप्रमाणेच माहीम येथील लेनेक्सिस फूडवर्क लिमिटेड या आस्थापनेवरही FDA ने कारवाईचा बडगा उगारला आहे. तपासणीदरम्यान या ठिकाणी किचनमध्ये पुरेशी व्हेंटिलेशन व्यवस्था नसल्याचे आढळून आले. तसेच येथील एक्सहॉस्ट सिस्टीम आणि किचन हूड फिल्टर्सवर तेलाचे जाड थर साचलेले होते, ज्यामुळे स्वच्छतेचा बोजवारा उडाल्याचे स्पष्ट झाले.
मुंबईतील चायनीज गाड्यावाल्यांचे धाबे दणाणले
दोन्ही आस्थापनांमध्ये अन्नसुरक्षा आणि स्वच्छतेच्या मानकांचे थेट उल्लंघन झाल्याचे स्पष्ट झाल्याने FDA कडून ही कठोर पावले उचलण्यात आली आहेत. या कारवाईमुळे मुंबईतील इतर चायनीज गाडे आणि हॉटेल्स चालकांचे धाबे दणाणले आहेत.
शिवाजी पार्कमधील कॅफ कॅडेलचा अन्न परवाना FDA कडून निलंबित
शिवाजी पार्कमधील कॅफ कॅडेलचा अन्न परवाना FDAकडून निलंबित करण्यात आला आहे. 20 ऑगस्ट 2026 रोजी अन्न सुरक्षा विभागाकडून कॅफ कॅडेलची तपासणी केली असता यावेळी अन्नसुरक्षा आणि स्वच्छतेच्या गंभीर त्रुटी आढळल्या. हात धुण्यासाठी आणि कर्मचाऱ्यांच्या वैयक्तिक स्वच्छतेसाठी आवश्यक सुविधा अपुऱ्या आढळल्या. शाकाहारी आणि मांसाहारी पदार्थ वेगळे ठेवण्याची योग्य व्यवस्था नसल्याचे आढळले त्यामुळे अन्नपदार्थांमध्ये दूषितपणा होण्याचा धोका असल्याचे FDAच्या तपासणीत समोर आले. स्वयंपाकाची उपकरणे आणि कटलरीची योग्य स्वच्छता व निर्जंतुकीकरण होत नसल्याचे आढळले. स्वच्छतेचे वेळापत्रक आणि त्यासंबंधी आवश्यक नोंदी समाधानकारक नसल्याचे समोर आले. पिण्याच्या पाण्याच्या तपासणीच्या आवश्यक नोंदीही उपलब्ध नसल्याचे आढळले. या सर्व त्रुटींमुळे कॅफ कॅडेलचा FSSAI परवाना निलंबित करण्यात आला.
