अमोल भालेराव
तुकाराम मुंडेंचा धडका अजूनही सुरूच आहे! महाराष्ट्र अन्न व औषध प्रशासन म्हणजेच FDA ने आता थेट ‘मुंबई क्रिकेट असोसिएशन’कडे आपला मोर्चा वळवला आहे. एमसीए (MCA) च्या परिसरातील तीन प्रमुख अन्न आस्थापनांवर एफडीएने मोठी कारवाई करत त्यांचे FSSAI परवाने थेट निलंबित केले आहेत. या कारवाईमुळे हॉटेल आणि अन्न व्यवसायातील स्वच्छता आणि अन्नसुरक्षेचा मुद्दा पुन्हा एकदा ऐरणीवर आला आहे.
२० ऑगस्ट २०२६ रोजी FDA च्या पथकाने मुंबई क्रिकेट असोसिएशनमधील ‘परमीट रूम’, ‘पॅव्हिलियन’ आणि ‘मेडिटेरियन’ या तीन अन्न आस्थापनांची अचानक पाहणी केली. या तपासणीदरम्यान अन्नसुरक्षा आणि स्वच्छतेच्या नियमांचे प्रचंड उल्लंघन झाल्याचे उघडकीस आले.
स्वच्छता यासंदर्भात अनेक गंभीर त्रुटी आढळल्या
महाराष्ट्र अन्न व औषध प्रशासनाच्या अधिकाऱ्यांनी 20 ऑगस्ट 2026 रोजी या तीनही अन्न आस्थापनांची तपासणी केली. या तपासणीदरम्यान स्वच्छता, अन्नसुरक्षा, तापमान नियंत्रण, खाद्यपदार्थांची साठवणूक आणि उपकरणांची स्वच्छता यासंदर्भात अनेक गंभीर त्रुटी आढळून आल्या होत्या. परमीट रूमच्या तपासणीदरम्यान रेफ्रिजरेटरमध्ये मोठ्या प्रमाणात बर्फ साचल्याचे आढळून आले. तसेच फरशी निसरडी आणि अस्वच्छ असल्याचे निदर्शनास आले. खाद्यपदार्थांची योग्य पद्धतीने साठवणूक आणि तापमान नियंत्रणाबाबतही त्रुटी आढळल्या होत्या.
पॅव्हेलियनमध्ये खाद्यपदार्थांचे योग्य विलगीकरण नाही
पॅव्हेलियन या आस्थापनातील कोल्ड स्टोरेजची तपासणी केली असता विविध खाद्यपदार्थांचे योग्य विलगीकरण करण्यात आली नसल्याचे आढळले. खाद्यपदार्थांच्या साठवणुकीत आवश्यक असलेली अन्नसुरक्षा प्रक्रिया पाळली जात नसल्याचेही FDAच्या तपासणीत समोर आले. तर मेडिटेरियनमध्ये खराब आणि अस्वच्छ भांडी आढळून आली. या उपकरणांच्या स्वच्छतेकडे पुरेसे लक्ष दिले जात नसल्याचे तपासणीदरम्यान स्पष्ट झाले आहे.
खाद्यतेलाचीही नियमित तपासणी नाही
तिन्ही आस्थापनांमध्ये खाद्यतेलाची नियमित तपासणी केली जात नसल्याचे FDAच्या निदर्शनास आले. तसेच फूड ग्रेड आणि Conformity प्रमाणपत्रे उपलब्ध नसल्याचेही आढळून आले आहे. काही ठिकाणी खराब कच्चा माल देखील आढळला असल्याचे समोर आले आहे.
फ्रोझन फूडच्या हाताळणीत त्रुटी
तपासणीदरम्यान फ्रोझन फूडचे योग्य पद्धतीने वितळवले जात नसल्याचे आढळले. खाद्यपदार्थांचे आवश्यक तापमान नियंत्रणही समाधानकारक नसल्याचे स्पष्ट झाले. याशिवाय संबंधित आस्थापनांनी FSSAI परवाना प्रमुख ठिकाणी प्रदर्शित केला नसल्याचेही समोर आले आहे,
परवाना निलंबनाची कारवाई
या सर्व त्रुटींच्या पार्श्वभूमीवर अन्न सुरक्षा व मानके अधिनियम, 2006 अंतर्गत FDAने कारवाई केली. 21 ऑगस्ट 2026 रोजी आदेश काढून परमीट रूम आणि पॅव्हिलियनचे FSSAI परवाने निलंबित करण्यात आले. मेडिटेरियन या अन्न आस्थापनाविरोधातही परवाना निलंबनाची कारवाई करण्यात आली आहे. FDA ने अन्नसुरक्षा आणि स्वच्छतेच्या नियमांचे उल्लंघन करणाऱ्या अन्न आस्थापनांवर यापुढेही कठोर कारवाई करण्यात येईल, असा इशारा दिला आहे.
