ऑनलाइन किराणा आणि ई-कॉमर्स प्लॅटफॉर्मवरून घरगुती वस्तू मागवणाऱ्या ग्राहकांसाठी एक अत्यंत गंभीर बातमी समोर आली आहे. अन्न सुरक्षा विभागाने ऑनलाइन किराणा आणि ई-कॉमर्स प्लॅटफॉर्मद्वारे विषारी धोतराच्या विक्रीबाबत कठोर कारवाई केली आहे. पुढील आदेशापर्यंत ॲमेझॉन, स्विगी, इन्स्टामार्ट आणि बिगबास्केट यांचे अन्न परवाने आणि नोंदणी निलंबित करण्यात आली आहे.

ॲमेझॉन, स्विगी, इन्स्टामार्ट आणि बिगबास्केट यांचे अन्न परवाने निलंबित

हा प्रकार घडला आहे कर्नाटकात. कर्नाटकच्या अन्न सुरक्षा आणि मानक प्राधिकरणाने ॲमेझॉन, स्विगी, इन्स्टामार्ट आणि बिगबास्केट यांचे अन्न परवाने निलंबित केले आहेत. याचं कारण म्हणजे धोतरा या विषारी वनस्पतीचे फळ आणि बिया विकल्या जात होत्या. तपासादरम्यान, अधिकाऱ्यांना असे आढळून आले की धोतरा फळे आणि बिया पॅक केल्या जात होत्या आणि त्यासाठी FSSAI नोंदणी किंवा परवाना क्रमांकांचा वापर केला जात होता. तपासात असेही उघड झाले की ही उत्पादने एका गोदामात साठवली जात होती आणि ई-कॉमर्स प्लॅटफॉर्मद्वारे ऑनलाइन पुरवली जात होती.

धोतरा फळे आणि बिया विकल्यामुळे कारवाई

अन्न सुरक्षा आणि औषध प्रशासन विभागाने स्पष्टपणे म्हटले आहे की धोतरा फळे आणि बियांमध्ये विषारी गुणधर्म आहेत. त्यामुळे, त्यांची अन्न म्हणून किंवा मानवी सेवनासाठी विक्री केल्यास सार्वजनिक आरोग्याला गंभीर धोका निर्माण होऊ शकतो. या प्रकरणी २४ ऑगस्ट रोजी सुनावणी देखील झाली. या सुनावणीत संबंधित व्यवसायांचे प्रतिनिधी अधिकाऱ्यांसमोर हजर झाले. मात्र या सुनावणीदरम्यान ॲमेझॉनने नोटीसवर कोणताही प्रतिसाद सादर केलेला नाही.

अन्न सुरक्षा विभागाने ही कठोर भूमिका का घेतली?  

ॲमेझॉन, स्विगी, इन्स्टामार्ट आणि बिगबास्केट या तीन प्लॅटफॉर्मवर धोतरा फळे आणि बिया खाद्यपदार्थ म्हणून सूचीबद्ध केल्याची माहिती विभागाला मिळाली. यानंतर, तिन्ही कंपन्यांना कारणे दाखवा नोटीस बजावण्यात आली. धोतरा मानवी शरीरासाठी अत्यंत धोकादायक आणि विषारी मानला जातो. या गोष्टी ग्राहकांपर्यंत पोहोचत असल्याच्या बातम्या समोर आल्यानंतर अन्न सुरक्षा विभागाने ही कठोर भूमिका घेतली आहे.तसेच विभागाने हेही स्पष्ट निर्देश दिले आहेत की, या प्लॅटफॉर्मवरील मानवी सेवनासाठी असलेल्या धोतऱ्याच्या सर्व सूची आणि जाहिराती तात्काळ काढून टाकण्यात याव्यात.

धोतरा खाद्यपदार्थ म्हणून धोकादायक का मानला जातो?

धोतरा, ज्याला ‘थॉर्न ॲपल’ असेही म्हणतात, ही नाईटशेड कुळातील एक विषारी औषधी वनस्पती आहे. अधिकाऱ्यांच्या मते, प्रक्रिया न केलेल्या धोतऱ्याचे सेवन केल्यास मानवी आरोग्यास गंभीर धोका निर्माण होऊ शकतो. त्याचे सेवन केल्याने आरोग्याच्या गंभीर समस्या उद्भवू शकतात. अत्यंत गंभीर परिस्थितीत, व्यक्ती कोमात जाऊ शकते किंवा तिचा मृत्यूही होऊ शकतो. यामुळेच अन्न सुरक्षा विभागाने धोतरा फळे आणि बिया खाद्यपदार्थ म्हणून विकण्यावर कडक भूमिका घेतली आहे.