मु्ंबईतील भुलेश्वरमध्ये गणेश मूर्तीच्या आगमनादरम्यान झालेल्या अपघातानंतर सगळेच गणेशभक्त हादरले आहेत. सर्वच मुंबईकरांच्या मनातून ती घटना पुसली जाणे अशक्य आहे. या घटनेनंतर बीएमसी प्रशासनाने मोठा निर्णय घेतलाय. गणेशोत्सवादरम्यान मूर्तीचे सुरक्षित आगमन सुनिश्चित करण्यासाठी मूर्तीच्या वजनाबाबत नवीन नियम लागू केलाय.

मुंबई महानगरपालिका प्रशासनाचे मोठे पाऊल

गणेशोत्सवादरम्यान मूर्तीचे सुरक्षित आगमन सुनिश्चित करण्यासाठी मुंबई महानगरपालिका प्रशासनाने एक मोठे पाऊल उचलले आहे. आता एक टनापेक्षा जास्त वजनाच्या गणेश मूर्तीसाठी फिटनेस प्रमाणपत्र अनिवार्य करण्याचा निर्णय घेण्यात आलाय. यासोबतच मूर्तीची ऑर्डर दिल्याच्या वेळेपासून ते मूर्ती तयार होऊन मंडळात येईपर्यंतची संपूर्ण माहिती नोंदवली जाणार आहे.

नवीन नियमांमुळे मोठ्या अन् वजनदार गणेशमूर्तींच्या वाहतुकीदरम्यान होणाऱ्या अपघातांचा धोका टळणार 

या नवीन नियमांमुळे मोठ्या आणि वजनदार गणेशमूर्तींच्या वाहतुकीदरम्यान होणाऱ्या अपघातांचा धोका टाळता येणार आहे. जड मूर्तीच्या आगमनादरम्यान अपघातांचा धोका कमी करण्यासाठी त्यांच्यावर विशेष देखरेख ठेवण्यात येणार आहे. या संदर्भात एक विशेष कार्यप्रणाली विकसित करण्यासाठी डीएमसी झोन २ चे अधिकारी प्रशांत सपकाळे यांच्या अध्यक्षतेखाली गुरुवारी एक बैठक आयोजित करण्यात येणार आहे. या बैठकीत मूर्तीची सुरक्षा, योग्यता प्रमाणपत्रे आणि त्यांच्या वाहतुकीसंदर्भातील नियमांबाबत निर्णय होण्याची शक्यता आहे.

रस्ते तातडीने खड्डेमुक्त करण्याचे स्पष्ट निर्देश

तर गणेशोत्सवादरम्यान गणेशभक्तांना आणि आगमन मिरवणुकांना कोणताही त्रास होऊ नये, यासाठी बीएमसीचे अतिरिक्त आयुक्त अभिजित बांगर यांनी कडक पावले उचलली आहेत. गणेशमूर्तींच्या आगमन आणि विसर्जनासाठी वापरले जाणारे सर्व प्रमुख रस्ते तातडीने खड्डेमुक्त करण्याचे स्पष्ट निर्देश दिलेत. रस्ते विभाग आणि सर्व प्रभाग अधिकाऱ्यांना आदेश मिळालेत.

भुलेश्वरच्या महाराजाला आणताना मोठी दुर्घटना

22 ऑगस्ट रोजी भुलेश्वर येथील भुलेश्वरच्या महाराजाला आणताना मोठी दुर्घटना घडली होती. या २२ फूटांच्या भव्य मूर्तीला भायखळा ते भुलेश्वर असे आणताना ही मूर्ती एका बाजूला कोसळल्याने पाच जण जखमी झाले होते. त्यातील दोघांचा मृत्यू झाला होता. ही घटना मंडपाच्या अवघ्या ५०-६० मीटर आधी घडली आहे. या ठिकाणी रस्त्यावर कोणतेही खड्डे नव्हते. मात्र, मूर्तीचा बोल्ट तुटल्याने ही मूर्ती कोसळल्याचे उघडकीस आले होते.

भुलेश्वरच्या घटनेनंतर गणेशमूर्तीच्या उंचीबद्दल पुन्हा एकदा प्रश्नचिन्ह 

या घटनेनंतर गणेशमूर्तीच्या उंचीबद्दल पुन्हा एकदा सवाल उपस्थित केले जात आहेत. यामुळे बीएमसीच्या या नवीन फिटनेस प्रमाणपत्राच्या आणि सुरक्षिततेच्या नियमांमुळे यंदाचा गणेशोत्सव अधिक सुरक्षित आणि शिस्तबद्ध पद्धतीने पार पडेल, अशी अपेक्षा मुंबईकर करत आहेत.