अमोल भालेराव
तुकाराम मुंढे यांनी महाराष्ट्रात धडक कारवाईचा सपाटाच लावला आहे. छोट्या हॉटेलपासून ते मोठ्या हॉटेलपर्यंत, तसेच दुकानापासून ते मंत्रालयपर्यंत तर,कोर्टापासून ते अगदी पानटपरीपर्यंत सर्वच ठिकाणी धडाधड धाडी टाकत तुकाराम मुंढेंच्या FDA ने एकही ठिकाणी सोडलं नाहीय. अशातच आता पुण्यात भाजपच्या प्रदेश कार्यकारिणीच्या बैठकीदरम्यान FDA पथकाने अचानक धाड टाकल्याने सर्वत्र खळबळ उडाली आहे.
मुख्यमंत्री देवेंद्र फडणवीस यांच्या उपस्थितीत FDAची धाड
विशेष म्हणजे मुख्यमंत्री देवेंद्र फडणवीस यांच्या उपस्थितीत स्वारगेट इथे गणेश कला क्रीडा केंद्रात भाजपची प्रदेश कार्यकारिणीची बैठक सुरू होती. या बैठकीला प्रदेशाध्यक्ष रवींद्र चव्हाण यांच्यासह पक्षाचे मंत्री, खासदार, आमदार आणि प्रमुख पदाधिकारी उपस्थित होते.
पुण्याच्या या आयोजित भाजपच्या महत्त्वाच्या प्रदेश कार्यकारिणी बैठकीत आज राजकीय चर्चांपेक्षा एका वेगळ्याच घटनेची सर्वाधिक चर्चा रंगली. राज्यात सध्या भेसळयुक्त अन्नपदार्थांविरोधात अन्न व औषध प्रशासनाने कारवाईचा धडाका सुरू केला असतानाच, आज या बैठकीच्या ठिकाणी एफडीएच्या पथकाने थेट ‘सरप्राइज एन्ट्री’ मारली.
जेवणाचे नमुने तपासणीसाठी ताब्यात
एफडीएच्या अधिकाऱ्यांनी भाजप नेत्यांसाठी तयार करण्यात आलेल्या जेवणाचे नमुने तपासणीसाठी ताब्यात घेतले. रविंद्र चव्हाण यांच्या अध्यक्षतेखाली होणाऱ्या पहिल्याच मोठ्या बैठकीत ही घटना घडल्याने सध्या राजकीय वर्तुळात उलट-सुलट चर्चांना उधाण आलं आहे.
भाजपचे प्रवक्ते विनायक आंबेकर यांनी दिलेल्या माहितीनुसार, एफडीएच्या अधिकाऱ्यांनी येऊन अन्नाची तपासणी केली आणि तपासणीसाठी नमुने घेतले. मात्र, प्राथमिक तपासणीदरम्यान त्यांना कोणताही आक्षेपार्ह प्रकार आढळलेला नाही, असा दावाही त्यांनी केला आहे.
रविंद्र चव्हाण यांच्या अध्यक्षतेखाली होणारी ही पहिलीच प्रदेश कार्यकारिणीची बैठक
दरम्यान, भाजपच्या प्रदेशाध्यक्षपदाची सूत्रे स्वीकारल्यानंतर रविंद्र चव्हाण यांच्या अध्यक्षतेखाली होणारी ही पहिलीच प्रदेश कार्यकारिणीची बैठक आहे. मात्र, या राजकीय बैठकीच्या ठिकाणी एफडीए पथकाने केलेली अन्नपदार्थांची तपासणी सध्या राजकीय वर्तुळात सर्वाधिक चर्चा होताना दिसत आहे.
FDAकडून तपासणी आणि परवाने रद्द करण्याची कारवाई
अन्न व औषध प्रशासनाची धडक कारवाई सुरू असून भाजपाच्या बैठकीतील या कारवाईमुळे सर्वांच्याच भुवया उंचावल्या आहेत. मंत्रालयातील खानावळीपासून विविध शहरांतील हॉटेल्सपर्यंत FDAकडून तपासणी आणि परवाने रद्द करण्याची कारवाई होत असताना, भाजपच्या बैठकीत झालेली FDA ची एन्ट्री ही चर्चेचा विषय ठरली आहे. दरम्यान अन्न व औषध प्रशासनाने सांगितलं की, मुख्यमंत्री देवेंद्र फडणवीस यांच्या राज्य शिष्टाचारानुसार ही अन्न तपासणी करण्यात आली आहे.
