विद्यार्थ्याने डब्यात मेथीची भाजी आणली म्हणून एका शाळेनं चक्क त्याला ५० रुपयांचा दंड आकारल्याचा धक्कादायक प्रकार समोर आला आहे. मिरा रोड मधील अल्पसंख्याक दर्जा असलेल्या शाळेतील एका विद्यार्थ्याने मेथीची भाजी आणली होती. शाळा व्यवस्थापनाने डब्यात मेथी आणण्याची परवानगी नसल्याचे सांगत शाळेच्या कँटीनमधील खाद्यपदार्थ आणून दिले व बदल्यात ५० रुपये दंड आकारण्यात आला. तसेच विद्यार्थ्याच्या डब्यातील जेवणाबाबत आक्षेप घेतल्यानंतर त्याला कॅन्टीनमधून दुसरे खाद्यपदार्थ देण्यात आले.

विद्यार्थ्याने डब्यात मेथीची भाजी आणल्याने शाळेने विद्यार्थ्याला दंड

भाईंदरच्या इंद्रलोक भागातील तपोवन विद्यालयात हा प्रकार घडला.विद्यार्थ्याने डब्यात मेथीची भाजी आणल्याने शाळेने विद्यार्थ्याकडून ५० रुपये शुल्क घेतल्याची घटना समोर आली. याप्रकरणी शिक्षणाधिकाऱ्यांनी शाळेकडे खुलासा मागितला आहे. भाजप आमदार नरेंद्र मेहता चालवत असलेल्या मीरा रोड येथील एका शाळेने पर्युषण पर्व काळात कांदा-लसूणसह बटाटे असे पदार्थ आणू नये, असे परिपत्रक या शाळेने काढले होते. त्यानंतर आता भाईंदरच्या या शाळेतील हा प्रकार समोर आला आहे.

कांदा, लसूण, बटाटे नंतर आता मेथी आणण्यास मनाई

कांदा, लसूण, बटाटे यानंतर आता शाळेने विद्यार्थ्यांना डब्यात चक्क हिरवी मेथी आणण्यास मनाई केली आहे. या प्रकारावरून आता संताप व्यक्त केला जात आहे. तर या प्रकरणी महाराष्ट्र नवनिर्माण सेनेने आक्रमक पवित्रा घेतल्यावर शिक्षण विभागाने शाळेला कारणे दाखवा नोटीस बजावली आहे. काही समाजांमध्ये मेथी वर्ज्य असल्याने हा आदेश देण्यात आल्याचे समजते.

विद्यार्थ्याला शाळेतून जेवण दिले

‘डब्यात हिरवी मेथी आणण्यास परवानगी नसून, विद्यार्थ्याला शाळेतून जेवण देण्यात आले आहे,’ असा शेरा वर्गशिक्षकांकडून संबंधित विद्यार्थ्यांच्या दैनंदिनीत देण्यात आला. तसेच त्याला ५० रुपये दंड आकारण्यात आला. या संदर्भात संबंधित शाळेची बाजू जाणून घेण्याचा प्रयत्न केला असता, त्यांच्याशी संपर्क होऊ शकला नाही.

शाळेला कारणे दाखवा नोटीस 

या तक्रारीनंतर मीरा-भाईंदर महानगरपालिकेच्या शिक्षण विभागाने भाईंदरमधील ‘तपोवन विद्यालय’ या शाळेला कारणे दाखवा नोटीस बजावली आहे. या शाळेतील बहुतांश विद्यार्थी जैन समाजातील असल्याचे समजते. आहाराबाबत निर्बंध घालणे हे ‘शिक्षण हक्क कायद्या’चे उल्लंघन असल्याचे या नोटीसमध्ये नमूद करण्यात आले आहे.

मनसेचा आक्रमक पवित्रा

तक्रार दाखल करणारे मनसेचे पदाधिकारी रॉबर्ट डिसूझा यांच्या म्हणण्यानुसार, तपोवन विद्यालयातील बहुतांश विद्यार्थी जैन समाजातील आहेत आणि प्रवेशाच्या वेळी पालकांना डब्यात मांसाहारी पदार्थ व कंदमुळे न देण्यास सांगितले जाते.याआधीही शहरातील एका शाळेने कांदा, लसूण डब्यात आणण्यास मनाई केल्याप्रकरणी मनसेने महापालिकेच्या शिक्षण विभागाकडे तक्रार केली होती. त्यावरून संबंधित शाळेला पालिकेने नोटीस बजावत, खुलासा सादर करण्यास सांगण्यात आले होते. त्यानंतरही बंदी घालण्याचे प्रकार थांबले नसल्याचे चित्र असून आता मेथीही खाण्यास वर्ज्य करण्यास सांगण्यात आल्याने पालकांनी नाराजी नोंदवली आहे.