मुख्य निवडणूक आयुक्त ज्ञानेश कुमार यांच्या राजीनाम्याची मागणी करत २ ऑक्टोबर रोजी मुंबईतील शिवाजी पार्क मैदानात बिनपरवाना ‘जेल भरो’ आंदोलन केलं होतं. हे आंदोलन आता चांगलंच अडचणीत आणणारं ठरलं आहे. कारण आता या आंदोलनाविरोधात कारवाई म्हणून मुंबई पोलिसांनी मोठी कारवाई केली आहे. ‘कॉक्रोच जनता पार्टी’ चे संस्थापक अभिजीत दिपके यांच्यासह ५०० हून अधिक अज्ञातांवर शिवाजी पार्क पोलीस ठाण्यात FIR दाखल करण्यात आला आहे.

पोलिसांची परवानगी नाकारूनही हजारो तरुण रस्त्यावर

निवडणूक आयोगाच्या एसआयआर प्रक्रियेतील कथित गैरव्यवहाराच्या विरोधात आणि मुख्य निवडणूक आयुक्त ज्ञानेश कुमार यांच्या राजीनाम्यासाठी कॉक्रोच जनता पार्टीने २ ऑक्टोबरला शिवाजी पार्क येथे आंदोलनाची हाक दिली होती. मात्र, ध्वनी प्रदूषण, वाहतूक कोंडी आणि सुरक्षेचे कारण देत पोलिसांनी या आंदोलनाला पूर्वपरवानगी नाकारली होती. इथं घोषणा दिल्यास, भाषणं केल्या, लाऊड स्पीकर्स लावल्यास ध्वनी प्रदुषण होईल, त्याचबरोबर वाहतूक कोंडी होईल अशी चिंता व्यक्त केली होती.

पोलिसांनी परवानगी नाकारून देखील अभिजीत दिपके यांनी पोलिसांचे आव्हान स्वीकारत ‘जेल भरो’ आंदोलनाची घोषणा केली. शिवाजी पार्कमध्ये परवानगी नाकारली म्हणून CJP ने पार्कच्या बाहेर हे आंदोलन सुरु केलं. २ ऑक्टोबर रोजी दुपारी २ ते संध्याकाळी ७ या वेळेत शिवाजी पार्कच्या गेट क्रमांक ६ जवळ मोठ्या संख्येने Gen-Z युवा वर्ग, नागरिक, तसेच चित्रपट क्षेत्रातील काही सेलिब्रिटी आणि सार्वजनिक व्यक्ती एकत्र आल्या होत्या. नियमांचे उल्लंघन केल्याप्रकरणी सर्वांवर गुन्हे दाखल करण्यात आले.

स्थानिक रहिवाशांच्या तक्रारीनंतर गुन्हा दाखल

पोलिसांनी दिलेल्या माहितीनुसार, शिवाजी पार्क परिसरातील रहिवासी आणि ॲड. सिद्धी देवळेकर यांच्या तक्रारीवरून ही कायदेशीर कारवाई करण्यात आली आहे. यात. अभिजीत दिपके, आशुतोष रांका, सौरव दास, रत्ना सिंह, अजिंक्य शिंदे, प्रणय अहिरे, आफ्रिन नवाज आणि इतर कार्यकर्ते अशा सर्वांवर गुन्हे दाखल करण्यात आले आहेत. भारतीय न्याय संहिता (BNS) आणि महाराष्ट्र पोलीस अधिनियमातील तरतुदींनुसार बिनपरवाना जमाव जमवणे, लाऊडस्पीकरचा बेकायदेशीर वापर, वाहतुकीस अडथळा आणणे आणि पोलीस आदेशांचे उल्लंघन केल्याप्रकरणी गुन्हे दाखल झाले आहेत.

दरम्यान या प्रकरणी अद्याप कोणालाही अटक करण्यात आलेली नसून, अधिक चौकशी सुरू असल्याचे शिवाजी पार्क पोलिसांनी स्पष्ट केले आहे.

आणखी गुन्हे दाखल करा, लोकशाही वाचवण्यासाठी लढा सुरूच राहील”

गुन्हा दाखल झाल्यानंतर कॉक्रोच जनता पार्टीचे अध्यक्ष अभिजीत दिपके यांनी सोशल मीडिया प्लॅटफॉर्म ‘X’ (ट्विटर) वर आपली भूमिका स्पष्ट केली. “आमच्यावर आणखी गुन्हे दाखल करा, पण लोकशाही आणि निवडणूक प्रक्रियेची पारदर्शकता वाचवण्यासाठी आमचा लढा असाच सुरू राहील,” असा इशारा त्यांनी दिला आहे.

१० ऑक्टोबर रोजी दिल्लीतील जंतर-मंतर येथे आंदोलनाचा इशारा

दरम्यान, जर मुख्य निवडणूक आयुक्तांनी राजीनामा दिला नाही, तर येत्या १० ऑक्टोबर रोजी दिल्लीतील जंतर-मंतर येथे राष्ट्रीय पातळीवर शांततापूर्ण आंदोलन केले जाईल, अशी घोषणाही सीजेपीकडून करण्यात आली आहे. त्यामुळे येणाऱ्या दिवसांत निवडणूक आयोगाविरोधातील हे आंदोलन आणखी उग्र रूप धारण करण्याची शक्यता वर्तवली जात आहे.