मुंबई पश्चिम उपनगरात वर्सोवा व मढ यादरम्यान सुमारे दोन हजार ३९५ कोटी रुपयांच्या केबल-स्टेड उड्डाणपुलाच्या बांधकामाचा मार्ग आता मोकळा झाला आहे. मढ बेट आणि वर्सोवा यांना जोडणाऱ्या मालाड खाडीवरील प्रस्तावित ‘केबल-स्टेड’ पुलासाठी मुंबई उच्च न्यायालयाने बुधवारी हिरवा कंदील दाखवला. पर्यावरण आणि विकास या दोन्ही गरजांचा समतोल राखणे आवश्यक असल्याचे न्यायालयाने ही मंजुरी देताना नमूद केले. या नवीन पुलामुळे प्रवासाचे अंतर आणि वेळ यात मोठ्या प्रमाणात घट होणार असून, या फायद्यांचा विचार पर्यावरणाशी संबंधित चिंतांच्या तुलनेत करणे गरजेचे असल्याचेही न्यायालयाने अधोरेखीत केले.

दीड तासाचा प्रवास पाच मिनिटांत

हा प्रकल्प पूर्ण झाल्यानंतर प्रवासाचे अंतर सुमारे १८ ते २० किलोमीटरने कमी होईल. सुमारे दीड तासाचा प्रवास केवळ पाच मिनिटांत पूर्ण होणे शक्य होईल. त्यामुळे प्रवासाच्या वेळेत सुमारे ७० ते ८० मिनिटांची बचत होईल. हा पूल झाल्यानंतर न्यू लिंक रोड,पश्चिम द्रुतगती महामार्ग व एस. व्ही. रोडवरील अपघातांचे प्रमाणही कमी होण्यास मदत होईल’, असा दावाही महापालिकेने न्यायालयात केला.

या प्रकल्पासाठी पर्यावरण कायद्याप्रमाणे विविध प्रशासनांनी दिलेल्या मंजुरींमधील अटींचे पालन करून या प्रकल्पात अडथळा ठरणारी एक हजार २३७ खारफुटीची झाडे तोडण्यास मुंबई उच्च न्यायालयाचे मुख्य न्यायमूर्ती महेश त्रिपाठी व न्या.अद्वैत सेठना यांच्या खंडपीठाने मुंबई महापालिकेला परवानगी दिली.

प्रवासासाठी बराच वेळ लागतो.

‘सध्याच्या परिस्थितीत वर्सोवा ते मढ असा रस्त्याने प्रवास करायचा असल्यास नागरिकांना अंधेरी, जोगेश्वरी, राम मंदिर, ओशिवरा आणि त्यानंतर मालाडमार्गे मढ-मार्वे रस्त्याने जावे लागते. मढ-मार्वे रस्ता हा कांदिवली लिंक रोड किंवा मालाड लिंक रोडपासूनच १२ किलोमीटरपेक्षा अधिक अंतरावर आहे. हा प्रवास मोठा असून या मार्गावर मोठ्या प्रमाणात वाहतूक कोंडी होत असल्याने प्रवासासाठी बराच वेळ लागतो.

फेरीबोटीचा पर्यायी मार्ग उपलब्ध

वर्सोवा जेट्टी ते मढदरम्यान एका किनाऱ्यावरून दुसऱ्या किनाऱ्यावर जाण्यासाठी फेरीबोटीचा पर्यायी मार्ग उपलब्ध आहे. सकाळी ५ ते रात्री १ वाजेपर्यंत या मार्गावर तीन फेरीबोटी कार्यरत असतात. मात्र, ओहोटीच्या काळात फेरीसेवा बंद ठेवावी लागते. शिवाय या फेरीसेवेच्या काही मर्यादाही आहेत. अशा परिस्थितीत हा पूल प्रस्तावित करण्यात आला आहे’, असे महापालिकेने ॲड. जोएल कार्लोस यांच्यामार्फत केलेल्या रिट याचिकेद्वारे न्यायालयाच्या निदर्शनास आणले होत.

वाहतूक वळवण्यास मदत

सध्याचा प्रकल्प हा मालाड खाडीवरून मढ बेट आणि वर्सोवा यांना जोडण्यासाठी २,०६४ मीटर लांबीचा चार मार्गिकांचा केबल-स्टेडपूल उभारण्याचा आहे. हा पूल २७.४५ मीटर रुंदीच्या विकास आराखड्यातील रस्त्याशी आणि कोस्टल रोडच्या मार्गाशी जोडला जाणार आहे. नव्याने विकसित करण्यात येणारे डीपी रस्ते आणि प्रस्तावित पूल यामुळे एस. व्ही. रोड आणि लिंक रोडवरील मोठ्या प्रमाणातील वाहतूक वळवण्यास मदत होणार आहे’, असेही ज्येष्ठ वकील ॲस्पी चिनॉय यांनी न्यायालयाच्या निदर्शनास आणले.

महापालिकेची हमी

प्रकल्पाला पर्यावरणविषयक प्रशासनांच्या आवश्यक मंजुऱ्या मिळाल्या आहेत.किनारी नियमन क्षेत्र अधिसूचनेनुसार, उत्तर कोकण खारफुटी विभागाच्या विभागीय वन अधिकाऱ्यांच्या अखत्यारीतील नऊ हेक्टर खराब झालेल्या खारफुटी वनक्षेत्रात ३९ हजार खारफुटीची पर्यायी झाडे लावण्यात येतील’, अशी हमी महापालिकेतर्फे देण्यात आली. तसेच या झाडांची १० वर्षे देखभाल व अन्य कामांसाठी एक कोटी ४२ लाख रुपये जमा करण्यात आले आहेत’, असेही महापालिकेतर्फे सांगण्यात आले.