अमोल भालेराव
सध्या देशभरात बाप्पाच्या आगमनाचा उत्साह आहे. बाप्पासाठी घरांपासून ते मंडळांपर्यंत सर्वांनीच जय्यत तयारी केली आहे. अगदी महिनाभर आधीपासूनच आपल्या लाडक्या बाप्पाच्या आगमनाची तयारी सुरु झालेली असते. सुरुवात होती ती बाप्पाची मूर्ती निवडण्यापासून. पण आपल्या देशात जसा बाप्पाचा सण मोठ्या उत्साहात साजरा करतात तसाच सण अमेरिकेतही साजरा करतात. अमिरिकेतही मोठ्या संख्येनं हिंदू लोकं राहतात.त्यामुळे ते तिथेही आपली संस्कृती नक्कीच जपतात.पण तुम्हाला कधी विचार आला आहे का की अमेरिकेत गणेशोत्सव कसा साजरा केला जात असेल. किंवा बाप्पाची मूर्ती कशी असते, कितीला असते. याचं उत्तर जाणून तुम्हाला नक्कीच धक्का बसेल.
अमेरिकेतही मोठ्या उत्साहात गणेशोत्सव साजरा
अमेरिकेतही मोठ्या उत्साहात गणेशोत्सव साजरा केला जातो. विशेष म्हणजे तिथे नैसर्गिक पदार्थांपासून इकोफ्रेंडली गणपती मूर्ती तयार केल्या जातात. अमेरिकेत राहणारे भारतीय नागरिक बाप्पाच्या सुंदर-सुंदर मूर्तींची प्रतिष्ठापना करतात आणि अगदी भारताप्रमाणेच भक्तिभावाने गणरायाची आराधना करतात. त्यामुळे परदेशातही बाप्पाच्या भक्तीचा जागर होताना दिसतो. अमेरिकेतील गणेश मूर्तींचा एक व्हिडीओ सध्या चांगलाच व्हायरल होत आहे.या व्हिडीओमध्ये अमेरिकेतील गणपतीच्या मूर्तींच्या किंमती पाहून तुम्हीही अवाक् व्हाल.
व्हिडीओ travelwithshilpa या इन्स्टाग्राम पेजवरून शेअर
हा व्हिडीओ travelwithshilpa या इन्स्टाग्राम पेजवरून शेअर करण्यात आला आहे. शास्त्रानुसार गणपतीची मूर्ती ही पवित्र आणि नैसर्गिक पदार्थांपासून, विशेषतः मातीपासून तयार केलेली असावी, अशी पारंपरिक मान्यता आहे. मात्र, सध्या देशभरात गणपतीच्या मूर्तींसाठी मोठ्या प्रमाणात प्लास्टर ऑफ पॅरिसचा वापर केला जातो. शाडूच्या मातीची मूर्ती घेणाऱ्यांची संख्या तुलनेने कमी आहे. यामागे एक कारण म्हणजे पीओपीच्या मूर्ती दिसायला अधिक आकर्षक आणि सुबक असतात. शिवाय, मातीच्या मूर्तींच्या तुलनेत त्यांची किंमतही कमी असते. त्यामुळे अनेकजण किंमत आणि आकर्षक स्वरूप पाहून पीओपीच्या मूर्तींना पसंती देतात.
मात्र, अमेरिकेतील चित्र यापेक्षा काहीसं वेगळं असल्याचं जाणवलं. तिथे गणपतीच्या मूर्ती तयार करताना नैसर्गिक पदार्थांना प्राधान्य दिलं जातं. किंबहुना, अमेरिकेतील बहुसंख्य शहरांमध्ये पीओपीच्या मूर्ती सहज उपलब्धही होत नाहीत. त्यामुळे परदेशात राहूनही भारतीय लोक अगदी शास्त्रोक्त पद्धतीने गणेश चतुर्थी साजरी करतात, असं म्हटलं तर वावगं ठरणार नाही.
View this post on Instagram
किती रुपयांना मिळते मूर्ती? किंमत पाहून थक्क व्हाल
आता सगळ्यात मोठा प्रश्न म्हणजे मूर्ती किती रुपयांना मिळते? अमेरिकेत मूर्तींची किंमत त्यांची उंची, आकार आणि सजावट यावर ठरते. या सगळ्या मूर्ती संपूर्णपणे इकोफ्रेंडली असतात. शाडूची माती, चिकणमाती किंवा कागदाच्या लगद्यापासून या मूर्तींची निर्मिती केली जाते. ६ इंचाच्या मूर्ती १५ डॉलर्स म्हणजे जवळपास १,५०० रुपयांना मिळतात. तर, १० इंचाच्या मूर्ती ४५ डॉलर्सला म्हणजे ४,५०० रुपयांना मिळतात.
तसंच, ज्या मूर्तींवर कलाकुसर जास्त केलेली असते, त्या साधारण २०० डॉलर्स म्हणजे जवळपास २० हजार रुपयांना मिळतात. तसंच महाराष्ट्रातील प्रसिद्ध गणपती, जसं की लालबागचा राजा, दगडूशेठ हलवाई गणपती आणि सिद्धिविनायक यांच्या प्रतिकृतीही मिळतात. पण त्यांच्याही किमती १०० डॉलर्सच्या आसपास आहेत.
व्हिडीओ ७ लाख ६१ हजारांहून अधिक वेळा पाहिला गेला
दरम्यान हा व्हिडीओ सध्या एवढा व्हायरल होत आहे की तो आतापर्यंत ७ लाख ६१ हजारांहून अधिक वेळा पाहिला गेला आहे. तसंच, अनेकांनी या व्हिडीओवर विविध प्रकारच्या प्रतिक्रिया दिल्या आहेत. कोणी म्हणतंय,’गणपती बाप्पाची पूजा अमेरिकेतही केली जाते, हे पाहून खूप आनंद झाला.’ तर काहींनी अमेरिकन चलनाच्या दृष्टिकोनातून या मूर्ती फारच स्वस्त मिळतात, अशी प्रतिक्रिया दिली आहे.
