पंढरीच्या श्री विठ्ठल आणि रुक्मिणी मातेच्या भक्तांसाठी महत्त्वाची बातमी आहे. येत्या 23 ते 25 सप्टेंबर दरम्यान श्री विठ्ठल-रुक्मिणी मंदिरातील मूर्तीचे मूळ दर्शन भाविकांसाठी बंद राहणार आहे. मूर्तींच्या दीर्घकालीन जतन व संवर्धन करण्यात येणार आहे.

हे तीन दिवस विठ्ठल आणि रुक्मिणी मातेचं मंदीर भक्तांसाठी बंद

पुरातत्त्व विभागाकडून मूर्तीवर संरक्षक आवरण म्हणजे लेपन लावण्यात आहे. त्यामुळे हा निर्णय घेतला असून भाविकांनी सहकार्य करावे, असे आवाहन मंदिर समितीचे सहअध्यक्ष ह.भ.प. गहिनीनाथ महाराज औसेकर यांनी केले आहे.त्यामुळे 23 ते 25 सप्टेंबर या कालावधीत पंढरपूरच्या श्री विठ्ठल रुक्मिणी मंदिर हे मुखदर्शन आणि पदस्पर्श अशा दोन्ही दर्शनासाठी पूर्णपणे बंद असणार आहे.

मूर्तींवर संवर्धन प्रक्रिया होणार

भारतीय पुरातत्त्व सर्वेक्षण विभागाच्या मार्गदर्शनाखाली श्री विठ्ठल आणि रुक्मिणी मातेच्या मूर्तीचे संवर्धन कार्य पार पडणार आहे. यासंदर्भात 13 सप्टेंबर रोजी पुरातत्त्व विभागाचे अधिकारी आणि मंदिर समिती सल्लागार व परिषद सदस्यांची दूरदृश्यप्रणालीद्वारे बैठक पार पडली. यापूर्वी 1988, 2005, 2012 आणि 2020 मध्ये मूर्तींवर संवर्धन प्रक्रिया करण्यात आली होती. शेवटच्या संवर्धनाला पाच वर्षांचा काळ उलटल्याने नियमित देखभालीचा भाग म्हणून हे काम केले जात आहे.

कोल्हापूर खंडपीठाच्या आदेश अन् रासायनिक लेपन 

श्री विठ्ठल आणि रुक्मिणी मातेच्या मूर्ती संवर्धनाच्या दृष्टिकोनातून विठ्ठल मूर्तीवर पूरातत्व विभागाच्या सल्ल्याने रासायनिक लेपण प्रक्रिया होणार आहे. जून महिन्यातच ही रासायनिक लेपण प्रक्रिया होणार होती. मात्र रासायनिक लेपण की आयुर्वेदिक लेपन या प्रश्नावर न्यायालयीन लढाई झाल्यानंतर अखेर कोल्हापूर खंडपीठाच्या आदेशाने पुरातत्व विभागाच्या सल्ल्यानेच विठ्ठल मूर्तीवर रासायनिक लेपन प्रक्रिया येत्या 23 ते 25 सप्टेंबर रोजी पंढरपुरात होणार आहे असे मंदिर प्रशासनाने कळवले आहे.

मूर्तींची झिज होत आहे

पंढरपूर मंदिरात श्री विठ्ठल आणि रुक्मिणी मातेच्या दर्शनासाठी लाखो लोक दर्शनासाठी येत असतात. मंदिरात दरवर्षी लाखो भाविक भेट देत असतात. मंदिरातील विठ्ठल आणि रुक्मिणी मूर्तींची झिज होत आहे.त्यामुळे ठराविक काळानंतर या मूर्तींना लेपन करण्यात येते. या काळात मंदिर भाविकांना दर्शनासाठी परवानगी नाकारण्यात येत असते.

भाविकांनी या काळात मंदिर समितीला सहकार्य करण्याचे आवाहन

मूर्तीचे जतन आणि संवर्धन ही मंदिर समितीची प्राथमिक जबाबदारी आहे. या प्रक्रियेत मूर्तीचे प्राचीन स्वरूप, धार्मिक परंपरा आणि भाविकांच्या श्रद्धेचा पूर्ण आदर ठेवून अत्यंत पारदर्शक पद्धतीने काम केले जाईल, असा विश्वास सहअध्यक्ष औसेकर यांनी व्यक्त केला. पुणे पुरातत्त्व विभागाचे सहाय्यक संचालक डॉ. विलास वाहणे यांच्या प्रत्यक्ष देखरेखीखाली हे तांत्रिक काम पूर्ण केले जाणार आहे. भाविकांनी या काळात मंदिर समितीला सहकार्य करावे, असे आवाहन करण्यात आले आहे.