jj-mahanagar-blood-bank-maya-blood-centre-fda-action`

मुंबई : रक्तसुरक्षेच्या दृष्टीने अत्यंत महत्त्वाची बातमी समोर आली आहे. अन्न व औषध प्रशासनाने जे. जे. महानगर रक्तपेढी आणि बदलापूर येथील माया ब्लड सेंटर यांच्यावर मोठी कारवाई करत दोन्ही रक्तपेढ्यांचे कामकाज पुढील आदेशापर्यंत तात्काळ बंद करण्याचे आदेश दिले आहेत.

या आदेशानुसार दोन्ही रक्तपेढ्यांना रक्तसंकलन, रक्तघटक निर्मिती, रक्ताची तपासणी, साठवणूक, वितरण, विक्री, रक्तदान शिबिरांचे आयोजन तसेच रक्तपेढीशी संबंधित सर्व प्रकारचे कामकाज तात्काळ बंद ठेवण्याचे निर्देश देण्यात आले आहेत.

या दोन्ही रक्तपेढ्यांबाबत अन्न व औषध प्रशासनाकडे विविध तक्रारी प्राप्त झाल्या होत्या. त्या तक्रारींची गंभीर दखल घेत FDA आणि केंद्रीय औषध मानक नियंत्रण संस्थेच्या पथकाने तपासणी केली. या तपासणीत जे. जे. रक्तपेढीमध्ये रक्तसंकलन, साठवणूक, तपासणी, गुणवत्ता नियंत्रण आणि अभिलेख ठेवण्यासंदर्भातील नियमांच्या पालनात त्रुटी आढळल्याचे निदर्शनास आले.

औषधे व सौंदर्य प्रसाधने अधिनियम आणि संबंधित नियमांचे गंभीर उल्लंघन झाल्याचे आढळल्यानंतर FDA ने ही कारवाई केली आहे.

तर बदलापूर येथील माया ब्लड सेंटरमध्येही अनेक गंभीर अनियमितता समोर आल्या आहेत. रक्तदान शिबिरांमधून संकलित रक्ताच्या वाहतुकीसंदर्भातील आवश्यक नोंदी उपलब्ध नसणे, रक्तपिशव्यांच्या शोधक्षमतेतील त्रुटी, रक्तसंक्रमण अधिकारी आणि आवश्यक तांत्रिक कर्मचाऱ्यांची अनुपस्थिती, उपकरणांचे कालबाह्य प्रमाणीकरण, गुणवत्ता नियंत्रण चाचण्यांचा अभाव, जैववैद्यकीय कचरा व्यवस्थापनातील अनियमितता, तसेच रक्तदान शिबिरांसाठी आवश्यक मंजुरी आणि अभिलेखांचा अभाव आढळल्याचे सांगण्यात आले आहे.

रक्त ही जीवनरक्षक बाब असून त्याच्या संकलन, प्रक्रिया आणि वितरणामध्ये सर्वोच्च दर्जाची गुणवत्ता, सुरक्षितता आणि पारदर्शकता राखणे अत्यावश्यक आहे. रक्तदाता आणि रुग्णांच्या आरोग्याशी संबंधित निष्काळजीपणा किंवा नियमभंग सहन केला जाणार नाही, असा स्पष्ट इशारा अन्न व औषध प्रशासनाने दिला आहे.

“रक्तपेढ्यांनी कायद्यातील तरतुदींचे काटेकोर पालन न केल्यास कठोर कारवाई करण्यात येईल. नागरिकांना सुरक्षित रक्त मिळण्यासाठी प्रशासन कटिबद्ध आहे,” असे अन्न व औषध प्रशासनाचे आयुक्त तुकाराम मुंढे यांनी सांगितले.

ही कारवाई राज्यातील इतर रक्तपेढ्यांसाठीही मोठा इशारा मानली जात आहे. रुग्णांच्या जीवाशी संबंधित असलेल्या रक्तसाठा आणि रक्तपुरवठा व्यवस्थेत नियमांचे पालन होणे अत्यंत गरजेचे आहे