श्रीवर्धन.
श्रीवर्धनच्या राजकारणात महाभूकंप!

प्रतिनिधी -संदेश घोलप,
नगराध्यक्ष ॲड. अतुल चौगुले यांचा शेकडो कार्यकर्त्यांसह शिवसेनेत भव्य प्रवेश; उपमुख्यमंत्री एकनाथ शिंदे यांच्या उपस्थितीत मुंबईतील ‘नंदनवन’वर ऐतिहासिक सोहळा
दक्षिण रायगडच्या राजकीय समीकरणांना मोठा हादरा; आगामी निवडणुकांपूर्वी नव्या शक्तिसंतुलनाची नांदी
​या घडीची सर्वात मोठी, खळबळजनक आणि अधिकृत बातमी थेट मुंबईतून समोर येत आहे! दक्षिण रायगडच्या राजकारणातील सर्वात मोठा राजकीय भूकंप अखेर आज प्रत्यक्षात येत आहे.
​गेल्या काही दिवसांपासून सुरू असलेल्या सर्व चर्चांना पूर्णविराम मिळाला असून, श्रीवर्धन नगरपरिषदेचे नगराध्यक्ष ॲडव्होकेट अतुल चौगुले आज संध्याकाळी अधिकृतपणे शिवसेना शिंदे गटात जाहीर प्रवेश करत आहेत! उद्धव ठाकरे गटाला हा दक्षिण रायगडमधील आतापर्यंतचा सर्वात मोठा धक्का मानला जात आहे!

शिवसेनेचे मुख्य प्रतोद तथा महाड विधानसभेचे आमदार भरतशेठ गोगावले यांच्या नेतृत्वाखाली आणि मार्गदर्शनाखाली ही ऐतिहासिक राजकीय मोर्चेबांधणी पूर्ण झाली आहे.
​आज मंगळवार, दिनांक २३ जून रोजी संध्याकाळी, मुंबईतील उपमुख्यमंत्र्यांचे शासकीय निवासस्थान असलेल्या ‘नंदनवन’ बंगल्यावर हा हायव्होल्टेज सोहळा पार पडणार आहे. स्वतः राज्याचे उपमुख्यमंत्री सन्मा. एकनाथजी शिंदे साहेब यांच्या प्रमुख उपस्थितीत ॲड. अतुल चौगुले आणि त्यांचे शेकडो कट्टर समर्थक आज अधिकृतपणे हाती धनुष्यबाण हाती घेणार आहेत.
​या ऐतिहासिक सोहळ्यासाठी रायगड लोकसभा संपर्क प्रमुख अनिल नवगणे आणि दक्षिण रायगड जिल्हा प्रमुख प्रमोदजी घोसाळकर यांच्यासह श्रीवर्धनमधील अनेक आजी-माजी नगरसेवक आणि पदाधिकारी मुंबईत दाखल झाले आहेत.

ॲड. अतुल चौगुले हे केवळ श्रीवर्धन शहरापुरते मर्यादित नसून, संपूर्ण तालुक्यात व मतदार संघात एक सुशिक्षित आणि दांडगा जनसंपर्क असलेला चेहरा म्हणून ओळखले जातात. त्यांनी उद्धव ठाकरे गटातून थेट सत्ताधारी शिंदे गटात जाण्याचा निर्णय घेतल्यामुळे दक्षिण रायगडमध्ये ठाकरे गटाला मोठी पडझड सहन करावी लागणार आहे. आगामी नगरपरिषद आणि जिल्हा परिषद निवडणुकांच्या तोंडावर या प्रवेशामुळे विरोधकांचे धाबे दणाणले असून, स्थानिक पातळीवर शिवसेनेचे पारडे कमालीचे जड झाले आहे.