केंद्रीय गृह आणि सहकारमंत्री अमित शहा दोन दिवसांच्या मुंबईत दौऱ्यावर आले आहेत. त्यांच्या उपस्थितीत दोन महत्त्वाचे कार्यक्रम पार पडणार आहेत. तसेच अमित शहा हे मुंबई विभागीय भाजप आणि प्रदेश भाजपच्या नेत्यांसोबत बैठक घेत राजकीय आढावा घेणार असल्याचे सांगण्यात आलं आहे.

सहकार क्षेत्राला बळकटी देण्यासाठी काय आहे प्लान 

सकाळी 11 वाजता नॅशनल अर्बन को-ऑपरेटिव्ह फायनान्स अँड डेव्हलपमेंट कॉर्पोरेशनच्या नवनिर्मित मुख्यालयाचे अमित शहांच्या हस्ते अधिकृतरित्या उद्‌घाटन करण्यात येणार आहे. सहकार क्षेत्राला बळकटी देण्यासाठी या संस्थेचं नवीन कार्यालय बांधण्यात आलं आहे. या कार्यालयाच्या उद्घाटन सोहळ्याला सहकार आमि बँकिंग क्षेत्रातील वरिष्ठ पदाधिकारी आणि मान्यवर उपस्थित राहणार आहेत. यानंतर, तसेच मुंबई शेअर बाजारातील इंटरनॅशनल कन्व्हेन्शन सेंटर आयोजित कार्यक्रमाला प्रमुख पाहुणे म्हणून देखील ते हजेरी लावणार आहे. दोन्ही कार्यक्रमांत सहकार आणि आर्थिक क्षेत्रातील दिग्गजांशी संवाद साधणार असल्याचे कळतंय. या दौऱ्यादरम्यान राज्यातील प्रमुख नेत्यांची भेट होण्याची शक्यता आहे.

अमित शहा शुक्रवारी रात्रीच मुंबईत पोहोचले

केंद्रीय गृहमंत्री अमित शहा हे शुक्रवारी रात्री साडेनऊ वाजता विमानाने मुंबईत पोहोचले. मुंबई अमित शहा यांच्या स्वागतासाठी मुख्यमंत्री देवेंद्र फडणवीस यांनी हजेरी लावली. मुख्यमंत्र्‍यांनी पुष्पगुच्छ देऊन केंद्रीय गृहमंत्री अमित शहा यांचं स्वागत केलं. शहा यांचे मुंबईच्या विमानतळावर आगमन झालं, त्यावेळी स्वागताला उपमुख्यमंत्री एकनाथ शिंदे देखील होते. यावेळी मंत्री मंगलप्रभात लोढा देखील होते.

पुण्याचा दौरा विरोधकांच्या आंदोलनामुळे चर्चेत

तत्पूर्वी, काही दिवसांपूर्वी अमित शहा पुणे दौऱ्यावर आले होते.त्यांच्या पुण्याचा दौरा विरोधकांच्या आंदोलनामुळे चर्चेत राहिला. पुण्यात काँग्रेस, वंचित बहुजन आघाडीने अमित शहांच्या पुणे दौऱ्यादरम्यान आंदोलन केलं. तसेच त्यांनी पुण्यात लोकमान्य टिळक पुरस्कार सोहळ्याला हजेरी लावली होती. या सोहळ्यात त्यांच्या हस्ते राष्ट्रीय सुरक्षा सल्लागार अजित डोभाल यांना टिळक पुरस्काराने सन्मानित करण्यात आले होते. या पुरस्कार सोहळ्यात अमित शहा यांनी देशातील घडामोडींवर भाष्य केलं नव्हतं. परंतु आता मुंबईतील दौऱ्यावर देशातील घडामोडींवर काय भाष्य करतात, याकडे साऱ्यांचं लक्ष लागलं आहे.