प्रवाशांच्या समस्यांवर मनसेची भूमिका आक्रमक; स्टेशन मास्तरांना निवेदन

मुंबई : मालाड रेल्वे स्थानकावर प्रवाशांना भेडसावणाऱ्या विविध समस्यांबाबत महाराष्ट्र नवनिर्माण सेना (मनसे) आक्रमक झाली आहे. स्थानकावर छताची अपुरी व्यवस्था, स्वच्छतागृहांची कमतरता, तिकीट घरांतील गैरसोयी तसेच इतर मूलभूत सुविधांचा अभाव यामुळे प्रवाशांना दररोज त्रास सहन करावा लागत असल्याच्या तक्रारी सातत्याने पुढे येत आहेत.

या पार्श्वभूमीवर आज महाराष्ट्र नवनिर्माण सेना मालाड पश्चिम व कांदिवली विधानसभा यांच्या वतीने मालाड रेल्वे स्थानकाचे स्टेशन मास्तर श्री. संतोष परब यांची भेट घेण्यात आली. यावेळी प्रवाशांच्या विविध मागण्यांचे आणि समस्यांचे सविस्तर निवेदन त्यांना देण्यात आले.

मनसेच्या पदाधिकाऱ्यांनी स्थानक परिसरातील व प्लॅटफॉर्मवरील गैरसोयी दूर करून प्रवाशांना आवश्यक सुविधा तातडीने उपलब्ध करून देण्याची मागणी केली. तसेच रेल्वे प्रशासनाला १० दिवसांची मुदत देण्यात आली असून या कालावधीत प्रश्न मार्गी लागले नाहीत, तर मनसेच्या वतीने तीव्र आंदोलन छेडण्यात येईल, असा इशाराही देण्यात आला.

“प्रवाशांना मूलभूत सुविधा उपलब्ध करून देणे ही रेल्वे प्रशासनाची जबाबदारी आहे. मालाड रेल्वे स्थानकावरील प्रलंबित प्रश्न तातडीने सोडवावेत, अन्यथा मनसे स्टाईलने आंदोलन करण्यात येईल,” असे यावेळी पदाधिकाऱ्यांनी स्पष्ट केले.