मुखदर्शन असो वा चरणस्पर्श, ‘नवसाला पावणारा’ म्हणून ख्याती असलेल्या मुंबईतील लालबागच्या राजाच्या दर्शनासाठी दरवर्षी देशभरातून लाखो भाविक लालबाग-परळच्या गल्लीबोळात दाखल होत असतात. बाप्पाच्या चरणी नतमस्तक होण्यासाठी भाविक तासनतास, अगदी दिवस-दिवस रांगेत उभे राहतात. मात्र, लालबागच्या राजाच्या मंडपात दरवर्षीप्रमाणे यंदाही सर्वसामान्य भाविकांना पुन्हा एकदा धक्काबुक्की, फरफट आणि अपमानच आल्याचे विदारक अनुभव अनुभवायला मिळाला आहे. तर, दुसरीकडे मात्र VIP लोक, राजकीय नेते, उद्योगपती आणि सेलिब्रिटींसाठी रेड कार्पेट अंथरून त्यांना अगदी सोयीचं दर्शन देत असल्याचं पाहायला मिळत आहे.

व्हीआयपींना रेड कार्पेट, सामान्यांना तुडवण्याची वेळ

सोशल मीडियावर सध्या लालबागच्या राजाच्या दर्शनादरम्यानचे काही संतापजनक व्हिडिओ मोठ्या प्रमाणावर व्हायरल होत आहेत. बॅरीगेड ओलांडून बाप्पाच्या दर्शनासाठी जाणारी भाविकांची प्रचंड गर्दी अक्षरशः एकमेकांना तुडवत पुढे सरकताना दिसत आहे. यामध्ये महिला, वृद्ध आणि लहान मुलांचे हाल होत आहेत.

एकीकडे उद्योगपती, बॉलीवूड अभिनेते, क्रिकेटपटू आणि बडे राजकीय नेते बाप्पाच्या चरणी सावकाश बसून, चरणस्पर्श करत विविध अँगलने फोटो काढताना दिसतात. तर दुसरीकडे, तासनतास रांगेत उभे राहून बाप्पाच्या जवळ पोहोचणाऱ्या सर्वसामान्य भक्ताला दर्शनासाठी सेकंदभरही उभे राहू न देता कार्यकर्ते थेट कॉलर, कपडे किंवा हात धरून पुढे ढकलून देत आहेत.

पोलिसांची मुजोरी आणि कार्यकर्त्यांची दादागिरी

यंदा लालबागच्या राजाच्या मंडपात केवळ भाविकांचीच नव्हे, तर माध्यमांचीही अडवणूक झाल्याचे प्रकार समोर आले आहेत. अधिकृत ओळखपत्र असलेल्या पत्रकारांना वृत्त संकलनापासून रोखत पोलिसांनी मुजोरी दाखवल्याचे आरोप झाले आहेत. त्यातच एका धक्कादायक घटनेने सुरक्षेचा आणि कार्यकर्त्यांच्या दादागिरीचा प्रश्न उपस्थित केला आहे. दर्शनासाठी बनावट ओळखपत्र वापरणाऱ्या एका भाविकाला पकडल्यानंतर त्याला पोलिसांच्या स्वाधीन करण्याऐवजी मंडळाच्या कार्यकर्त्यांनीच अक्षरशः गुन्हेगारासारखी बेदम मारहाण केली. कायद्याचा बडगा स्वतःच्या हातात घेणाऱ्या कार्यकर्त्यांच्या या मुजोरीवर तीव्र संताप व्यक्त केला जात आहे.

बनावट ओळखपत्रे अन् चोरीच्या घटनांनी गोंधळ

दरवर्षीप्रमाणे यंदाही व्हीआयपी पासेस, बनावट ओळखपत्रांचा सुटलेला सुळसुळाट, महिला भाविकांना होणारी धक्काबुक्की आणि चेंगराचेंगरीसदृश परिस्थितीमुळे लालबागच्या राजाची ‘व्हीआयपी संस्कृती’ पुन्हा एकदा तीव्र वादाच्या भोवऱ्यात सापडली आहे.

सर्वसामान्य नागरिकांमध्ये संतप्त सूर

दर्शनाच्या नावाखाली होणारी मोबाईल चोरी, पाकिटमारी, तासनतास रांगेत उभे राहून होणारी पायपीट आणि उकाड्याने चक्कर येऊन पडणाऱ्या भाविकांचे हाल पाहता, “अशा अव्यवस्थेत आणि अपमानात रांगेत उभे राहण्यापेक्षा आपल्या घरीच बाप्पाची मनोभावे आरती करा आणि पाया पडा,” असा संतप्त सूर आता सर्वसामान्य नागरिकांमधून व्यक्त होत आहे.