अमोल भालेराव
सध्या सर्वत्र गणेशोत्सवाचा उत्साह आहे. पुणे आणि मुंबई या दोन्ही शहरांतील प्रसिद्ध गणपतीच्या दर्शनासाठी भाविकांची मोठी गर्दी होताना दिसत आहे. त्यातील एक नाव म्हणजे अर्थातच मुंबईचा लालबागचा राजा. सर्वांनाच लालबागच्या राजाचं विशेष आकर्षण असतं. अगदी देश-विदेशातून भाविक लालबागच्या दर्शनासाठी येतात. दरवर्षीप्रमाणे या वर्षीदेखील मुंबईतील लालबागच्या राजाच्या दर्शनासाठी रोज हजारो भाविक गर्दी करत आहेत.लालबागचा राजा म्हणजे मुंबईकरांचं श्रद्धास्थान आणि नवसाला पावणारा गणपती बाप्पा अशी ख्याती आहे.
भाविकांकडून पहिल्याच दिवशी बाप्पाच्या चरणी लाखो रुपयांचे दान
पहिल्याच दिवसापासून सेलिब्रिटी, दिग्गज नेते आणि सर्वसामान्य भाविकांचीनीही राजाचे दर्शन घेण्यासाठी धाव घेतली आहे. भाविकांनी पहिल्याच दिवशी बाप्पाच्या चरणी लाखो रुपयांचे दान दिले आहे. चरणस्पर्श दर्शनासह मुखदर्शनसाठीही राजाचरणी मोठी गर्दी होत असून भाविकांकडून भरभरुन दानही अर्पण केलं जात आहे. आपल्या नवसाची पूर्तता, आणि नवसाची मागणी करत भाविकांकडून रोख, आणि मौल्यवान वस्तूंच्या रुपाने बाप्पाचरणी दान अर्पण केलं जात आहे. आज दुसऱ्या दिवशी तब्बल ८८ लाख ९० हजारांचे दान प्राप्त झाले आहे.
सोने-चांदी दागिने सोबतच रोकडचे किती दान
लालबागच्या राजा चरणी भाविकांकडून भक्तीभावाने आणि मोठ्या श्रद्धेने दान अर्पण केलं जात असून पहिल्याच दिवशी ४८ लाख ५० हजार रुपयांचं दान अर्पण करण्यात आलंय. तर, बाप्पाच्या चरणी दुसऱ्या दिवशी देखील भाविकांनी भरभरून दान दिलंय.यामध्ये रोख रक्कम, त्यासोबतच सोने-चांदी दागिने या सगळ्याचा समावेश आहे. मागील वर्षी ४६ लाख रुपयांचे दान पहिल्या दिवशी अर्पण करण्यात आलं होते. लालबाग राजाच्या स्टेज पेटीमध्ये ५९ लाख ७० हजार रुपयांचे दान तर रंग पेटीमध्ये २१ लाख ३० हजार रुपयांचे दान अर्पण झालंय. त्यामध्ये, दुसऱ्या दिवशी २२६ ग्रॅम सोनं आणि ५५१६ ग्रॅम चांदीच्या वस्तू दान करण्यात आल्या आहेत. त्यामुळे, पहिल्या दोन दिवसांत राजाच्या चरणी १ कोटी ३७ लाख ४० हजार रुपयांचे दान प्राप्त झालं आहे.
सोने चांदी – पहिल्या दिवशीचं दान
सोन ६६.७७० ग्राम
चांदी २८०६.००० ग्राम
दुसऱ्या दिवशी मौल्यवान वस्तू
सोनं – २२६ ग्रॅम
चांदी – ५५१६ ग्रॅम
अशा पद्धतीने दरवर्षी प्रमाणे सोनं, चांदी अन् नोटांचे हार, लालबाग राजाच्या चरणी पहिल्याच दिवशी लाखोंची देणगी अर्पण झाल्याचं पाहायला मिळालं.
