अमोल भालेराव
नीट पेपर फुटी प्रकरणात देशभरातील युवा वर्ग आक्रमक झाला असून शिक्षणमंत्री धर्मेंद्र प्रधान यांच्या राजीनाम्यासाठी जंतरमंतरवर आंदोलन सुरु आहेत. हे आंदोलन आता फक्त दिल्लीपर्यंत मर्यादित न राहता त्याचे पडसाद देशभर पसरले आहेत. गेल्या अनेक दिवसांपासून कॉकरोज जनता पार्टीने सरकार विरोधात आंदोलनाचा पवित्रा घेतला आहे. पण याबाबत आता एक महत्त्वाची माहिती समोर आली आहे.
सोनम वांगचुक यांनी अखेर उपोषण सोडलं
सोनम वांगचुक यांनी अखेर उपोषण सोडलं आहे. २६ दिवसांनंतर सोनम वांगचुक यांनी उपोषण सोडलं आहे. विद्यार्थी आंदोलनांच्या पार्श्वभूमीवर गुरुवारी रात्री उशिरा अनेक घडामोडी घडल्या आहेत.सरकारने पेपरफुटीशी संबंधित प्रकरणांसाठी फास्ट ट्रॅक कोर्टाची स्थापना केली आहे. तसेच शिक्षण सचिवांची बदलीही करण्यात आली होती. एवढंच नाही तर पंतप्रधान नरेंद्र मोदी यांनी विद्यार्थ्यांना कठोर कारवाईचे आश्वासन देणारा व्हिडिओ संदेशही जारी केला.
गुरुवारी मध्यरात्री काय घडामोडी घडल्या?
केंद्र सरकारने शिक्षण सचिव विनीत जोशी यांची शिक्षण मंत्रालयातून बदली करण्यात आली आहे.नरेश पाल गंगवार यांची शिक्षण विभागाचे नवीन सचिव म्हणून नियुक्ती करण्यात आली. विनीत जोशी यांची आता पंचायत राज मंत्रालयात सचिव म्हणून नियुक्ती करण्यात आली आहे. त्यांच्यासोबत इतर १० वरिष्ठ आयएएस अधिकाऱ्यांच्या बदल्या करण्यात आल्या.
एवढंच नाही पेपरफुटी प्रकरणांशी संबंधित खटल्यांची सुनावणी करण्यासाठी जलदगती न्यायालयाची अधिसूचना जारी करण्यात आली आहे. दिल्लीच्या राऊस ॲव्हेन्यू न्यायालयात जलदगती न्यायालय स्थापन केले जाईल. दिल्ली उच्च न्यायालयाने तीस हजार न्यायालयातील मध्यस्थी केंद्राच्या प्रभारी न्यायाधीश, न्यायमूर्ती अनु ग्रोव्हर बलिगा यांची राऊस ॲव्हेन्यू न्यायालयात विशेष न्यायाधीश म्हणून बदली करण्यात आली आहे. त्या पेपरफुटीशी संबंधित खटल्यांची सुनावणी करणार असल्याचं सांगण्यात आलं आहे.
पंतप्रधान नरेंद्र मोदी यांनी विद्यार्थ्यांसाठी एक व्हिडिओ जारी
दरम्यान सकाळी ११:५२ वाजता पंतप्रधान नरेंद्र मोदी यांनी विद्यार्थ्यांसाठी एक व्हिडिओ जारी केला. त्यांनी पेपरफुटीसारख्या घटनांविरोधात कठोर कारवाई करण्याचे आश्वासन दिले. ते म्हणाले की, ‘जे तरुणांचे भविष्य धोक्यात घालतील त्यांना सोडणार नाही आणि दोषींवर कठोर कारवाई केली जाईल. शुक्रवारी मंत्रिमंडळात पेपरफुटीविरोधात अधिक कठोर निर्णय घेतला जाईल’,असं आश्वासन त्यांनी दिले.
More strict actions against paper leaks to come in tomorrow’s Cabinet! pic.twitter.com/NRysBukk5U
— Narendra Modi (@narendramodi) July 23, 2026
त्यानंतर सोनम वांगचुक यांनी उपोषण सोडल्याची बातमी समोर आली. केंद्रीय आरोग्य मंत्री जेपी नड्डा आणि केंद्रीय राज्यमंत्री जितेंद्र सिंह त्यांचे उपोषण सोडण्यासाठी गुरुग्राममधील मेदांता रुग्णालयात दाखल झाले. वांगचुक २६ दिवसांपासून उपोषणावर होते. उपोषण सोडल्यानंतर त्यांनी सांगितले की देशातील संभाव्य हिंसाचाराचा विचार करून त्यांनी उपोषण सोडले आहे.
शुक्रवार हा दिवसही खूप घडामोडींचा
शुक्रवार हा दिवसही खूप घडामोडींचा असणार आहे. कॉकरोच जनता पार्टीने शुक्रवारी देशव्यापी आंदोलनाची घोषणा केली आहे. सीजेपीने एक पोस्टर प्रसिद्ध करून लोकांना सर्व जिल्ह्यांमध्ये आणि शहरांमध्ये शांततेने एकत्र येऊन शांततापूर्ण निदर्शने करण्याचे आवाहन केले आहे. जंतर मंतर येथे विद्यार्थ्यांवर झालेल्या हिंसाचाराचा निषेध करण्याचे आवाहन या आंदोलनात करण्यात आले आहे.
पेपरफुटीबाबत कठोर निर्णय घेतला जाण्याची शक्यता
या आंदोलनासाठी दिल्लीत कडक सुरक्षा व्यवस्था ठेवण्यात आली आहे. दिल्ली मेट्रोनेही सकाळी ७:३० पासून १६ मेट्रो स्टेशन्स बंद केली आहेत. याव्यतिरिक्त, शुक्रवारी मंत्रिमंडळाची बैठक होणार आहे. ही बैठक महत्त्वाची आहे कारण यात पेपरफुटीबाबत कठोर निर्णय घेतला जाण्याची शक्यता आहे.
दरम्यान व्हिडिओमध्ये पंतप्रधान मोदींनी सांगितले की,फास्ट ट्रॅक कोर्टाची स्थापना आणि कठोर शिक्षेच्या तरतुदींचा समावेश असलेल्या विधेयकाच्या मसुद्यावर शुक्रवारी मंत्रिमंडळात चर्चा केली जाणार आहे.हे विधेयक सभागृहात लवकरात लवकर मंजूर केले जाईल, असेही मोदींनी सांगितलं आहे.
