सामाजिक,शैक्षणिक आणि पर्यावरणविषयक उपक्रमांमध्ये सातत्याने पुढाकार घेणारे युवा कार्यकर्ते आदित्य संजय सुतार यांच्या कार्याची शिवसेना पक्षप्रमुख उद्धव बाळासाहेब ठाकरे आणि युवासेना प्रमुख आदित्य ठाकरे यांनी दखल घेतली आहे. आदित्य सुतार यांची मालाड पश्चिम विधानसभा क्षेत्राच्या विभाग युवा अधिकारीपदी नियुक्ती करण्यात आली आहे.

कायम सामाजिक उपक्रमांमध्ये सहभाग

आदित्य सुतार यांनी मढ परिसरातील सामाजिक प्रश्नांवर सातत्याने आवाज उठवत युवकांना संघटित करण्याचे काम केले आहे. मढ आणि आसपासच्या समुद्रकिनाऱ्यांवर राबवण्यात आलेल्या बीच स्वच्छता मोहिमांमध्ये त्यांनी सक्रिय सहभाग घेतला. पर्यावरण संरक्षणाचा संदेश नागरिकांपर्यंत पोहोचवत तरुणांना स्वच्छता आणि सामाजिक जबाबदारीच्या उपक्रमांमध्ये सहभागी करून घेण्यासाठी त्यांनी पुढाकार घेतला.

शैक्षणिक क्षेत्रातही आदित्य सुतार यांचे उल्लेखनीय कार्य

शैक्षणिक क्षेत्रातही आदित्य सुतार यांचे कार्य उल्लेखनीय राहिले आहे. परिसरातील गुणवंत विद्यार्थ्यांचा सत्कार करून त्यांना पुढील शिक्षणासाठी प्रोत्साहन देणे, विद्यार्थ्यांच्या अडचणी समजून घेणे आणि त्यांच्या प्रश्नांच्या सोडवणुकीसाठी संबंधित प्रशासनाकडे पाठपुरावा करणे, अशा विविध उपक्रमांमध्ये ते नेहमीच अग्रेसर राहिले आहेत.

युवकांच्या समस्या सोडवण्यासाठी धडपड

विद्यार्थ्यांना शैक्षणिक सुविधा,प्रवास, प्रवेशप्रक्रिया तसेच इतर अडचणींचा सामना करावा लागल्यास त्यांच्या मदतीसाठी तत्परतेने धावून जाणारा युवा कार्यकर्ता म्हणून त्यांनी परिसरात स्वतःची वेगळी ओळख निर्माण केली आहे. युवकांच्या समस्या, रोजगार, शिक्षण आणि सामाजिक उपक्रमांच्या माध्यमातून त्यांना योग्य व्यासपीठ उपलब्ध करून देण्याचा त्यांचा सातत्यपूर्ण प्रयत्न राहिला आहे.

युवा अधिकारीपदाची महत्त्वपूर्ण जबाबदारी

त्यांच्या या सामाजिक आणि संघटनात्मक कामाची दखल घेत युवासेना प्रमुख आदित्य ठाकरे यांच्या नेतृत्वाखाली आदित्य सुतार यांच्यावर विभाग युवा अधिकारीपदाची महत्त्वपूर्ण जबाबदारी सोपवण्यात आली आहे. या नियुक्तीमुळे मालाड पश्चिम विधानसभा आणि मढ परिसरातील युवासेनेच्या संघटनात्मक कार्याला अधिक बळ मिळेल, असा विश्वास पदाधिकारी आणि कार्यकर्त्यांनी व्यक्त केला आहे.

शुभेच्छांचा वर्षाव

नियुक्तीनंतर आदित्य सुतार यांच्यावर शिवसेना उद्धव बाळासाहेब ठाकरे पक्षाचे पदाधिकारी, युवासैनिक, स्थानिक नागरिक, विद्यार्थी, सामाजिक कार्यकर्ते आणि मित्रपरिवाराकडून शुभेच्छांचा वर्षाव होत आहे.

नवीन जबाबदारीच्या माध्यमातून युवकांचे प्रश्न अधिक प्रभावीपणे मांडून शिक्षण, रोजगार, पर्यावरण आणि नागरिकांच्या मूलभूत समस्यांसाठी काम करण्याचा संकल्प आदित्य सुतार यांनी व्यक्त केला आहे.