महाराष्ट्र नवनिर्माण सेनेचे अध्यक्ष राज ठाकरे आणि अमित ठाकरे यांच्या आगामी ९ ऑगस्टच्या रायगड जिल्हा दौऱ्यापूर्वी पक्षाला मोठा राजकीय धक्का बसला आहे. वरिष्ठ नेते दौऱ्याच्या तयारीला लागले असतानाच, दुसरीकडे दक्षिण रायगड आणि श्रीवर्धन तालुक्यात मनसेतील अंतर्गत असंतोष चव्हाट्यावर आला आहे.

श्रीवर्धन तालुका प्रसार माध्यम प्रमुखांचा राजीनामा

गेल्या ५ वर्षांपासून श्रीवर्धन तालुका प्रसार माध्यम प्रमुख म्हणून जबाबदारी सांभाळणारे सुनील विठोबा रिकामे यांनी आपल्या पदाचा स्वेच्छेने राजीनामा दिला आहे. त्यांनी आपला राजीनामा तालुकाध्यक्ष मृदासभाई काशिनाथ तोंडलेकर यांच्याकडे सोपवला.

वैयक्तिक कारणास्तव हा निर्णय घेतल्याचे पत्रात त्यांनी नमूद केले असले, तरी “मी पक्षातील पदाचा राजीनामा देत असून, माझी निष्ठा कालही, आजही आणि यापुढेही राजसाहेब ठाकरे व संपूर्ण ठाकरे परिवाराप्रती कायम राहील,” असे स्पष्ट करत त्यांनी आपली भूमिका मांडली आहे.

वरिष्ठ नेत्याच्या मनमानी कारभारामुळे कार्यकर्त्यांमध्ये नाराजी

मिळालेल्या माहितीनुसार, दक्षिण रायगडमधील एका वरिष्ठ नेत्याच्या मनमानी आणि अहंकारी वागण्याला कंटाळून कार्यकर्ते अत्यंत नाराज झाले आहेत. या गैरवर्तनामुळेच स्थानिक कार्यकर्त्यांमध्ये प्रचंड असंतोष निर्माण झाला असून, येत्या काही दिवसांत अनेक महत्त्वाचे पदाधिकारी राजीनामा देण्याच्या तयारीत असल्याचे समजते.

राज ठाकरेंचा ९ ऑगस्टचा रायगड दौरा कसा असणार?

नवीन कार्यालयांचे उद्घाटन: मनसे नेते संदीप देशपांडे यांनी पोलादपूर येथील पत्रकार परिषदेत या दौऱ्याची अधिकृत घोषणा केली होती. दौऱ्यादरम्यान मुख्य कार्यक्रम म्हणजे माणगाव, पेण आणि पनवेल येथे पक्षाच्या नवीन कार्यालयांचे उद्घाटन करण्यात येणार आहे.

महामार्ग पाहणी: रखडलेल्या मुंबई-गोवा महामार्गाच्या कामाची प्रत्यक्ष पाहणी राज ठाकरे करणार आहेत.

राज ठाकरेंच्या आगमनापूर्वी वाद शमणार की असंतोषाचा भडका उडणार?

राज ठाकरे आणि अमित ठाकरे यांच्या या महत्त्वाच्या दौऱ्यापूर्वीच दक्षिण रायगड मनसेतील अंतर्गत वाद आणि राजीनाम्यांच्या सत्रामुळे पक्षाची डोकेदुखी चांगलीच वाढली आहे. राज ठाकरेंच्या आगमनापूर्वी हा वाद शमतो की असंतोषाचा भडका उडतो, याकडे आता संपूर्ण राजकीय वर्तुळाचे लक्ष लागले आहे.